ភ្នំពេញ៖ ការរឹតបណ្តឹងច្បាប់ចរាចរណ៍ផ្លូវគោក ទទួលបានលទ្ធផលល្អប្រសើរ ដោយចំនួនអ្នកស្លាប់និងអ្នករបួស បានថយចុះ។ តែ តួលេខ បង្ហាញថា អ្នកបើកម៉ូតូ ដែលត្រូវសមត្ថកិច្ច ចាប់ផាកពិន័យ ភាគច្រើនគឺមិនពាក់មួកសុវត្ថិភាព ហើយជនរងគ្រោះ ក្នុងគ្រោះថ្នាក់ចរណ៍ ភាគច្រើនក៏មិនពាក់មួកសុវត្ថិភាពដែរ។
ក្នុងសន្និសីទកាសែត នាព្រឹកថ្ងៃទី១ ខែមិថុនា ឆ្នាំ២០២០ នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិទទួលបន្ទុកផ្នែកចរាចរណ៍ក្នុងក្រប់ខណ្ឌទូទាំងប្រទេស បានថ្លែងដូច្នេះថា៖«បញ្ហាគួរឲ្យបារម្ភ គឺអ្នកដែលមិនពាក់មួកសុវត្ថិភាព នៅពេលមានគ្រោះថ្នាក់។ ហើយអ្នកជិះម៉ូតូមិនពាក់មួកសុវត្ថិភាព ដែលរងគ្រោះនោះ គឺមានច្រើន...»។
ម្យ៉ាងទៀត លោក អះអាងថា គ្រោះថ្នាក់ចរាចរណ៍ ដែលកើតឡើងនៅពេលយប់ នៅតែមានច្រើនជាងពេលថ្ងៃ។ លោក បន្តថា ក្នុងខែឧសភាកន្លងទៅ គ្រោះថ្នាក់ចរាចរណ៍នៅពេលយប់ មាន៥២ភាគរយ។
រយៈពេល១ខែ នៃខែឧសភា ឆ្នាំ២០២០ ក្នុងការរឹតបន្តឹងច្បាប់ចរាចរណ៍ គ្រោះថ្នាក់ចរាចរណ៍ បានកើតឡើង២១៨ករណី ថយចុះ១៣០ករណី អ្នកស្លាប់១១៣នាក់ ថយចុះ៤២នាក់ និង អ្នករបួស៣៤២នាក់ ថយចុះ១៦២នាក់ បើប្រៀបធៀបទៅនឹងខែឧសភាឆ្នាំ២០១៩ ដែលគ្រោះថ្នាក់ចរាចរណ៍ កើតឡើង ៣៤៨ករណី អ្នកស្លាប់១៥៥នាក់ និង អ្នករបួស៥០៤នាក់។ នេះបើតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក នៅថ្ងៃទី១ ខែមិថុនា។
របាយការណ៍ បង្ហាញទៀតថា បើប្រៀបធៀបនឹងខែមេសា ឆ្នាំ២០២០ ដែលមិនទាន់រឹតបន្តឹងច្បាប់ចរាចរណ៍ គ្រោះថ្នាក់ចរាចរណ៍ ក៏មានការថយចុះដែរ ដោយគ្រោះថ្នាក់ចរាចរណ៍ នៅខែមេសា មាន២៦៨ករណី អ្នកស្លាប់មាន ១២៧នាក់ និង អ្នករងរបួស៣៦៨នាក់។
បើតាមរបាយការណ៍ដដែល ក្នុងខែឧសភា សមត្ថកិច្ច ផាកពិន័យយានយន្តល្មើសច្បាប់ជាង៤,៤ម៉ឺនករណី ដោយក្នុងនោះ មានទោចក្រយានយន្ត និងត្រីចក្រយានយន្តជាង៣,២ម៉ឺនករណី ស្មើនឹង៧៣ភាគរយ និងរថយន្តគ្រប់ប្រភេទជាង១,២ម៉ឺនករណី ស្មើនឹង២៧ភាគរយ។
អ្នកបើកបរទោចក្រយានយន្តនិងត្រីចក្រយានយន្តជាង៣,២ម៉ឺនករណី ដែលត្រូវពិន័យ គឺមិនពាក់មួកសុវត្ថិភាព «៧៩ភាគរយ» ល្មើសសញ្ញាចរាចរណ៍១០ភាគរយ គ្មានផ្លាកលេខ៨ភាគរយ បើកបរក្នុងស្ថានភាពស្រវឹង១ភាគរយ ដឹកលើសចំណុះ១ភាគរយ និង ប្រើទូរស័ព្ទពេលបើកបរ១ភាគរយ ។ល។ ចំណែក អ្នកបើកបរយានយន្តជាង១,២ម៉ឺនករណី ដែលត្រូវពិន័យ គឺមិនពាក់ខ្សែក្រវាត់សុវត្ថិភាព៤៣ភាគរយ បើកលើសល្បឿន២៩ភាគរយ ល្មើសសញ្ញាចរាចរណ៍៩ភាគរយ ប្រើទូរស័ព្ទពេលបើកបរ៩ភាគរយ ដឹកលើសចំណុះ៤ភាគរយ គ្មានបណ្ណបើកបរ៣ភាគរយ គ្មានផ្លាកលេខ១ភាគរយ និង បើកបរក្នុងស្ថានភាពស្រវឹង១ភាគរយ។ល។
គណៈកម្មាធិការជាតិសុវត្ថិភាពចរាចរណ៍ផ្លូវគោក កត់សម្គាល់ថា គ្រោះថ្នាក់ចរាចរណ៍ ថយចុះ គឺដោយសារតែពលរដ្ឋច្រើនលើសលប់ បានចូលរួមគោរពច្បាប់ចរាចរណ៍ និងបើកបរដោយមានការយោគយល់គ្នាទៅវិញទៅមក។
ទន្ទឹមនឹងនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក ស្វាគមន៍នូវមតិរិះគន់ និងទទួលយកសំណូមពរ ដើម្បីកែលម្អចំណុចខ្វះខាត ទាក់ទងនឹងការអនុវត្តនិងការរឹតបន្តឹងច្បាប់ចរាចរណ៍។ ចំពោះកំហុសឆ្គង ដែលសមត្ថកិច្ចប្រព្រឹតិ្តមិនបានល្អប្រសើរក្នុងអំឡុងពេលប្រតិបត្តិការងារ គណៈកម្មាធិការជាតិសុវត្ថិភាពចរាចរណ៍ផ្លូវគោក អះអាងថា បានណែនាំហើយ។ សម្រាប់ជន ដែលផ្សព្វផ្សាយព័ត៌មានផ្ទុយពីការពិតនៃចំណាត់ការរបស់សមត្ថកិច្ច គណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានដោះស្រាយរួចផងដែរ។
ដើម្បីឲ្យចលនានៃការរឹតបន្តឹងច្បាប់ចរាចរណ៍នេះ បន្តទៅមុខដោយប្រសិទ្ធភាព គណៈកម្មាធិការជាតិសុវត្ថិភាពចរាចរណ៍ផ្លូវគោកស្នើឲ្យអនុគណៈកម្មការសុវត្ថិភាពចរាចរណ៍ផ្លូវគោករាជធានី ខេត្ត បន្តការរឹតបន្តឹង និងផ្សព្វផ្សាយអប់រំ ច្បាប់ស្ដីពីចរាចរណ៍ផ្លូវគោក និងប្រកាន់ភ្ជាប់នូវភាពម៉ឺងម៉ាត់ និងមានក្រុមសីលធម៌វិជ្ជាជីវៈបន្តទៀត និងស្នើឲ្យពលរដ្ឋរួមគ្នាគោរពច្បាប់ចរាចរណ៍ ខណៈគណៈកម្មាធិការជាតិសុវត្ថិភាពចរាចរណ៍ផ្លូវគោក អះអាងថា អត្រាស្លាប់ដោយគ្រោះថ្នាក់ចរាចរណ៍ចំពោះអ្នកជិះម៉ូតូនៅតែបន្តកើតមានទៀត៕