COVID-19
ជាតិ
COVID-19៖ សម្ដេចហ៊ុន សែន បន្តរំលឹកពលរដ្ឋឲ្យការពារខ្លួន ខណៈពិភពលោកមានជិត៦.៩លានករណី សម្តេចនាយករដ្ឋមន្ត្រីហ៊ុន សែន នាពេលទទួលព្រះរាជដំណើរយាងនិវត្តពីក្រុងប៉េកាំងរបស់ព្រះមហាក្សត្រ និងសម្តេចព្រះវររាជមាតា កាលពីថ្ងៃទី១១ ខែឧសភា។ រូបថត AFP
× ភ្នំពេញ៖ ទោះបីស្ថានភាពជំងឺកូវីដ-១៩ មានកម្រិតទាប ហើយចំនួនអ្នកព្យាបាលជាមានចំនួនច្រើនក៏ដោយ ប៉ុន្តែ សម្តេច ហ៊ុន សែន នៅតែបន្តរំឮកដល់ពលរដ្ឋឱ្យមានការប្រុងប្រយ័ត្ន ខណៈជំងឺនេះនៅតែមានលើពិភពលោក។
តាមហ្វេសប៊ុកផ្លូវការរបស់សម្ដេច ហ៊ុន សែន បានបញ្ជាក់ថា ពលរដ្ឋកុំភ្លេចខ្លួនពីជំងឺកូវីដ-១៩ឡើយ ដោយត្រូវពាក់ម៉ាស លាងសម្អាតដៃជាមួយសាប៊ូ ជែលលាងដៃ ឬទឹកអាល់កុល ។ ជាមួយគ្នានេះ សម្ដេចក៏បានរំឮកដល់អាជ្ញាធរនិងសមត្ថកិច្ច ត្រូវបន្តពិនិត្យនៅតាមភោជនីយដ្ឋាន ផ្សាតូច-ធំ និងទីកន្លែងប្រជុំជន ដែលត្រូវតែមានទឹកអាល់កុល នឹងជែលលាងដៃសម្រាប់អតិថិជន។
ជាពិសេសគឺនៅតាមគ្លីនិក និងមន្ទីរពេទ្យគឺត្រូវតែមានជែល ឬទឹកអាល់កុល និងម៉ាសសម្រាប់មនុស្សចេញចូល ដើម្បីការពារការឆ្លងរាលដាលមេរោគពីមនុស្សម្នាក់ទៅមនុស្សម្នាក់។
សូមជម្រាបថា គិតត្រឹមថ្ងៃទី ៦ ខែ មិថុនានេះ កម្ពុជាមានអ្នកផ្ទុកកូវីដ-១៩ ចំនួន ១២៥នាក់ ក្នុងចំណោមនោះមានអ្នកជាសះស្បើយចំនួន១២៣នាក់ ខណៈអ្នកឆ្លងជំងឺនេះនៅទូទាំងពិភពលោកកើតជិត៦.៩លាននាក់ ក្នុងនោះមានអ្នកជាសះស្បើយជាង ៣.៣លាននាក់ និងស្លាប់ជិត៤០ម៉ឺននាក់។
បន្ថែមពីលើនេះ សម្តេចក៏បានអរគុណផងដែរដល់អ្នកសាព័ត៌មាន វិទ្យុ ទូរទស្សន៍ និងភ្នាក់ងារផ្សព្វផ្សាយអនឡាញ ដែលបានចូលរួមផ្សព្វផ្សាយព័ត៌មានកូវីដ-១៩ទាន់ហេតុការណ៍ និងអំពីវិធីទប់ស្កាត់ការឆ្លងជំងឺកូវីដ១៩ នៅទូទាំងប្រទេស៕
© រក្សាសិទ្ធិដោយ thmeythmey.com