អន្តរជាតិ
អាជ្ញាធរក្រុង Minneapolis ចេញសេចក្តីសម្រេចហាមប៉ូលិសសង្កត់ ឬរឹតក ជនសង្ស័យ រូបភាព៖ Getty Image
× ក្រុមប្រឹក្សាក្រុង Minneapolis នៅថ្ងៃទី៥ ខែមិថុនា បានធ្វើកំណែទម្រង់មួយទៅលើស្ថាប័នប៉ូលិសក្រុង Minneapolis ដើម្បីបញ្ចៀសករណីស្លាប់ដូចលោក George Floyd ទៀត។ សេចក្តីសម្រេចមួយនេះ គឺហាមប៉ូលិសក្រុង Minneapolis រឹតក ឬសង្កត់កជនសង្ស័យទៀត។
តាមរយៈការកោះប្រជុំបន្ទាន់មួយ ក្រុមប្រឹក្សាក្រុងMinneapolis បានបោះឆ្នោតយល់ព្រមជាឯកច្ឆន្ទលើវិធានថ្មីមួយ ដោយហាមប៉ូលិសក្រុង Minneapolis ប្រើប្រាស់វិធានការរឹតកជនសង្ស័យ ដែលបានប្រព្រឹត្តបទល្មើស។ យ៉ាងណាក៏ដោយ សេចក្តីសម្រេចនេះ អាចអនុវត្តទៅបានទាល់តែមានការយល់ព្រមពីតុលាការជាមួយសិន។
បើសេចក្តីសម្រេចនេះចូលជាធរមាន វានឹងក្លាយជាច្បាប់មួយ ដែលផ្តល់សិទ្ធិឲ្យមន្ត្រីក្រុងមានសិទ្ធិអន្តរាគមន៍គ្រប់ពេល និងរាយការណ៍ ប្រសិនបើឃើញប៉ូលិសប្រើប្រាស់វិធានការរឹតក ឬសង្កត់កជនសង្ស័យ។ ការណ៍នេះ ធ្វើឡើងប៉ុន្មានថ្ងៃប៉ុណ្ណោះ បន្ទាប់ពីករណីស្លាប់របស់លោក George Floyd ដោយសារតែសកម្មភាពសង្កត់ករបស់ក្រុមប៉ូលិសក្រុង Minneapolis។
សូមបញ្ជាក់ថា តាមការចុះផ្សាយរបស់សារព័ត៌មាន NBC ប៉ូលិសក្រុងMinneapolis បានប្រើប្រាស់វិធានការរឹតកជនសង្ស័យ ដែលបានប្រព្រឹត្តបទល្មើសរហូតដល់ ២៣៧ដងឯណោះ បើគិតចាប់ពីឆ្នាំ២០១៥កន្លងមក។ មនុស្ស ៤៤នាក់ ត្រូវបានគេរកឃើញថា មានស្ថានភាពមិនប្រក្រតី បន្ទាប់ពីប៉ូលិសប្រើប្រាស់វិធានការទាំងនោះ៕
© រក្សាសិទ្ធិដោយ thmeythmey.com