អន្តរជាតិ
×![]()
ដោយ: ធីតា
សកលវិទ្យាល័យ North Central University ដែលស្ថិតនៅក្រុង Minneapolis រដ្ឋ Minnesota បានចាប់ផ្តើមកម្មវិធីអាហារូបករណ៍ដែលមានឈ្មោះថា «George Floyd Scholarship Fund» ដើម្បីឧទ្ទិសដល់បុរសស្បែកខ្មៅអាយុ៤៦ឆ្នាំ ដែលត្រូវបានប៉ូលិសនៃទីក្រុងមួយនេះ យកជង្គង់សង្កត់ក រហូតដល់ស្លាប់ និងបង្កឲ្យមានចលានតវ៉ាទូទាំងសហរដ្ឋអាមេរិក។
យោងតាមការផ្សាយរបស់ Daily News អាហារូបករណ៍ «George Floyd Scholarship Fund» នេះ នឹងផ្តល់សម្រាប់កម្មវិធី Act Six របស់សកលវិទ្យាល័យលើការបណ្តុះបណ្តាលអនាគតអ្នកដឹកនាំនៅទីក្រុង។ លោក Scott Hagen សាកលវិទ្យាធិការនៃ North Central University ក៏បានស្នើដល់បណ្តាសាកលវិទ្យាល័យផ្សេងទៀតនៅសហរដ្ឋអាមេរិក ធ្វើដូចខ្លួនយ៉ាងដូច្នោះដែរ ។
បច្ចុប្បន្ន ទឹកប្រាក់សម្រាប់អ្នកជាប់អាហារូបករណ៍នេះ មានចំនួន៥៣០០០ដុល្លារអាមេរិក។ North Central University ដែលជាសកលវិទ្យាល័យឯកជន មានចម្ងាយជិត៥គីឡូម៉ែត្រពីទីតាំងដែលលោក George Floyd ត្រូវបានប៉ូលិសសង្កត់ក រហូតដល់ស្លាប់កាលពីថ្ងៃទី២៥ ខែឧសភា បន្ទាប់ពីគេត្រូវបានចាប់ខ្លួនក្នុងករណីសង្ស័យប្រើក្រដាសប្រាក់ក្លែងក្លាយ២០ដុល្លារអាមេរិកនៅហាងទំនិញមួយ។
ករណីនេះ បាននាំឲ្យមានរលកនៃការតវ៉ាប្រឆាំងនឹងការរើសអើងជាតិសាសន៍ពេញសហរដ្ឋអាមេរិក ថែមទាំងមានករណីហិង្សាដុតរថយន្ត បំផ្លាញទីតាំងផ្សារទំនិញ និងគ្រោះថ្នាក់ជាច្រើនផងដែរ៕
© រក្សាសិទ្ធិដោយ thmeythmey.com
