អន្តរជាតិ
អាយុជិត៩៥ឆ្នាំ លោក Mahathir នៅតែអាចជិះកង់ហាត់ប្រាណបាន៩គីឡូម៉ែត្រ
× អតីតនាយករដ្ឋមន្ត្រីម៉ាឡេស៊ី លោក Mahathir Mohamadដែលនឹងគម្រប់ខួបអាយុ៩៥ឆ្នាំ នាថ្ងៃទី១០ ខែកក្កដា ខាងមុខ បានជិះកង់ហាត់ប្រាណនៅជុំវិញបឹងក្នុងក្រុង Putrajaya នាថ្ងៃឈប់សម្រាកបុណ្យចម្រើនព្រះជន្មព្រះមហាក្សត្រ ស៊ុលតង់ ហាជីអាម៉ាត្សា។
ជាមួយនឹងឃ្លីបវីដេអូពីសកម្មភាពរបស់ខ្លួន លោក Mahathir បានបញ្ជាក់ថា លោកធ្វើបានសម្រេចក្នុងចម្ងាយ៩គីឡូម៉ែត្រជុំវិញបឹង។ «ចូរយកចិត្តទុកដាក់ថែទាំសុខភាពរបស់អ្នក និងហាត់ប្រាណឲ្យបានញឹកញាប់»។ នេះជាសារទូន្មានរបស់អតីតនាយករដ្ឋមន្ត្រីដែលមានវ័យចំណាស់ជាងគេលើលោក។
បើប្រៀបធៀបទៅនឹងកាលពីឆ្នាំ២០១៩ លោក Mahathir ជិះបានចម្ងាយតិចជាង២គីឡូម៉ែត្រ។ នៅក្នុងឃ្លីបវីដេអូ អតីតមេដឹកនាំម៉ាឡេស៊ីរូបនេះ ក៏បានលើកឡើងពីទស្សនៈមួយថា៖ «ប្រសិនបើអ្នកចង់ក្លាយជាអ្នកដឹកនាំ អ្នកត្រូវតែមានគំនិត បើមិនដូច្នោះទេ អ្នកគ្រាន់តែជាមនុស្សម្នាក់ដែលចាំតែធ្វើតាមគេប៉ុណ្ណោះ»៕
© រក្សាសិទ្ធិដោយ thmeythmey.com