COVID-19
អន្តរជាតិ
វៀតណាម ផ្តល់សច្ចាប័នលើកិច្ចព្រមព្រៀងពាណិជ្ជកម្មជាមួយសហភាពអឺរ៉ុប ទង់ជាតិវៀតណាម និងសហភាពអឺរ៉ុប នាពេលចុះហត្ថលេខាកិច្ចព្រមព្រៀងពាណិជ្ជកម្មឆ្នាំ២០១៩។ រូបភាព Reuters
× វៀតណាម នៅថ្ងៃទី៨ ខែមិថុនានេះ បានផ្តល់សច្ចាប័នលើកិច្ចព្រមព្រៀងពាណិជ្ជកម្មជាមួយសហភាពអឺរ៉ុប ដែលនឹងកាត់បន្ថយអត្រាពន្ធនាំចូលចំនួន៩៩ភាគរយលើទំនិញរវាងប្រទេសអាស៊ីអាគ្នេយ៍មួយនេះ និងប្លុកប្រទេសអឺរ៉ុប។ កិច្ចព្រមព្រៀងពាណិជ្ជកម្មនេះមានសារសំខាន់សម្រាប់ការលូតលាស់នៃសេដ្ឋកិច្ចវៀតណាម ក្រោយជំងឺរាតត្បាតCOVID-19 ផុតរលត់ទៅ។
កិច្ចព្រមព្រៀងពាណិជ្ជកម្មសេរី សហភាពអឺរ៉ុប-វៀតណាម (European Union Vietnam Free Trade Agreement) ត្រូវបានសមាជិករដ្ឋសភាវៀតណាមអនុម័តផ្តល់សច្ចាប័នដោយសម្លេង៩៤ភាគរយ។ សម្រាប់សហភាពអឺរ៉ុប នេះជាកិច្ចព្រមព្រៀងពាណិជ្ជកម្មទី២ ជាមួយប្រទេសក្នុងតំបន់អាស៊ាន បន្ទាប់ពីប្រទេសសិង្ហបុរី។ គេរំពឹងថា កិច្ចព្រមព្រៀងនេះ នឹងចូលជាធរមាននៅក្នុងខែកក្កដា។
បើតាមទីភ្នាក់ងារព័ត៌មាន Reuters កិច្ចព្រមព្រៀងពាណិជ្ជកម្មនេះ អនុញ្ញាតឲ្យវៀតណាមមានរយៈពេលអន្តរកាល១០ឆ្នាំ ដើម្បីរៀបចំយន្តការអនុវត្តជាពិសេសការកាត់បន្ថយពន្ធលើផលិតផលបន្តិចម្តងៗដែលធានាមិនឲ្យមានបញ្ហាប្រឈមខ្លាំង។ ជាថ្នូរមកវិញ វៀតណាមត្រូវបើកចំហរទីផ្សារសេវាកម្មរបស់ខ្លួន រួមមានប្រៃសណីយ៍ ធនាគារ ការដឹកជញ្ជូនតាមនាវា និងការដេញថ្លៃជាសាធារណៈ ដោយតម្រូវផងដែរឲ្យផ្តល់ការការពារលើចំណីអាហារ និងភេសជ្ជៈអឺរ៉ុបពីការលួចចម្លងកម្មសិទ្ធិបញ្ញា។
យ៉ាងណាមិញ វាក៏មានការរិះគន់ផងដែរទៅលើកិច្ចព្រមព្រៀងនេះ ដ្បិតអឺរ៉ុបហាក់មិនបានលើកឡើងពីការអនុវត្តសិទ្ធិមនុស្ស និងសិទ្ធិពលករនៅវៀតណាម។ ប៉ុន្តែក្រុងហាណូ ប្រកាសពីការប្ដេជ្ញាចិត្តរបស់ដើម្បីកែប្រែចំណុចខ្វះខាតនេះ ស្របពេលដែលអឺរ៉ុបនឹងតាមដានសកម្មភាពវៀតណាមផងដែរ។
ធនាគារពិភពលោក បានព្យាករថា កិច្ចព្រមព្រៀងពាណិជ្ជកម្មនេះនឹងបង្កើនផលិតផលសរុបក្នុងស្រុករបស់វៀតណាមបាន២,៤ភាគរយ និងជំរុញការនាំចេញ១២ភាគរយ នៅឆ្នាំ២០៣០ ។ មិនតែប៉ុណ្ណោះ វានឹងជួយពលរដ្ឋវៀតណាមរាប់ម៉ឺននាក់ចាកចេញពីភាពក្រីក្រផងដែរ៕
© រក្សាសិទ្ធិដោយ thmeythmey.com