សង្គមអន្តរជាតិ
អន្តរជាតិ
តំបន់ គ្មានកងទ័ពរវាងប្រទេសកូរ៉េទាំង២។រូបភាពAFP
×![]()
កូរ៉េខាងជើង នឹងកាត់ផ្តាច់បណ្តាញទំនាក់ទំនងទាំងអស់ជាមួយកូរ៉េខាងត្បូងនៅរសៀលថ្ងៃទី៩ ខែមិថុនានេះ ដោយចោទប្រកាន់កូរ៉េខាងត្បូងថា មិនបានបញ្ឈប់ការបង្ហោះខិត្តប័ណ្ណប្រឆាំងទីក្រុងព្យុងយ៉ាងពីអ្នករត់ចេញពីកូរ៉េខាងជើង។ នេះបើតាមការផ្សាយរបស់ទីភ្នាក់ព័ត៌មានរដ្ឋកូរ៉េខាងជើង KCNA ។
ទីភ្នាក់ងារព័ត៌មានរដ្ឋ KCNA បញ្ជាក់ថា បណ្តាញទំនាក់ទំនងរវាងកូរ៉េខាងត្បូងនឹងត្រូវកាត់ផ្តាច់នៅរសៀលថ្ងៃទី៩ ខែមិថុនានេះ មានខ្សែទូរស័ព្ទបន្ទាន់រវាងទីស្នាក់ការបក្សពលករកូរ៉េខាងជើងរបស់លោក គីម ជុងអ៊ុន និងវិមានប្រធានាធិបតីកូរ៉េខាងត្បូងរបស់លោក មូន ចេអ៊ីន, បណ្តាញទំនាក់ទំនងរវាងយោធាប្រទេសទាំងពីរ, និងខ្សែទូរស័ព្ទនៅឯការិយាល័យទំនាក់ទំនងអន្តរកូរ៉េ។
ការសម្រេចចិត្តនេះ ធ្វើឡើងក្រោយកិច្ចប្រជុំចូលរួមលោកស្រី Kim Yo-jong ប្អូនស្រីលោក គីម ជុងអ៊ុន និងលោក Kim Yong-chol អនុប្រធានគណៈកម្មាធិការមជ្ឈិមរបស់បក្សពលករកូរ៉េ។ អំឡុងកិច្ចប្រជុំនេះ កូរ៉េខាងជើងបានសង្កត់ធ្ងន់ថា ការងារជាមួយកូរ៉េខាងត្បូងគួរតែប្រែក្លាយជាការងារប្រឆាំងសត្រូវ និងពិភាក្សាផែនការជាដំណាក់ៗក្នុងការប្រែក្លាយការងារនេះដើម្បីឲ្យអ្នកក្បត់ និងមនុស្សឋានៈតូចទាបទទួលខុសត្រូវចំពោះអំពើដែលបានប្រព្រឹត្ត។
ក្រោយកិច្ចប្រជុំនេះ ថ្នាក់ដឹកនាំកូរ៉េខាងជើងបានសន្និដ្ឋានថា៖ «គេមិនមានការចាំបាច់ក្នុងការជជែកទល់មុខគ្នាជាមួយអាជ្ញាធរកូរ៉េខាងត្បូងឡើយ និងពុំមានបញ្ហាអ្វីដែលត្រូវជជែកដែរ ដោយសារតែការពិភាក្សាជាមួយកូរ៉េខាងត្បូងបណ្តាលឲ្យតែមានរឿងស្រងាកចិត្ត។» បើតាម KCNA ការកាត់ផ្តាច់បណ្តាញទំនាក់ទំនងនេះ គ្រាន់តែជាដំណាក់កាលដំបូងក្នុងការកាត់ផ្តាច់មធ្យោបាយជាមួយកូរ៉េខាងត្បូង និងរឿងមិនបានការទាំងឡាយ។
គួរបញ្ជាក់ថា ខ្សែទំនាក់ទំនងដែលកូរ៉េខាងជើងនឹងកាត់ផ្តាច់នេះ ត្រូវបានបង្កើតឡើងនៅឆ្នាំ២០១៨ ក្រោយជំនួបចំនួន៣ដង រវាងលោក មូន និងលោក គីម ដែលបង្កើតឲ្យមានបរិយាកាសសន្តិភាពរវាងកូរ៉េទាំងពីរ។
កាលពីថ្ងៃទី៤ ខែមិថុនា លោកស្រី Kim Yojong ធ្លាប់បានព្រមានកូរ៉េខាងត្បូងឲ្យបញ្ឈប់សកម្មភាពបង្ហោះខិត្តប័ណ្ណដោយអ្នកលួចរត់ចេញពីកូរ៉េខាងជើង ចូលក្នុងតំបន់គ្មានកងទ័ពដែលបែងចែកប្រទេសទាំងពីរ។ លោកស្រី Kim Yo Jong ប្អូនស្រីសំណព្វលោក គីម ជុងអ៊ុន ព្រមានថា កូរ៉េខាងជើង នឹងលុបចោលកិច្ចព្រមព្រៀងយោធាទ្វេភាគីជាមួយកូរ៉េខាងត្បូង និងគម្រោងរួមគ្នាឯទៀត បើសិនជាសកម្មភាពនេះនៅតែបន្ត៕
Tag:
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com
