អភិបាលស្រុកបន្ទាយស្រី គ្រោងដាំក្ងោក និងកាសាគូរ៉ា ៤ពាន់ដើម ពីភូមិព្រះដាក់ដល់ប្រាសាទបន្ទាយស្រី

ជាតិ

អភិបាលស្រុកបន្ទាយស្រី គ្រោងដាំក្ងោក និងកាសាគូរ៉ា ៤ពាន់ដើម ពីភូមិព្រះដាក់ដល់ប្រាសាទបន្ទាយស្រី

10, Jun 2020 , 9:19 pm

រូបភាព

រូបភាពពីលោក ឃឹម ហ្វីណង់ អភិបាលស្រុកបន្ទាយស្រី

ដោយ:

ភ្នំពេញ៖លោក ឃឹម ហ្វីណង់ អភិបាលស្រុកបន្ទាយស្រី គ្រោងដឹកនាំពលរដ្ឋ និងយុវជន ដាំដើមក្ងោក និងដើមសាគូរ៉ា ចំនួន៤ពាន់ដើម នៅសងខាងបណ្តោយផ្លូវពីភូមិព្រះដាក់ ដល់ប្រាសាទបន្ទាយស្រី ដែលមានចម្ងាយជិត២០គីឡូម៉ែត្រ ដើម្បីទាក់ទាញភ្ញៀវទេសចរ។

លោក ឃឹម ហ្វីណង់ អភិបាលស្រុកបន្ទាយស្រី បញ្ជាក់ប្រាប់អ្នកសារព័ត៌មាន ThmeyThmey តាមទូរស័ព្ទថា គម្រោងដាំក្ងោក និងសាគូរ៉ានេះ នឹងចាប់ផ្តើមពីខែកក្កដាតទៅ ដោយដាំម្តង៤០០ ទៅ៥០០ដើម។ បើតាមអភិបាលស្រុកបន្ទាយស្រី ក្ងោក និងសាគូរ៉ា នឹងមានផ្ការីកស្គុសស្គាយ នៅរយៈពេល១ ទៅ២ឆ្នាំទៀត ដោយសារតែដើមដែលត្រូវយកទៅដាំនោះ មានអាយុ១ឆ្នាំជាងរួចទៅហើយ។ ទោះយ៉ាងណាក៏ដោយ លោក ហ្វីណង់ ក៏មានកង្វល់ចំពោះការថែទាំដើមឈើនៅទីតាំងដែលគ្មានផ្ទះពលរដ្ឋដែរ។ លោក ពន្យល់បន្ថែមដូច្នេះ៖«ចំណុចដែលពិបាកនោះ គឺមិនមែនពិបាករកដើមមកដាំ ហើយពេលដែលដាំហើយ ទាមទារឲ្យមានការថែរក្សា ស្រោចទឹកជាប្រចាំ។ ហើយកន្លែងណាដែលវានៅមុខផ្ទះរបស់ប្រជាជន វាមិនពិបាកទេ។ ប៉ុន្តែចន្លោះខ្លះ វាអត់មានផ្ទះនៅទេ។ អ៊ីចឹងវាចាំបាច់ឲ្យរដ្ឋបាលស្រុក ចាត់ចែងស្រោចទឹកជាប្រចាំ។ ម្យ៉ាងទៀតគឺយើងស្រូតទាន់រដូវវស្សា និងកេងចំណេញអំពីទឹកភ្លៀងធ្លាក់ វាអាចនឹងចាប់ឫសបានទាន់»។

ក្រៅពីដាំដើមក្ងោក និងសាគូរ៉ា អភិបាលស្រុកបន្ទាយស្រីរូបនេះ ក៏គ្រោងដាំផ្កាម៉ោង១០ ផ្កាកំពីងពួយ និងផ្កាស្បៃរឿង នៅតាមរបងផ្ទះរបស់ពលរដ្ឋ ហើយគ្រោងចែកដើមផ្កាតូចៗមួយចំនួនទៀត ឲ្យពលរដ្ឋដាំលម្អតាមផ្ទះផងដែរ។ ដ្បិតត្រូវចំណាយលុយផ្ទាល់ខ្លួន និងប្រាក់ដែលទទួលបានពីសប្បុរសជនខ្លះដើម្បីទិញដើមឈើ និងផ្កាទាំងនេះ តែអភិបាលស្រុកវ័យក្មេងរូបនេះ សង្ឃឹមថានឹងឃើញដើមផ្កាតាមផ្ទះពលរដ្ឋកាន់តែច្រើន ជាពិសេស គឺទាក់ទាញទេសចរកាន់តែច្រើន។

សូមបញ្ជាក់ថា ក្រៅពីប្រាសាទបន្ទាយស្រី និងភ្នំគូលែន ស្រុកបន្ទាយស្រី ក៏មានតំបន់ទេសចរណ៍ជាច្រើនកន្លែងទៀតដែរ ដូចជារមណីយដ្ឋានបឹងឈូក, រមណីយដ្ឋានក្បាលស្ពាន, សួនមេអំបៅ, សារមន្ទីរមីន, ផ្ទះស្នាក់បៃតង, ផ្ទះស្នាក់បងធំ និងមានកន្លែងត្បាញសូត្រជាដើម៕