លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា(NOCC)បានអះអាងថា ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអង្គរមិនត្រូវបានលុបចោលនោះទេ។ លោករំពឹងថា ព្រឹត្តិការណ៍នេះ នឹងជួយត្រួសត្រាយផ្លូវក្នុងការជួយទាក់ទាញភ្ញៀវទេសចរឲ្យមកកម្សាន្តនៅកម្ពុជា ពិសេសខេត្តសៀមរាប។ NOCC នឹងរក្សាឈ្មោះកីឡាករដែលបានចុះឈ្មោះរួចទុកទៅឆ្នាំក្រោយ ក្នុងករណីពួកគេមិនបានចូលរួម ដោយសារកត្តាហាមឃាត់ផ្សេងៗនៃជំងឺកូវីដ-១៩។
លោក វ៉ាត់ ចំរើន រដ្ឋលេខាធិការក្រសួងទេសចរណ៍រំពឹងព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអង្គរ ជួយស្ថារស្ថានភាពវិស័យទេសចរណ៍កម្ពុជា ដែលបានធ្លាក់ចុះក្នុងអំឡុងពេលរីករាលដាលនៃជំងឺកូវីដ-១៩ ឲ្យមានភាពល្អប្រសើរឡើងវិញ។ ចំនួនភ្ញៀវទេសចរនៅកម្ពុជាបានធ្លាក់ចុះគួរឲ្យកត់សម្គាល់ក្នុងអំឡុងពេលពិភពលោកជួបវិបត្តិការរាតត្បាតនៃជំងឺកូវីដ-១៩ តែក្រសួងទេសចរណ៍ពុំបានបង្ហាញរបាយការណ៍ជាក់លាក់ណាមួយនៃការធ្លាក់ចុះនេះឡើយ។
ជាមួយការបង្ហាញក្តីរំពឹង លោក ជឿជាក់ថា ព្រឹត្តិការណ៍នេះ នឹងជួយបង្ហាញឲ្យពិភពលោកឃើញថា កម្ពុជាមានសមត្ថភាព និងសុវត្ថិភាពគ្រប់គ្រាន់សម្រាប់ដំណើរកម្សាន្តរបស់ភ្ញៀវទេសចរក្រោយការរាតត្បាតនៃជំងឺកូវីដ-១៩។ ព្រឹត្តិការណ៍នេះ ក៏ជាឱកាសក្នុងការផ្សព្វផ្សាយពីតំបន់ទេសចរណ៍ប្រវត្តិសាស្ត្រក្នុងខេត្តសៀមរាបផងដែរ។
«សូមឲ្យការចូលរួមរបស់យើងបង្ហាញពីសុវត្ថិភាព សន្តិភាព រមណីយដ្ឋាន ឬគោលដៅទេសចរណ៍ឯកមួយរបស់កម្ពុជានៅអង្គរវត្តក្នុងខេត្តសៀមរាបក្នុងការទាក់ទាញភ្ញៀវទេសចរ។ យើងរំពឹងថា ក្រោយព្រឹត្តិការណ៍ពាក់កណ្តាលម៉ារ៉ាតុន នឹងបង្ហាញពិភពលោកឲ្យឃើញថា នៅអង្គរសៀមរាបយើងមានសមត្ថភាពគ្រប់គ្រាន់ សម្រាប់ទទួលពួកគាត់ នៅក្រោយជំងឺកូវីដ-១៩»។ នេះជាការលើកឡើងរបស់លោក វ៉ាត់ ចំរើន។
ទោះបីបច្ចុប្បន្នពិភពលោក ក៏ដូចជាកម្ពុជាកំពុងប្រឈមនឹងការរាតត្បាតនៃជំងឺកូវីដ-១៩ អគ្គលេខាធិការ NOCC រូបនេះអះអាងថា ព្រឹត្តិការណ៍កីឡាទេសចរណ៍ប្រចាំឆ្នាំដ៏ធំខាងលើមិនត្រូវបានលុបចោលនោះទេ។ ប៉ុន្តែដោយសារការរាតត្បាតនៃជំងឺកូវីដ-១៩ NOCC បានសម្រេចលុបចោលព្រឹត្តិការណ៍កីឡាទេសចរណ៍ចំនួនពីររួមមានព្រឹត្តិការណ៍ពាក់កណ្តាលម៉ារា់តុនអន្តរជាតិភ្នំពេញ និងម៉ារ៉ាតុនអន្តរជាតិចក្រភពខ្មែរនៅខេត្តសៀមរាប។
លោកបន្ថែមថា៖«NOCC មានព្រឹត្តិការណ៍កីឡាទេសចរណ៍ប្រចាំឆ្នាំដ៏ធំមួយ គឺនៅខែធ្នូ ហើយនៅបើកនៅឡើយទេ។ តែយើងបានលុបនៅខែសីហា គឹម៉ារ៉ាតុនចក្រភពខ្មែរ។ យើងមិនសង្ឃឹមបានភ្ញៀវពីក្រៅប្រទេស តែរំពឹងប្រជាពលរដ្ឋនិងភ្ញៀវទេសចរក្នុងស្រុកយើង នឹងចូលរួមរត់លេងសប្បាយក្នុងព្រឹត្តិការណ៍ពាក់កណ្តាលម៉ារ៉ាតុននៅអង្គរវត្តយើង»។
សម្រាប់កីឡាករកីឡាការិនីនៅក្រៅប្រទេស ដែលបានចុះឈ្មោះចូលរួមរួច តែមិនបានចូលរួមក្រោមលក្ខខណ្ឌហាមឃាត់ណាមួយរបស់ប្រទេសដោយសារជំងឺកូវីដ-១៩ NOCC នឹងរក្សាឈ្មោះពួកគេទុកទៅឆ្នាំក្រោយ។ បើគ្មានការប្រែប្រួលទេ ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិអង្គរ នឹងប្រព្រឹត្តទៅនៅសប្តាហ៍ទី១ក្នុងខែធ្នូ ឆ្នាំ២០២០ នៅខេត្តសៀមរាប។
ព្រឹត្តិការណ៍នេះ រៀបចំឡើងដើម្បីប្រមូលថវិកាជួយដល់មន្ទីរពេទ្យគន្ធបុប្ផា និងអង្គការសប្បុរសធម៌មាន និងជួយបំផុសស្មារតីប្រជាពលរដ្ឋឲ្យចេះស្រលាញ់ និងការពារបរិស្ថានក្នុងបរិវេណតំបន់ទេសចរណ៍ប្រវត្តិសាស្ត្រអង្គរ។ ពិសេស ដើម្បីទាក់ទាញភ្ញៀវទេសចរជាតិនិងអន្តរជាតិឲ្យមកកម្សាន្តតំបន់ទេសចរណ៍នៅកម្ពុជា ពិសេសខេត្តសៀមរាប។ ការផ្សព្វផ្សាយពីតំបន់ទេសចរណ៍ប្រវត្តិសាស្ត្រក្នុងខេត្តសៀមរាប ក៏ស្ថិតក្នុងគោលបំណងនៃព្រឹត្តិការណ៍នេះដែរ។ គួររំឭកថា កាលពីឆ្នាំ២០១៩ ព្រឹត្តិការណ៍នេះបានទាក់ទាញកីឡាករកីឡាការិនីជាង១ម៉ឺននាក់ឲ្យចូលរួម៕