សង្គមអន្តរជាតិ
អន្តរជាតិ
ប្អូនស្រីមេដឹកនាំកូរ៉េខាងជើង គំរាមចាត់វិធានការប្រឆាំងកូរ៉េខាងត្បូង រូបភាព AFP
× លោកស្រី គីម យ៉ូចុង ប្អូនស្រីបង្កើតមេដឹកនាំកូរ៉េខាងជើង គីម ជុងអ៊ុន បានផ្ញើសារគំរាមកូរ៉េខាងត្បូងជាថ្មីនៅថ្ងៃទី១៣ ខែមិថុនា អមដោយការព្រមានចាត់វិធានការប្រឆាំងប្រទេសបងប្អូនកូរ៉េមួយនេះ។ បើតាមទីភ្នាក់ងារព័ត៌មានរដ្ឋកូរ៉េខាងជើង KCNA លោកស្រី គីម អះអាងថា កងទ័ពកូរ៉េខាងជើង នឹងកំណត់ពីជំហានបន្ទាប់ប្រឆាំងកូរ៉េខាងត្បូងដែលបំពានមេដឹកនាំកំពូលរបស់ខ្លួន។ យ៉ាងណាមិញ ទីក្រុងសេអ៊ូលប្រាប់ឲ្យព្យុងយ៉ាងគោរពកិច្ចព្រមព្រៀងប្រទេសទាំងពីរ។
«ខ្ញុំគិតថា វាដល់ពេលដែលត្រូវចែកផ្លូវជាមួយអាជ្ញាធរកូរ៉េខាងជើង។ យើងនឹងចាត់វិធានការឆាប់ៗនេះ។» នេះជាការលើកឡើងរបស់លោកស្រី គីម យ៉ូចុង អនុប្រធានទីមួយនាយកដ្ឋាននៃគណៈមជ្ឈិមបក្សពលករកូរ៉េ និងជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គីម ជុងអ៊ុន ។
ក្នុងសេចក្ដីថ្លែងការណ៍ផ្សាយដោយទីភ្នាក់ងារព័ត៌មានកូរ៉េខាងជើង KCNA លោកស្រី គីម ដែលត្រូវបានមើលឃើញថា កំពុងចាត់ចែងកិច្ចការជាមួយកូរ៉េខាងត្បូង និយាយទៀតថា ដោយទទួលបានអំណាចពីមេដឹកនាំកំពូល បក្ស និងរដ្ឋ លោកស្រីបានណែនាំឲ្យគណៈកម្មាធិការដែលទទួលបន្ទុកទំនាក់ទំនងជាមួយកូរ៉េខាងត្បូង អនុវត្តវិធានការដាច់ខាតនេះ។ លោកស្រីបន្ថែមថា សិទ្ធិក្នុងការអនុវត្តចំណាត់ការបន្ទាប់ត្រូវប្រគល់ឲ្យនាយសេនាធិការកងទ័ពប្រជាជនកូរ៉េ។
ប្អូនស្រីមេដឹកនាំកូរ៉េខាងជើងរូបនេះ មិនបានបញ្ជាក់អ្វីឲ្យច្បាស់ពីជំហានបន្ទាប់របស់ទីក្រុងព្យុងយ៉ាងប្រឆាំងសេអ៊ូលឡើយ។ ប៉ុន្តែគេជឿថា ការិយាល័យកិច្ចការអន្តរកូរ៉េនៅឯ Kaesong ទំនងជាគោលដៅរបស់កូរ៉េខាងជើង។ ការិយាល័យនេះ ជាកន្លែងទំនាក់ទំនងរវាងកូរ៉េទាំងពីរ ដែលត្រូវបានបង្កើតក្រោមកិច្ចព្រមព្រៀងរវាងលោក គីម និងប្រធានាធិបតី មូន ចេអ៊ីន អំឡុងពេលដែលទំនាក់ទំនងបងប្អូនកូរ៉េកក់ក្ដៅខ្លាំងចាប់ពីឆ្នាំ២០១៨ មក។
សេចក្ដីថ្លែងការណ៍របស់លោកស្រី គីម គឺជាសារព្រមានមួយទៀតរបស់កូរ៉េខាងជើងចំពោះកូរ៉េខាងត្បូងដែលចាប់ផ្ដើមតាំងពីសប្ដាហ៍មុន។ មួយថ្ងៃមុនលោកស្រី គីម មន្ត្រីកូរ៉េខាងជើងម្នាក់ក៏បានចេញសារព្រមានទីក្រុងសេអ៊ូល និងថា ព្យុងយ៉ាងអស់ការទុកចិត្តលើសេអ៊ូល ព្រោះអាជ្ញាធរកូរ៉េខាងត្បូងបណ្ដែតបណ្ដោយឲ្យជនភៀសខ្លួនកូរ៉េខាងជើងបង្ហោះខិត្តបណ្ណដែលមានន័យប្រមាថមេដឹកនាំកំពូលកូរ៉េខាងជើង។
មួយថ្ងៃក្រោយ កូរ៉េខាងត្បូង បានទទូចឲ្យកូរ៉េខាងជើងគោរពការព្រមព្រៀងរបស់មេដឹកនាំទាំងពីរ។ ក្នុងសេចក្ដីថ្លែងការណ៍ថ្ងៃទី១៤ ខែមិថុនា ក្រសួងបង្រួបបង្រួមរបស់កូរ៉េខាងត្បូងបញ្ជាក់ថា កូរ៉េទាំងពីរគួរតែអនុវត្តតាមកិច្ចព្រមព្រៀងអន្តរកូរ៉េដែលចុះហត្ថលេខាកន្លងមក។ ក្រសួងដដដែលនេះបន្ថែមថា ទីក្រុងសេអ៊ូលតាមដានស្ថានការណ៍បច្ចុប្បន្នយ៉ាងដិតដល់បំផុត៕
Tag:
កូរ៉េខាងជើង
កូរ៉េខាងត្បូង
គីម យ៉ូចុង
© រក្សាសិទ្ធិដោយ thmeythmey.com