សង្គមអន្តរជាតិ
អន្តរជាតិ
មនុស្ស១៩នាក់ស្លាប់ និងជាង១៧០នាក់របួសក្នុងហេតុការណ៍ផ្ទុះរថយន្តដឹកហ្គាសនៅចិន
ក្រុមពន្លត់អគ្គីភ័យកំពុងពន្លើតភ្លើងក្រោយហេតុការណ៍ផ្ទុះ។ រូបភាព Xinhua
×![]()
ដោយ: តន ចាន់រិទ្ធារ៉ា
មនុស្សយ៉ាងហោចណាស់១៩នាក់ បានបាត់បង់ជីវិតក្នុងហេតុការណ៍ផ្ទុះរថយន្តដឹកនាំហ្គាសក្នុងខេត្តជឺជាំង ប្រទេសចិន។ ក្នុងហេតុការណ៍ដែលកើតឡើងនៅល្ងាចថ្ងៃទី១៣ ខែមិថុនា មនុស្សយ៉ាងហោចណាស់១៧០នាក់ទៀត បានរងរបួស។
ហេតុការណ៍ផ្ទុះរថយន្តដឹកហ្គាស បានកើតឡើងនៅភូមិមួយក្នុងទីក្រុងវិនលីង ខេត្តជឺជាំង ភាគខាងកើតចិនលើកំណត់ផ្លូវល្បឿនលឿនស៊ិនយ៉ាង-ហៃខូវ។ នេះបើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua ។ បន្ទាប់ពីផ្ទុះលើផ្លូវ រថយន្តក៏បន្តរុលចូលអាគារក្បែរនោះ ដែលបណ្ដាលឲ្យមានការដួលរលំផ្ទះ និងអាគារមួយចំនួនទៀត។
អាជ្ញាធរក្នុងតំបន់បានបញ្ជាក់ក្នុងសន្និសីទសារព័ត៌មាននៅថ្ងៃទី១៤ ខែមិថុនា ថា អ្នកស្លាប់បានកើនដល់១៩នាក់ ហើយអ្នករបួសមាន១៧២នាក់ ក្នុងនោះ២៤នាក់របួសធ្ងន់។ អភិបាលរងទីក្រុងវិនលីង Zhu Minglian និយាយថា បុគ្គលិកសង្គ្រោះច្រើនជាង២៦៦០នាក់ កំពុងធ្វើប្រតិបត្តិការសង្គ្រោះ ដែលអមដោយរថយន្តសង្គ្រោះ១៥១គ្រឿង ក៏ដូចជាគ្រឿងចក្រធុនធ្ងន់ និងគ្រឿងបរិក្ខារជាង៣០មុខទៀត។
អភិបាលរងដដែលនេះ បញ្ជាក់ថា បុគ្គលិកសុខាភិបាលច្រើនជាង៦៣០នាក់ ត្រូវបានកោះហៅដើម្បីព្យាបាលអ្នករងគ្រោះ ខណៈអាជ្ញាធរក៏បានត្រួតពិនិត្យកម្រិតបំពុលខ្យល់ដែលកើតចេញពីហេតុការណ៍នេះដែរ ប៉ុន្តែមិនមានការបំពុលអ្វីទេ។
ខណៈការសង្គ្រោះកំពុងធ្វើ អាជ្ញាធរចិនក៏បើកការស៊ើបអង្កេតលើករណីផ្ទុះនេះដែរ៕
Tag:
ចិន
© រក្សាសិទ្ធិដោយ thmeythmey.com
