អន្តរជាតិ
មេធាវីតំណាងហ្គំប៊ីស្នើ Facebook បញ្ចេញឯកសារនិងកិច្ចសន្ទនាយោធាជាន់ខ្ពស់មីយ៉ាន់ម៉ាលើការធ្វើទុក្ខបុកម្នេញរ៉ូហ៊ីងយ៉ា
រូបភាព Reuters
×![]()
ក្រុមមេធាវីតំណាងឲ្យហ្គំប៊ី បានស្នើឲ្យក្រុមហ៊ុន Facebook បញ្ចេញឯកសារពាក់ព័ន្ធនឹងសមត្ថកិច្ចមីយ៉ាន់ម៉ា ដែលមានជាប់ពាក់ព័ន្ធនឹងបទល្មើសប្រឆាំងនឹងជនជាតិភាគតិចរ៉ូហ៊ីងយ៉ា នៅក្នុងរដ្ឋ រាខាន របស់មីយ៉ាន់ម៉ា។ នេះ គឺជាបេសកកម្មមួយថ្មីរបស់ក្រុមដើមបណ្តឹងក្នុងសំណុំរឿង វិបត្តិមនុស្សជាតិរ៉ូហ៊ីងយ៉ា ក្នុងការប្រមូលភស្តុតាងបន្ថែមដើម្បីដាក់បន្ទុក និងស្វែងរកអ្នកមកទទួលខុសត្រូវលើបញ្ហានេះ។
តាមរយៈតុលាការក្នុងស្រុករបស់អាមេរិក ក្រុមមេធាវីតំណាងឲ្យ ហ្គំប៊ី នាពេលថ្មីៗនេះ បានស្នើឲ្យក្រុមហ៊ុន Facebook បញ្ចេញក្រុមឯកសារ និងកិច្ចសន្ទនាពាក់ព័ន្ធទាំងអស់ ដែលផលិត និងផ្សព្វផ្សាយជាសាធារណៈលើទំព័រ Facebook របស់កងកម្លាំងប្រដាប់អាវុធមីយ៉ាន់ម៉ា។ នេះបើយោងតាមការចុះផ្សាយរបស់ភ្នាក់ងារ ព័ត៌មាន Reuters។
តាមប្រភពព័ត៌មានដដែលនោះ មុខសញ្ញាកងកម្លាំងជាន់ខ្ពស់របស់មីយ៉ាន់ម៉ា ដែលក្រុមមេធាវីបានស្នើនោះ មានគណនីចំនួន ២០ ដែលរបស់មន្ត្រី និងស្ថាប័នរបស់មីយ៉ាន់ម៉ា។ គណនីរបស់អគ្គមេបញ្ជាការកងទ័ពមីយ៉ាន់ម៉ា លោក មិន អ៊ុងឡាំង ក៏មានរាប់បញ្ចូលក្នុងសំណើបញ្ចេញឯកសារផងដែរ។ ជុំវិញសំណើនេះ ក្រុមហ៊ុន Facebook មិនទាន់អាចធានាបានក្នុងការបញ្ចេញឯកសារនៅឡើយនោះទេ ដោយអះអាងថា ត្រូវត្រួតពិនិត្យពីលក្ខខណ្ឌផ្នែកច្បាប់ជាមុនសិន។
គួររម្លឹកបន្តិចថា នៅចុងឆ្នាំ២០១៩កន្លងទៅ រដ្ឋអាហ្វ្រិកខាងលិចហ្គំប៊ី ដែលមានអង្គការកិច្ចសហប្រតិបត្តិការឥស្លាមនៅពីក្រោយ បានប្ដឹងមីយ៉ាន់ម៉ាទៅកាន់តុលាការយុត្តិធម៌អន្តរជាតិរបស់អង្គការសហប្រជាជាតិពីបទបំពានអនុសញ្ញាឆ្នាំ១៩៤៨ស្ដីពីការប្រល័យពូជសាសន៍ជុំវិញករណីធ្វើទុក្ខបុកម្នេញជនជាតិរ៉ូហ៊ីងយ៉ា។ បណ្តឹងនេះ មានគោលដៅឲ្យមីយ៉ាន់ម៉ាបញ្ឈប់សកម្មភាពពាក់ព័ន្ធលើការធ្វើទុក្ខបុកម្នេញជនជាតិភាគតិចរ៉ូហ៊ីងយ៉ា និងស្វែងកយុត្តិធម៌ជូនជនរងគ្រោះផងដែរ។
ជាលទ្ធផលនៅដើមឆ្នាំ២០២០កន្លងទៅ តុលាការយុត្តិធម៌អន្តរជាតិ បានចេញសេចក្តីសម្រេចបង្គាប់បញ្ជាដំបូងមួយឲ្យមីយ៉ាន់ម៉ាត្រូវការពារជនជាតិភាគតិចរ៉ូហ៊ីងយ៉ាតាមគ្រប់មធ្យោបាយក្នុងរដ្ឋអំណាចខ្លួន, ធានាមិនឲ្យមានសកម្មភាពមានចរិកលក្ខណៈប្រល័យពូជសាសន៍របស់យោធាប្រឆាំងនឹងជនជាតិរ៉ូហ៊ីងយ៉ា, ធានាមិនឲ្យបាត់ បង់នូវវត្ថុតាងដែលប្រព្រឹត្តឡើងប្រឆាំងនឹងជនជាតិរ៉ូហ៊ីងយ៉ា និងធ្វើការរបាយការណ៍ជាប្រចាំពីវឌ្ឍនាភាពក្នុងតំបន់មានបញ្ហា។
ដោយឡែកសម្រាប់ការចោទប្រកាន់លើអ្នកពាក់ព័ន្ធ ឬអ្នកពីក្រោយខ្នងនៃវិបត្តិរ៉ូហ៊ីងយ៉ា តុលាការយុត្តិធម៌អន្តរជាតិ នៅមិនទាន់កំណត់នៅឡើយនោះទេ ដ្បិតសំណុំរឿងនេះ ក៏ស្ថិតក្នុងនីតិវិធីតតាំងគ្នានៅឡើយ។ ចំណុចនេះហើយ ដែលធ្វើឲ្យហ្គំប៊ី ត្រូវបន្តការងាររបស់ខ្លួន ក្នុងការប្រមែប្រមូលភស្តុតាងដើម្បីដាក់បន្ទុកទៅលើអ្នកដែលមានការទទួលខុសត្រូវលើវិបត្តិរ៉ូហ៊ីងយ៉ា ដែលបានផ្ទុះឡើងតាំងពីឆ្នាំ២០១៧ និងមិនទាន់មានពន្លឺយុត្តិធម៌ ក៏ដូចជាដំណោះស្រាយសមរម្យសម្រាប់ជនរងគ្រោះ៕
Tag:
ហ្គំប៊ី
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
