ប៉េកាំង គ្រោងធ្វើតេស្តទ្រង់ទ្រាយធំ បន្ទាប់ពីមានករណីឆ្លងCOVID-19 កើនឡើងថ្មី

COVID-19

អន្តរជាតិ

ប៉េកាំង គ្រោងធ្វើតេស្តទ្រង់ទ្រាយធំ បន្ទាប់ពីមានករណីឆ្លងCOVID-19 កើនឡើងថ្មី

15, Jun 2020 , 9:57 am

រូបភាព

សន្តិសុខ វាស់កម្តៅប្រជាជនមកផ្សារ Xinfadi។ រូបភាព៖ AFP

ដោយ: ធៀន ភារិន្ទ

អាជ្ញាធរក្រុងប៉េកាំង នៅថ្ងៃទី១៤ ខែមិថុនា បានគ្រោងធ្វើតេស្តលើប្រជាជនចិនជាច្រើនម៉ឺននាក់ ដើម្បីពិនិត្យរកមើលជំងឺរលាកសួត ដែលបង្កដោយកូរ៉ូណាវីរុស(COVID-19)។ គម្រោងធ្វើតេស្តលើប្រជាជនជាច្រើននាក់នេះ ធ្វើឡើងបន្ទាប់ពីអាជ្ញាធរសុខាភិបាលក្រុងប៉េកាំង បានរាយការណ៍ថា មានករណីឆ្លងកើនឡើងជាថ្មី។

ក្នុងថ្ងៃទី១៤ ខែមិថុនា អាជ្ញាធរសុខាភិបាលចិន បានរាយការណ៍ថា ខ្លួនបានរកឃើញករណីឆ្លង COVID-19 ថ្មីចំនួន ៣៦ករណី នៅក្នុងទីក្រុងប៉េកាំង, ៣ករណី នៅខេត្តផ្សេងទៀត និង ១៩ករណី គឺជាអ្នកដែលត្រលប់មកពីបរទេស។

ករណីឆ្លងនៅក្នុងទីក្រុងប៉េកាំងនេះ អាជ្ញាធរចិន បានអះអាងថា គឺទាក់ទងនឹងផ្សារ Xinfadi ទាំងអស់។ បញ្ហានេះ បានបង្កឲ្យចិនមានការព្រួយបារម្ភជាខ្លាំង ព្រោះវាអាចធ្វើឲ្យប្រទេសមួយនេះ ផ្ទុះ COVID-19 សារជាថ្មី។ ដើម្បីទប់ស្កាត់ការរាតត្បាតនៃ COVID-19 មន្ត្រីចិន បានលើកឡើងថា ពួកគេ បានគ្រោងធ្វើតេស្តលើប្រជាជនចំនួន ៤៦០០០នាក់ នៅក្នុងតំបន់ជុំវិញផ្សារ។ ស្ថានីយធ្វើតេស្តCOVID-19 ចំនួន ២៤ ក៏ត្រូវបានគេរៀបចំរួចរាល់ដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

តាមរយៈការសង្កេតរបស់អាជ្ញាធរ បន្ទាប់ពីមានករណីឆ្លងជាច្រើនករណីនេះ វីរុសថ្មីនេះ ត្រូវបានគេរកឃើញមាននៅលើជ្រុញវះសាច់ត្រីសាម៉ុន។ អាជ្ញាធរទីក្រុងប៉េកាំង ក៏បានបញ្ជាឲ្យមានការត្រួតពិនិត្យលើសាច់ក្លាសេ និងសាច់ស្រស់ បក្សី ត្រី នៅក្នុងផ្សារទំនើប កន្លែងស្តុក និងកន្លែងសម្រាប់ដាក់សាច់ជាដើម។

សូមបញ្ជាក់ថា ចិនមានករណីឆ្លងCOVID-19 សរុបចំនួន ៨៣១៨១ករណី អ្នកស្លាប់ ៤៦៣៤នាក់ និងអ្នកជាសះស្បើយចំនួន ៧៨៣៧០នាក់៕