សង្គមអន្តរជាតិ
អន្តរជាតិ
កូរ៉េខាងត្បូង រិះគន់ប្អូនស្រីលោកគីម ជុងអ៊ុន ដែលប្រើពាក្យមិនសមរម្យដាក់លោក មូន លោកYoo Do-han មន្ត្រីជាន់ខ្ពស់ទទួលបន្ទុកទំនាក់ទំនងសាធារណៈវិមានប្រធានាធិបតីកូរ៉េខាងត្បូង។ រូបភាព Yonhap
× ការិយាល័យប្រធានាធិបតីកូរ៉េខាងត្បូង នៅថ្ងៃទី១៧ ខែមិថុនា បានថ្កោលទោសលោកស្រីគីម យូច៉ុង ប្អូនស្រីលោកគីម ជុងអ៊ុន ដែលប្រើពាក្យសម្ដីមិនសូវសមរម្យដាក់ប្រធានាធិបតី មូន ចេអ៊ីន។ ខណៈដែលកូរ៉េខាងជើងបង្ករឿងកាន់តែខ្លាំង ទីក្រុងសេអ៊ូលសង្កត់ធ្ងន់ថា កូរ៉េខាងត្បូងនឹងមិនអត់អោនទៀតឡើយចំពោះសកម្មភាព និងភាសាមិនសមហេតុផលរបស់កូរ៉េខាងជើងទៀតឡើយ។
«វាជាទង្វើគ្មានន័យក្នុងការទិតៀន ដែលលើកឡើងជាមួយសំឡេងមិនសមរម្យ និងមិនយល់ពីគោលបំណងអ្វីទាល់តែសោះ»។ នេះជាការឡើងរបស់លោកYoo Do-han មន្ត្រីជាន់ខ្ពស់ទទួលបន្ទុកទំនាក់ទំនងសាធារណៈនៃវិមានប្រធានាធិបតីកូរ៉េខាងត្បូង Cheong Wa Dae នៅថ្ងៃទី១៧ ខែមិថុនា ដោយសំដៅសេចក្ដីថ្លែងការណ៍របស់លោកស្រី គីម យ៉ូចុង ប្អូនស្រីបង្កើតលោក គីម ជុងអ៊ុន ។
ប្រតិកម្មរបស់កូរ៉េខាងត្បូង ទៅកាន់លោកស្រី គីម យ៉ូចុង នេះធ្វើឡើងបន្ទាប់ពីលើកស្រី បានវាយប្រហារដោយផ្ទាល់ទៅលើលោក មូន ក្រោយលោកស្នើឲ្យថ្នាក់ដឹកនាំកូរ៉េខាងជើង កុំដើរបញ្ច្រាសស្មារតីកិច្ចព្រមព្រៀងអន្តរកូរ៉េដែលមានជាធរមាន។ លោកស្រី គីម បានតបទៅនឹងការលើកឡើងរបស់លោកមូន ជាសម្តីបោកបញ្ឆោតនិងគ្មានការខ្មាសអៀន។
បើតាមទីភ្នាក់ងារព័ត៌មាន Yonhap លោក Yoo បន្ថែមថា កូរ៉េខាងត្បូង និងមិនអត់អោនអោយទៀតឡើយ ចំពោះអាកប្បកិរិយា និងសម្តីគ្មានការពិចារណារបស់កូរ៉េខាងជើង ព្រោះសកម្មភាព និងសម្តីទាំងនោះ ប៉ះពាល់យ៉ាងធ្ងន់ធ្ងរទៅលើការទុកចិត្តគ្នារវាងថ្នាក់ដឹកនាំទាំងសងខាង។ លោកបន្ថែមទៀតថា សកម្មភាពបង្កហេតុជាបន្តបន្ទាប់របស់កូរ៉េខាងជើងប៉ុន្មានសប្តាហ៍នេះនឹងមិនជួយកូរ៉េខាងជើងឡើយ ហើយកូរ៉េខាងជើងត្រូវតែទទួលខុសត្រូវចំពោះទង្វើរបស់ខ្លួន។
លោក Yoo ក៏បង្ហាញការសោកស្តាយផងដែរចំពោះការទម្លាយព័ត៌មានពីសំណាក់កូរ៉េខាងជើង ជុំវិញបំណងក្នុងការបញ្ជូនបេសកជនពីកូរ៉េខាងត្បូង ដោយនិយាយថាកូរ៉េខាងជើងគួរណាស់តែមានរបៀបរបបខ្លះដែរ។ មន្ត្រីជាន់ខ្ពស់វិមាន Cheong Wa Dae សង្កត់ធ្ងន់ថា៖ «វាជារឿងដែលមិនធ្លាប់មាន និងជាទង្វើគ្មានហេតុផល ដែលមានចេតនាបំភ្លៃគោលបំណង នៃការបញ្ជូនបេសកជន។»
សូមបញ្ជាក់ថា លោក មូន កាលពីថ្ងៃទី១៥ ខែមិថុនា បានស្នើបញ្ជូន ទីប្រឹក្សាសន្តិសុខជាតិ និង ប្រធានចារកិច្ច ជាអ្នកបេសកជនពិសេសដើម្បីជជែកជាមួយកូរ៉េខាងជើង។ ប៉ុន្តែសំណើនេះ ត្រូវបានច្រានចោលដោយលោកស្រី គីម ចាត់ទុកជាបំណងមិនសមរម្យ។ ការចេញពាក្យសម្តីឆ្លើយតបខ្លាំងៗរបស់កូរ៉េខាងត្បូងលើកនេះ ធ្វើឡើងបន្ទាប់ពីមានការប្រជុំបន្ទាន់ជា មួយក្រុមប្រឹក្សាសន្តិសុខជាតិ ដើម្បីវិភាគលើសេចក្តីថ្លែងការរបស់កូរ៉េខាងជើង៕
Tag:
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com