COVID-19
អន្តរជាតិ
ជប៉ុន នឹងបន្ធូរបម្រាមធ្វើដំណើរជាមួយថៃ វៀតណាម អូស្ដ្រាលី និងនូវែលសេឡង់ នាយករដ្ឋមន្ត្រីជប៉ុន ស៊ិនហ្សូ អាបេ (AFP)
× នាយករដ្ឋមន្ត្រី ស៊ិនហ្សូ អាបេ និយាយនៅថ្ងៃទី១៨ ខែមិថុនាថា ជប៉ុននឹងពន្លឿនកិច្ចពិភាក្សាដើម្បីបន្ធូរបម្រាមធ្វើដំណើរជាមួយវៀតណាម ថៃ អូស្ត្រាលី និងនូវែលសេឡង់។ ផែនការនេះ ធ្វើឡើងខណៈក្រុងតូក្យូផ្ដើមដើរចេញជាបណ្ដើរៗពីការរឹតត្បិតលើការធ្វើដំណើរដែលបានដាក់ចេញក្នុងគោលដៅទប់ស្កាត់ការរាលដាលជំងឺ COVID-19។
វិសាលភាពនៃការដកហូតបម្រាមធ្វើដំណើររបស់ជប៉ុន មិនអនុវត្តជាទូទៅឡើយ។ ពោលគឺមានតែធុរជនមកពីបណ្ដាប្រទេសទាំង៤នេះប៉ុណ្ណោះ ដែលនឹងត្រូវអនុញ្ញាតឲ្យចូលមកកាន់ប្រទេសជប៉ុន ប៉ុន្តែក៏តម្រូវឲ្យស្របតាមលក្ខខណ្ឌមួយផងដែរ គឺ ពួកគេត្រូវតែមានលទ្ធផលតេស្ត COVID-19 អវិជ្ជមាន ហើយត្រូវមានទុកទិន្នន័យ GSP ពួកគេលើកម្មវិធីទូរសព្ទឆ្លាតវៃដើម្បីជាជំនួយដល់ការតាមដាន (contact tracing) ។ នេះបើតាមការចុះផ្សាយរបស់ទីភ្នាក់ងារព័ត៌មាន Kyodo ។
បើពិភាក្សាជោគជ័យ នេះនឹងក្លាយជាជំហានដំបូងក្នុងការបើកដំណើរការឡើងវិញនៃការធ្វើដំណើរអន្តរជាតិរបស់ប្រទេសជប៉ុន។ ថ្លែងអំឡុងជំនួបមួយនៅមុខក្រុមការងារឆ្លើយតប COVID-19 របស់រដ្ឋាភិបាលជប៉ុន នាយករដ្ឋមន្ត្រី ស៊ិនហ្សូ អាបេ អះអាងថា៖«ប្រទេសទាំង៤ ត្រូវបានជ្រើសរើស ព្រោះពួកគេគ្រប់គ្រងស្ថានការណ៍ COVID-19 ជោគជ័យ»។ លោកសង្កត់ធ្ងន់ថា ការរឹតត្បិតលើការធ្វើដំណើរលើបណ្ដាប្រទេសដទៃនឹងត្រូវបន្ធូរបន្ថយ នាពេលក្រោយទៀតនៅពេលស្ថានការណ៍ COVID-19 ធូរស្រាលកាន់តែខ្លាំង។
ទោះជាយ៉ាងណា ការបន្ធូរបន្ថយបែបនេះ មិនមានន័យថា អ្នកធ្វើដំណើរបរទេសទាំងអស់ដែលមកដល់ជប៉ុនពីអូស្ត្រាលី នូវែលសេឡង់ ថៃ ឬវៀតណាម នឹងត្រូវអនុញ្ញាតឲ្យចូលឡើយ។ បើតាមលោក អាបេ មានតែជនជាតិនៃប្រទេសទាំង៤នោះប៉ុណ្ណោះដែលអាចធ្វើដំណើរទៅមករវាងប្រទេសកំណើតពួកគេនិងប្រទេសជប៉ុនបាន។
បើតាម Kyodo ធុរជន បុគ្គលិកបច្ចេកទេស និងអ្នកដែលចូលរួមកម្មវិធីហ្វឹកហាត់បច្ចេកទេសនានា នឹងទទួលបានការអនុញ្ញាត ខណៈសិស្សឬនិស្សិត នឹងត្រូវរង់ចាំយូរទៀត មុនពេលពួកគេអាចចូលប្រទេសជប៉ុនវិញ ហើយដូចគ្នាសម្រាប់ភ្ញៀវទេសចរដែរ។
សូមបញ្ជាក់ថា បច្ចុប្បន្ន ជប៉ុន ដាក់បម្រាមធ្វើដំណើរសម្រាប់ប្រទេសនិងតំបន់ចំនួន១១១ រួមមាន សហរដ្ឋអាមេរិក ហើយភាគច្រើននៅតំបន់អាស៊ីមានចិននិងកូរ៉េខាងត្បូង ក៏ដូចជាតំបន់អឺរ៉ុបទាំងមូល។
គិតត្រឹមថ្ងៃទី១៩ ខែមិថុនា ជប៉ុនមានករណីឆ្លងសរុប១៧ ៦៦៨ ក្នុងនោះជាសះស្បើយ ១៥៩៣០នាក់។ អ្នកស្លាប់មាន៩៣៥នាក់ ខណៈករណីឆ្លងនៅសល់សរុបមាន៨០៣ករណី។ នេះបើតាម worldometers ៕
Tag:
ជប៉ុន
វៀតណាម
អូស្ត្រាលី
នូវែលសេឡង់
COVID-19
© រក្សាសិទ្ធិដោយ thmeythmey.com