COVID-19
សង្គមអន្តរជាតិ
អន្តរជាតិ
តៃវ៉ាន់ រៀបចំការិយាល័យសម្រាប់ជួយអ្នកមានបំណងចាកចេញពីហុងកុង ពលរដ្ឋតៃវ៉ាន់ បង្ហាញការគាំទ្រដល់បាតុកម្មនៅហុងកុង។រូបភាពAFP
× កោះតៃវ៉ាន់ នៅថ្ងៃទី១៨ ខែមិថុនា បានលើកឡើងថា ខ្លួននឹងរៀបចំការិយាល័យមួយសម្រាប់ជួយអ្នកដែលមានបំណងចាកចេញពីហុងកុង ខណៈចិនកំពុងតែព្យាយាមបន្តឹងការគ្រប់គ្រងលើដែនដីពាក់កណ្តាលស្វយ័តមួយនេះ។ ជារឿយៗ តៃវ៉ាន់តែងបង្ហាញសមានចិត្តរបស់ខ្លួនចំពោះហុងកុង ពិសេសសកម្មជនប្រជាធិបតេយ្យដែលចង់រត់គេចពីការទុក្ខបុកម្នេញពីសំណាក់រដ្ឋាភិបាល។
ក្រុមប្រឹក្សាកិច្ចការចិនដីគោក(MAC) ដែលជាស្ថាប័នស្រាវជ្រាវគោលនយោបាយរបស់តៃវ៉ាន់បានលើកឡើងថា ការិយាល័យដែលនឹងបង្កើតឡើងនៅពេលខាងមុខ មានគោលបំណងជាក់លាក់មួយ ដោយផ្តល់ជំនួយមនុស្សធម៍ និងការថែទាំ ចំពោះពលរដ្ឋដែលមានបំណងចាកចេញពីហុងកុង។ ប៉ុន្តែពលរដ្ឋហុងកុងទាំងនោះត្រូវគោរពលក្ខខណ្ឌជាមុនថា នឹងការពារសន្តិសុខជាតិតៃវ៉ាន់។
ការិយាល័យថ្មីនេះ នឹងបង្កើនសេវាដែលមានស្រាប់រួមមានអន្តោប្រវេសន៍ ទិដ្ឋាការសម្រាប់ការងារ និងធ្វើការសម្រាប់ពលរដ្ឋហុងកុង និងបង្ហាញការគាំទ្ររបស់តៃវ៉ាន់ទៅកាន់ហុងកុងលើបញ្ហាប្រជាធិបតេយ្យ សេរីភាព និងសិទ្ធិមនុស្ស។ នេះបើតាមទីភ្នាក់ងារព័ត៌មាន Reuters ។ ការិយាល័យនេះ នឹងចាប់ផ្តើមបើកដំណើរការ នៅថ្ងៃទី១ ខែកក្កដា ឆ្នាំ២០២០ ដែលជាខួបអង់គ្លេសបានប្រគល់ហុងកុង មកឲ្យស្ថិតក្រោមការត្រួតត្រារបស់ចិននៅឆ្នាំ១៩៩៧ ជាមួយនឹងការសន្យាថា នឹងផ្តល់សេរីភាពយ៉ាងទូលំទូលាយ ក្រោមការគ្រប់គ្រងបែបប្រទេសមួយប្រព័ន្ធពីរ។
គិតមកដល់ពេលនេះ មានពលរដ្ឋហុងកុងជាង២០០នាក់បានចាកចេញមករស់នៅតៃវ៉ាន់តាំងតែបាតុកម្មបានផ្ទុះឡើងកាលពីឆ្នាំមុន។ ក្នុងនោះ មាន១០ភាគរយទទួលបានទិដ្ឋាការក្រោមច្បាប់ហុងកុងដែលការពារអ្នកប្រឈមនឹងគ្រោះថ្នាក់ដោយសារហេតុផលនយោបាយ។ នេះដោយយោងតាមសមាគមតៃវ៉ាន់ដើម្បីសិទ្ធិមនុស្ស។
បើទោះជាការិយាល័យ នឹងត្រូវបើកនាពេលខាងដ៏ខ្លីនេះក្តី ក៏គេពុំទាន់អាចឃើញមានមនុស្សច្រើនអាចចូលតៃវ៉ាន់ដែរ ត្បិតអីដែនកោះមួយនេះកំពុងបិទព្រំដែនដើម្បីការពារជំងឺCOVID-19។ ក្រៅតែពីនេះមន្ត្រីរដ្ឋាភិបាលតៃវ៉ាន់ ក៏បង្ហាញការបារម្ភផងដែរ ថាខ្លួនមិនអាចចាត់ចែងចំនួនពលរដ្ឋហុងកុងដ៏ច្រើន ដោយសារតែមានពិសោធន៍តិចតួចលើការដោះស្រាយបញ្ហាជនភៀសខ្លួន ឫជនស្វែងរកសិទ្ធជ្រកកោន។
កាលពីខែមុន លោកស្រីប្រធានាធិបតី Tsai Ing-wen បានសន្យាថា នឹងចេញវិធានការដើម្បីជួយពលរដ្ឋហុងកុង ឲ្យចាកចេញពីការគាបសង្កត់របស់ប៉េកាំងដូចជាគម្រោងច្បាប់សន្តិសុខ ដែលត្រូវបានគេមើលឃើញថាប៉ះពាល់ដល់ប្រជាធិបតេយ្យ។ ជាការតបចិន បានថ្កោលទោសលោកស្រី Tsai ចំពោះការសន្យាជួយពលរដ្ឋហុងកុង ក៏ដូចជាបដិសេធការជ្រៀតជ្រែកធ្វើឲ្យប៉ះពាល់ដល់ប្រជាធិបតេយ្យនៅហុងកុង៕
© រក្សាសិទ្ធិដោយ thmeythmey.com