រថយន្ត
អន្តរជាតិ
កម្មវិធីទូរសព្ទដៃ នឹងត្រូវបានប្រើប្រាស់ជំនួសសោររថយន្ត?
× ក្រុមហ៊ុន Apple និង BMW កំពុងសហការគ្នាលើការអភិវឌ្ឍបច្ចេកវិទ្យា ដើម្បីឲ្យអ្នកប្រើប្រាស់ iPhone អាចបញ្ជាទូរសព្ទជំនួសសោររថយន្តបាន។ ប៉ុន្តែលោក Alain McKenna អ្នកកាសែតកាណាដា និងជាអ្នកជំនាញផ្នែកវិទ្យាសាស្ត្រ និងបច្ចេកវិទ្យា វាយតម្លៃថា គម្រោងការណ៍នេះ ត្រូវតែធ្វើឲ្យបានល្អឥតខ្ចោះ ដើម្បីជៀសវាងការបង្កបញ្ហាបន្ថែមសម្រាប់អ្នកប្រើប្រាស់។
«ការដំឡើងកម្មវិធីបច្ចេកវិទ្យាផ្សេងៗនាពេលបច្ចុប្បន្ននេះ ហាក់ដូចមិនឆ្លើយតបនឹងតម្រូវការចាំបាច់នោះឡើយ»។ នេះជាការលើកឡើងរបស់លោក Alain McKenna សហអ្នកនិពន្ធទស្សនាវដ្តីកាណាដា Annuel de l’Automobile ជុំវិញគម្រោងការអភិវឌ្ឍបច្ចេកវិទ្យាទូរសព្ទដៃជំនួសសោររថយន្ត។
លោកទទួលស្គាល់ថា បច្ចេកវិទ្យាផ្សេងៗ បង្ហាញពីភាពឆ្លាតវៃក្នុងការច្នៃប្រឌិត ដោយអ្នកបើកបររថយន្តអាចប្រើប្រាស់ទូរសព្ទចាក់សោររថយន្តជំនួសបាននៅពេលដែលពួកគាត់ភ្លេចសោរ។ ប៉ុន្តែទោះបីជាយ៉ាងណាក៏ដោយ អ្នកជំនាញរូបនេះ មើលឃើញថា វាអាចបង្កបញ្ហាកាន់ខ្ពស់ផ្នែកសុវត្ថិភាព ប្រសិនបើមិនធ្វើឲ្យបានស្តង់ដាខ្ពស់ទេនោះ។
ដូចជាការបំពាក់បច្ចេកវិទ្យាផ្សេងៗកន្លងមកក្នុងរថយន្ត លោក McKenna ក៏បានមើលឃើញផងដែរថា ផែនការរបស់ Apple និង BMW ច្បាស់ជានឹងមិនបង្កភាពស្មុគ្រស្មាញនោះដែរ ហើយអាចកែប្រែទម្លាប់មនុស្សដែលធ្លាក់តែដាក់សោររថយន្តក្នុងហោប៉ៅ ទៅប្រើប្រាស់កម្មវិធីក្នុងទូរសព្ទដៃជំនួសវិញ។
ប៉ុន្តែជាមួយគ្នានោះ លោកលើកឡើងពីចំណុចអវិជ្ជមានដ៏ធំមួយ គឺការពឹងផ្អែកទាំងស្រុងទៅលើក្រុមហ៊ុន Apple ដូច្នេះមានន័យថា អ្នកបើករថយន្តមិនអាចផ្លាស់ប្តូរម៉ាកទូរសព្ទបាននោះឡើយ នៅពេលដែលពួកគាត់ទាញយកកម្មវិធីសោររថយន្តនោះទៅប្រើប្រាស់៕
© រក្សាសិទ្ធិដោយ thmeythmey.com