សង្គមអន្តរជាតិ
អន្តរជាតិ
ចូលធរមានភ្លាម ប៉ូលិសហុងកុង ចាប់ខ្លួនបុរសម្នាក់ក្រោមច្បាប់សន្តិសុខជាតិ
ប៉ូលិសហុងកុងត្រួតពិនិត្យបាតុករក្នុងការតវ៉ាថ្ងៃទី១ ខែកក្កដា។ រូបភាព AFP
×![]()
ដោយ: តន ចាន់រិទ្ធារ៉ា
បាតុកម្មបានផ្ទុះឡើងនៅទីក្រុងហុងកុងនៅថ្ងៃទី១ ខែកក្កដា ដើម្បីរំឭកដល់ថ្ងៃអង់គ្លេសប្រគល់ហុងកុងឲ្យចិន ក៏ដូចជាតវ៉ានឹងច្បាប់សន្តិសុខជាតិដែលត្រូវបានអនុម័តនៅមុននេះមួយថ្ងៃ។ ប៉ូលិសហុងកុងបានប្រើកាណុងបាញ់ទឹក និងម្សៅម្រេចដើម្បីបំបែកហ្វូងបាតុករ ដែលជួបជុំដោយខុសច្បាប់ ហើយក៏ព្រមានក្រុមបាតុករផងដែរ។ នៅថ្ងៃដដែលនេះ បុរសម្នាក់ក៏ត្រូវបានចាប់ខ្លួនក្រោមច្បាប់សន្តិសុខជាតិដែលទើបចូលជាធរមាន។
ការជួបជុំនៅហុងកុងនៅថ្ងៃទី១ ខែកក្កដា ជាទម្លាប់មួយដើម្បីរំឭកដល់ការផ្ទេរសិទ្ធិគ្រប់គ្រង់ទីក្រុងមួយនេះពីអង់គ្លេសទៅចិនកាលពីថ្ងៃទី១ ខែកក្កដា ឆ្នាំ១៩៩៧ ។ ប៉ុន្តែបាតុកម្មពេលនេះ គឺជាលើកទីមួយក្រោយការចូលធរមានច្បាប់សន្តិសុខជាតិដែលទីក្រុងប៉េកាំងតាក់តែងឡើងសម្រាប់អនុវត្តនៅហុងកុង។
មិនយូរប៉ុន្មានក្រោយការចូលធរមានរបស់ច្បាប់ដ៏ចម្រូងចម្រាស និងរងការរិះគន់យ៉ាងខ្លាំង ប៉ូលិសហុងកុង ក៏បានចាប់ខ្លួនបុរសម្នាក់ក្រោមច្បាប់នេះ ដែលនេះករណីដំបូងបំផុត។ ប៉ូលិសហុងកុងបានសរសេរក្នុង Twitter របស់ខ្លួនថា៖ «បុរសម្នាក់ត្រូវបានចាប់ខ្លួនព្រោះកាន់ទង់ឯករាជ្យរបស់ហុងកុងនៅតំបន់ Causeway Bay របស់ហុងកុង ដែលនេះជាការបំពានច្បាប់សន្តិសុខជាតិ។»
#BREAKING: A man was arrested for holding a #HKIndependence flag in #CausewayBay, Hong Kong, violating the #NationalSecurityLaw. This is the first arrest made since the law has come into force. pic.twitter.com/C0ezm3SGDm
— Hong Kong Police Force (@hkpoliceforce) July 1, 2020
ដោយផ្អែកទៅតាមច្បាប់សន្តិសុខជាតិហុងកុង បទល្មើសត្រូវបានបែងចែកជាបួនធំៗ គឺវិទ្ធង្សនាប្រឆាំងអំណាចរដ្ឋ ការធ្វើអបគមន៍ សកម្មភាពភេរវកម្ម និងការសមគំនិតជាមួយបរទេសដែលបណ្តាលឲ្យមានការបំផ្លាញដល់សន្តិសុខជាតិនៅហុងកុង។ រាល់ជនល្មើសនៃបទល្មើសខាងលើនេះ នឹងត្រូវផ្តន្ទាទោសដាក់ពន្ធនាគាររហូតដល់ ១ជីវិត ឬច្រើនជាង ១០ឆ្នាំ ឬតិចជាង ៣ឆ្នាំ ដោយផ្អែកទៅលើស្ថានទម្ងន់ទោសនីមួយៗ។
ដោយឡែកក្នុងបាតុកម្មដែលចូលរួមដោយមនុស្សរាប់ពាន់វិញ ការប៉ះទង្គិចរវាងប៉ូលិស និងបាតុករក៏កើតមាន ដោយប៉ូលិសបានប្រើប្រាស់ឡានបាញ់ទឹក ក៏ដូចជាបាញ់ម្សៅម្រេចដើម្បីបំបែកការប្រមូលផ្ដុំខុសច្បាប់។ បើតាមកាសែតហុងកុង South China Morning Post មនុស្សយ៉ាងហោចណាស់៧០នាក់ ត្រូវបានឃាត់ខ្លួនគិតត្រឹមរសៀលថ្ងៃទី១ ខែកក្កដា ដោយក្នុងនោះក៏មានអ្នកជាប់សង្ស័យថា បានបំពានច្បាប់ថ្មីផងដែរ។
ជាមួយគ្នានេះ ប៉ូលិសហុងកុង ក៏បានបញ្ចេញសារព្រមានទៅកាន់បាតុករដែលស្រែកគាំទ្រឯករាជ្យផងដែរ។ ការស្រែកច្រៀង ការបង្ហាញផ្ទាំងបដា ឬសកម្មភាពផ្សេងៗជាមួយចេតនាផ្ដាច់ខ្លួន ឬវិទ្ធង្សនា សុទ្ធតែអាចមានទោសក្រោមច្បាប់នេះ។ នេះជាការព្រមានរបស់ប៉ូលិសទៅកាន់បាតុករ៕
Tag:
ចិន
ហុងកុង
© រក្សាសិទ្ធិដោយ thmeythmey.com
