នៅថ្ងៃចន្ទ ទី២៩ ខែមិថុនា ឆ្នាំ២០២០ គណៈកម្មការកិច្ចការសង្គម របស់មជ្ឈមណ្ឌលអូស្ត្រាលីសំរាប់ការបណ្តុះបណ្តាល (សាលា ACE) ដែលដឹកនាំដោយលោក ម៉ៅ ស្រេង អគ្គនាយកស្ថាប័ន IDP និងសាលា ACE បានជួបសំណេះសំណាល ជាមួយ លោក ឈឹម កាន អភិបាលរងខេត្តមណ្ឌលគិរី ដើម្បីពិភាក្សាពីគម្រោងប្រារព្ធកម្មវិធី រត់ដើម្បីបរិស្ថាន (ACE Annual Fun Run for the Environment) នៅខេត្តមណ្ឌលគិរី នៅចុងខែធ្នូ ឆ្នាំ២០២០នេះ។ កម្មវិធីដែលធ្វើឡើងជារៀងរាល់ឆ្នាំនេះ សង្ឃឹមថា អាចធ្វើទៅបានដោយជោគជ័យ ដោយមានវិធានការទាក់ទងនឹងការការពារជំងឺកូវីដ-១៩ អាស្រ័យទៅលើស្ថានភាពជាក់ស្តែង នៃជំងឺរាតត្បាតនេះនៅពេលនោះ តាមការណែនាំរបស់មន្ទីរសុខាភិបាលខេត្ត ក៏ដូចជាក្រសួងសុខាភិបាល។
នៅក្នុងការសំណេះសំណាលនេះ ក៏មានវត្តមាន និងការចូលរួមយោបល់ សំដៅជំរុញឲ្យកម្មវិធីសប្បុរសធម៌នេះ ទទួលបានជោគជ័យដូចឆ្នាំមុនៗ ពីថ្នាក់ដឹកនាំមន្ទីរពាក់ព័ន្ធ ដូចជា មន្ទីរបរិស្ថាន សុខាភិបាល ទេសចរណ៍ រដ្ឋបាលព្រៃឈើ មន្ទីរអប់រំ យុវជន និង កីឡា និង សាលាក្រុងសែនមនោរម្យ។
គួរបញ្ជាក់ផងដែរថា សាលា ACE ត្រូវបានបង្កើតឡើងដោយ ស្ថាប័ន IDP Education និង ផ្តល់នូវការបណ្តុះបណ្តាលភាសាអង់គ្លេស ដែលមានគុណភាពក្នុងប្រទេសកម្ពុជា តាំងពីឆ្នាំ១៩៩២។ ស្ថាប័ន IDP Education ត្រូវបានបង្កើតឡើងដោយរដ្ឋាភិបាលអូស្ត្រាលី នៅឆ្នាំ ១៩៦៩ ហើយបច្ចុប្បន្នមានការិយាល័យជាង១០០ នៅក្នុងជាង៣០ប្រទេស ទូទាំងពិភពលោក។ ជារៀងរាល់ឆ្នាំ សិស្ស និសិត្ស អាណាព្យាបាល និង បុគ្គលិកសាលា ACE រៀបចំកម្មវិធីសប្បុរសធម៌នានា ដែលជាផ្នែកមួយនៃកិច្ចការសង្គមរបស់សាលា ដោយផ្តោតលើវិស័យអប់រំ សុខាភិបាល និងអនាម័យ បរិស្ថាន និង គ្រោះមហន្តរាយ។
គណៈកម្មការសង្គមសាលា ACE ជួបសំណេះសំណាលជាមួយរដ្ឋបាល ព្រមទាំងថ្នាក់ដឹកនាំមន្ទីរពាក់ព័ន្ធខេត្តមណ្ឌលគិរី
ចាប់តាំងពីឆ្នាំ២០១៦មក កម្មវិធី រត់ដើម្បីបរិស្ថាន ត្រូវបានប្រារព្ធឡើងជារៀងរាល់ឆ្នាំ ដោយគណៈកម្មការកិច្ចការសង្គមសាលា ACE ដោយមានការគាំទ្រ និងចូលរួមរៀបចំពីក្រសួងអប់រំ យុវជន និងកីឡា ក្រសួងបរិស្ថាន រដ្ឋបាលខេត្តក្រុង និងស្ថាប័នពាក់ព័ន្ធដោយមានអ្នកចូលរួមប្រហែល ២០០០នាក់ក្នុងមួយឆ្នាំៗ ចូលរួមគ្នាបង្កើនចំណេះដឹង និងសារៈសំខាន់នៃអនាម័យផ្ទាល់ខ្លួន កីឡា និងបរិស្ថាន។ ថវិកាដែលទទួលបានពីការចូលរួម គឺយកទៅប្រើប្រាស់ទាំងស្រុង ក្នុងកិច្ចការសប្បុរសធម៌នានា ដូចជាការបរិច្ចាគថវិកាជូនមន្ទីរពេទ្យគន្ធបុប្ផា អង្គការដើម្បីភាពញញឹមនៃកុមារ ការបរិច្ចាគធុងសំរាម និងការសង់បង្គន់អនាម័យ ជូនសាលាតាមបណ្តាខេត្ត។
តាំងនាមឲ្យគណៈអភិបាលខេត្តមណ្ឌលគិរី លោកអភិបាលរង ឈឹម កាន បានសំដែងក្តីសោមនស្ស និងការគាំទ្រ ខណៈកម្មវិធីដ៏សំខាន់នេះ កាន់តែជួយជំរុញឲ្យមានការស្រលាញ់ និងថែរក្សាបរិស្ថានក្នុងស្រទាប់យុវវ័យ និងប្រជាពលរដ្ឋទូទៅ។ លោកក៏បានស្តាប់នូវយោបល់នានា ក្នុងអង្គប្រជុំ និងផ្តាំផ្ញើដល់មន្ទីរ និងស្ថាប័ននានាចំណុះឲ្យខេត្ត បន្តពិភាក្សាលើការរៀបចំកម្មវិធីនេះ ជាមួយក្រុមការងារសាលា ACEជាបន្តទៀត។
លោក ម៉ៅ ស្រេង បានថ្លែងអំណរគុណចំពោះការគាំទ្រ និងចូលរួម របស់អាជ្ញាធរខេត្ត ហើយលោកសង្ឃឹមថា កម្មវិធីនេះ ក៏នឹងជួយឲ្យមានអ្នកទេសចរ កាន់តែច្រើនចាប់អារម្មណ៍ទៅកម្សាន្ត នៅខេត្តមណ្ឌលគិរី ដែលមានទេសភាព អាកាសធាតុ និងធម្មជាតិដ៏ស្រស់ត្រកាលនេះផងដែរ។
លោកស្រី ជា ចិន្តាមុនី និងកញ្ញា ម៉ម ជូលីណា ដែលតំណាងឲ្យគណៈកម្មការកិច្ចការសង្គមបានលើកឡើងថា៖«ពួកយើងរំពឹងទុក នូវការចូលរួមយ៉ាងសកម្ម ពីសំណាក់បងប្អូនប្រជាជន ដូចពីឆ្នាំមុនៗដែរ ហើយសង្ឃឹមថា ស្ថានភាពជំងឺកូវីដ-១៩ នឹងមានភាពប្រសើរឡើង តាមរយៈវិធានការដ៏មានប្រសិទ្ធភាពទាំងឡាយ របស់រាជរដ្ឋាភិបាល និងការការពារខ្លួនដោយខ្ជាប់ខ្ជួនរបស់យើងគ្រប់ៗគ្នា»។
កម្មវិធីរត់ដើម្បីបរិស្ថានលើកទី២ ឆ្នាំ២០១៧ នៅកីឡដ្ឋានជាតិអូឡាំពិក ដែលមានអ្នកចូលរួមជាង ២០០០នាក់
កម្មវិធីរត់ដើម្បីបរិស្ថានលើកទី៣ ក្នុងឆ្នាំ២០១៨ នៅកោះពេជ្រដែលមានអ្នកចូលរួមជាង២០០០នាក់
កម្មវិធីរត់ដើម្បីបរិស្ថានលើកទី៤ ក្នុងឆ្នាំ២០១៩ នៅក្រុងបាត់ដំបង ដែលមានអ្នកចូលរួមជាង២៥០០នាក់
(អត្ថបទពាណិជ្ជកម្ម)