ជាតិ
អាមេរិក នឹងបន្តទ្រទ្រង់ដោយឥតងាករេ លើសិទ្ធិមនុស្ស និងប្រជាធិបតេយ្យនៅកម្ពុជា
× ភ្នំពេញ ៖ រដ្ឋាភិបាលអាមេរិក នឹងបន្តទ្រទ្រង់លើសិទ្ធិមនុស្ស និងប្រជាធិបតេយ្យនៅកម្ពុជា ក្រៅពីវិស័យសំខាន់ៗជាអទិភាពផ្សេងទៀត។ ឯកអគ្គរដ្ឋទូតអាមេរិក លោក W. Patrick Murphy ថ្លែងបែបនេះ សម្រាប់ពិធីអបអរទិវាឯករាជ្យលើកទី២៤៤របស់អាមេរិក ថ្ងៃទី៤ កក្កដា ឆ្នាំ២០២០។
លោក W. Patrick Murphy បានបញ្ជាក់ថា នៅឆ្នាំ២០២០នេះ អាមេរិកផ្ដោតលើកិច្ចសហការយូរអង្វែងជាមួយកម្ពុជា លើវិស័យកសិកម្ម យុវជន អប់រំ ពាណិជ្ជកម្ម ដោះមីន សមភាពយែនឌឺរ ជាពិសេសគឺការទ្រទ្រង់ឥតងាករេ ចំពោះសិទ្ធិមនុស្ស និងលទ្ធិប្រជាធិបតេយ្យ។
«កម្ពុជាក៏ត្រូវការការកែលម្អថែមទៀតដែរ។ ក្តីសង្ឃឹមរបស់យើងគឺថា កម្ពុជាដែលមានវិបុលភាព ឯករាជ្យ និងលទ្ធិប្រជាធិបតេយ្យ មានភាំពល្អសម្រាប់តំបន់ ពិភពលោក និងមិត្តភាពយូរអង្វែងរបស់យើង»។ នេះជាការលើកឡើងរបស់ឯកអគ្គរដ្ឋទូតអាមេរិក។
លោកទូតរូបនេះ ក៏បានលើកពីលទ្ធផលវិជ្ជមាន ដែលកម្ពុជាទទួលបាន ក្រោយពីបញ្ចប់សង្គ្រាម ដូចជា គណនេយ្យភាព ការអភិវឌ្ឍ អាហារូបត្ថម្ភ សមាហរណកម្មតំបន់ ពាណិជ្ជកម្ម ជាពិសេសភាពជោគជ័យនៃការប្រឆាំងជំងឺកូវីដ-១៩ តាមរយៈការជួយគាំទ្ររបស់អាមេរិកដែរ ។ បើតាមលោក W. Patrick Murphy អាមេរិក បានផ្ដល់ប្រាក់ចំនួន១១លានដុល្លារ សម្រាប់ការឆ្លើយតបរបស់កម្ពុជា ចំពោះជំងឺកូវីដ-១៩ និងសម្រាប់ជួយដល់ការស្ដារសេដ្ឋកិច្ចឡើងវិញ។
លោក ប៉ាន សូរសក្តិ រដ្ឋមន្ត្រីក្រសួងពាណិជ្ជកម្ម ចាត់ទុកជំនួយគាំទ្ររបស់អាមេរិកនេះ មានសារសំខាន់ចំពោះការអភិវឌ្ឍវិស័យអប់រំ និងសង្គម ជាពិសេសសង្គមស៊ីវិល ដែលធ្វើកំពុងធ្វើការងារលើវិស័យទាំងនេះ។ «ការគាំទ្ររបស់អាមេរិកអង្គការសង្គមស៊ីវិលដែលធ្វើការលើរឿងរសើប ដូចជា សិទ្ធិមនុស្ស តម្លាភាព និងគណនេយ្យភាពសង្គម គឺសុទ្ធតែបានជួយបំពេញបន្ថែមដល់ការអនុវត្ត និងកិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការលើកកម្ពស់ការអភិវឌ្ឍប្រកបដោយចីរភាព និងបរិយាបន្ន»។ នេះជាការបញ្ជាក់របស់រដ្ឋមន្ត្រីក្រសួងពាណិជ្ជកម្ម។
កិច្ចសហការ និងការជួយគ្នា វាតែងតែមានផលប្រយោជន៍ទៅវិញទៅមក។ សហរដ្ឋអាមេរិក ក៏ទទួលបានផលប្រយោជន៍ផងដែរ ពីជំនួយរបស់កម្ពុជា ក្នុងការរុករកទាហានអាមេរិកបាត់ខ្លួននៅក្នុងសង្គ្រាមឥណ្ឌូចិន និងការរួមចំណែករបស់កម្ពុជា ចំពោះការថែរក្សាសន្តិសុខក្រោមឆ័ត្រនៃអង្គការសហប្រជាជាតិ។
ឯកអគ្គរដ្ឋទូតអាមេរិក បានបញ្ជាក់ដូច្នេះថា៖«យើងសង្ឃឹមថា យើងអាចបន្តជួយកម្ពុជាទទួលបានជោគជ័យថែមទៀត ដូចជាក្នុងផ្នែកអភិបាលកិច្ច នីតិរដ្ឋដែលក្នុងនោះសំឡេងទាំងអស់ត្រូវបានគេស្ដាប់។ ដូចកាលពី៧០ឆ្នាំមុនដែរ ប្រជាជនអាមេរិកមានការប្ដេជ្ញាក្នុងការចង់ឱ្យកម្ពុជាមានប្រជាជន ដែលមានសុខភាពល្អ មានវិបុលភាព និងឯករាជ្យ»។
បើតាមលោកទូត ចាប់ពីឆ្នាំ១៩៥០មក សហរដ្ឋអាមេរិកបានចូលរួមជាមួយរដ្ឋាភិបាលកម្ពុជាស្ទើរគ្រប់វិស័យ រាប់ចាប់ពីវិស័យពាណិជ្ជកម្ម ការវិនិយោគ ការអប់រំ បរិស្ថាន កសិកម្ម សុខភាពសាធារណ សិទ្ធិមនុស្ស និងគម្រោងសាងសង់ផ្លូវជាតិលេខ៤ជាដើម។ តាមការបញ្ជាក់ពីលោកទូត មកដល់បច្ចុប្បន្ន រដ្ឋាភិបាលសហរដ្ឋអាមេរិក បានផ្តល់ជំនួយដល់កម្ពុជាមានទឹកប្រាក់ប្រមាណជាង ២ពាន់លានដុល្លារសហរដ្ឋអាមេរិក៕
© រក្សាសិទ្ធិដោយ thmeythmey.com