ជាតិ
សង្គមជាតិ
សម្ដេច ហ៊ុន សែន ៖ ពេលនេះជាពេលត្រូវវះកាត់រឿងជម្លោះដីធ្លីហើយ
× ភ្នំពេញ៖ សម្ដេច ហ៊ុន សែន ប្រកាសឱ្យអនុវត្តវិធានការដោះស្រាយ និងទប់ស្កាត់បញ្ហាជម្លោះដីធ្លី កុំឱ្យមានកើតឡើងទៀត។ សម្ដេច ប្រកាសនៅក្នុងសម័យប្រជុំគណរដ្ឋមន្ត្រី ថ្ងៃទី ៣ កក្កដា ២០២០។
«រឿងដីធ្លីត្រូវតែជម្រះគ្នាម្តង» ។ នេះជាការបញ្ជាក់របស់សម្ដេច ហ៊ុន សែន ដែលបានលើកយកបញ្ហាដីធ្លី នៅក្នុងស្រុកគាស់ក្រឡ ខេត្តបាត់ដំបង មកអធិប្បាយនៅក្នុងកិច្ចប្រជុំគណរដ្ឋមន្ត្រីនេះ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ដែលបានចូលរួមកិច្ចប្រជុំនេះ បានស្រង់ប្រសាសន៍លោកនាយករដ្ឋមន្ត្រី មកសរសេរលើហ្វេសប៊ុកដូច្នេះថា៖«ពេលនេះ ជាពេលដែលត្រូវធ្វើការវះកាត់ហើយ»។
ទាក់ទងនឹងបញ្ហាដីធ្លីនៅស្រុកគាស់ក្រឡនេះ ប្រមុខរដ្ឋាភិបាល ក៏បានបញ្ចប់មុខតំណែងលោក ម៉ៅ សុចាន់ ពីអភិបាលនៃគណៈអភិបាល ស្រុកគាស់ក្រឡ ខេត្តបាត់ដំបង ឲ្យមកបម្រើការងារនៅសាលាខេត្តបាត់ដំបង កាលពីថ្ងៃទី២៧ មិថុនាដែរ។ ការដកតំណែងលោក ម៉ៅ សុចាន់ អភិបាលស្រុកគាស់ក្រឡនេះ ធ្វើឡើងក្រោយលោក ជាប់គុបគិតជាមួយលោកឧកញា សង ថន ពាក់ព័ន្ធនឹងរឿងវិវាទដីធ្លីជាមួយពលរដ្ឋ៤គ្រួសារ ដែលត្រូវបានក្រុមការងារថ្នាក់ជាតិចុះស្រាវជ្រាវរកឃើញ៕
© រក្សាសិទ្ធិដោយ thmeythmey.com