COVID-19
អន្តរជាតិ
អ្នកវិទ្យាសាស្ត្រប្រាប់ WHO ថា COVID-19 អាចឆ្លងតាមខ្យល់ និងសុំឲ្យកែប្រែការណែនាំរបស់ខ្លួន
បុគ្គលិកពេទ្យពាក់ម៉ាស់ការពារវីរ៉ុសCOVID-19។ រូបតំណាង។ រូបភាព AFP
×![]()
អ្នកវិទ្យាសាស្ត្ររាប់រយនាក់ បានអះអាងថា មានភស្តុតាងបញ្ជាក់ថា ភាគល្អិតតូចៗក្នុងខ្យល់របស់ជំងឺ COVID-19 អាចចម្លងដល់មនុស្សបាន។ ក្រុមអ្នកវិទ្យាសាស្ត្រនេះ បានអំពាវនាវឲ្យអង្គការសុខភាពពិភពលោក(WHO) កែប្រែអនុសាសន៍របស់ខ្លួនទាក់ទងនឹងការបង្ការជំងឺ COVID-19 ។ នេះបើយោងតាមទីភ្នាក់ងារព័ត៌មាន Reuters។
នៅក្នុងលិខិតចំហទៅកាន់ WHO អ្នកវិទ្យាសាស្ត្រចំនួន២៣៩នាក់ មកពី៣២ប្រទេសបង្ហាញភស្តុតាងថាភាគល្អិតតូចៗដែលនៅក្នុងខ្យល់អាចចម្លង COVID-19 បាន។ ក្រុមអ្នកវិទ្យាសាស្ត្រខាងលើក៏គ្រោងនឹង ចេញផ្សាយការរកឃើញរបស់ខ្លួននេះក្នុងទស្សនាវដ្ដីវិទ្យាសាស្ត្រផងដែរ។
ក្រុមអ្នកវិទ្យាសាស្ត្រខាងលើបានអះអាងថា វីរុសជំងឺ COVID-19 ដែលចេញតាមការកណ្តាស់ ឬតំណក់ទឹកតូចៗនៅពេលដកដង្ហើមចេញដែលខ្ទាតពាសពេញបន្ទប់ អាចធ្វើដំណើរតាមខ្យល់ និងចម្លងមនុស្សដទៃនៅពេលដកដង្ហើមបាន។ ការរកឃើញនេះ ហាក់ផ្ទុយពីការណែនាំរបស់ WHO
ក្នុងអនុសាសន៍របស់ខ្លួន WHO បានបង្ហាញថា ជំងឺ COVID-19 ឆ្លងពីមនុស្សម្នាក់ទៅមនុស្សម្នាក់ទៀតតាមរយៈតំណក់ទឹកដែលខ្ទាតចេញពីច្រមុះ ឬមាត់នៅពេលអ្នកផ្ទុកជំងឺ COVID-19 និយាយ ក្អក ឬកណ្តាស់ ក៏ដូចជាការប៉ះពាល់ផ្ទាល់។
ទោះជាមានយ៉ាងណាក្តី WHO បានប្រាប់ទីសារព័ត៌មាន New York Times ថា ភស្តុតាងដែលបង្ហាញថា ជំងឺ COVID-19 ឆ្លងតាមខ្យល់មិនអាចជឿជាក់បាន។ លោកវេជ្ជបណ្ឌិត Benedetta Allegranzi អ្នកដឹកនាំបច្ចេកទេសផ្នែកគ្រប់គ្រង និងបង្ការជំងឺឆ្លងរបស់ WHO បាននិយាយថា ៖« ជាពិសេសក្នុងប៉ុន្មានខែចុងក្រោយនេះ យើងបានបញ្ជាក់ជាច្រើនលើកហើយថា នឹងពិចារណាពីលទ្ធភាពនៃការឆ្លងតាមខ្យល់ ប៉ុន្តែជាក់ស្តែងពុំមានភស្តុតាងរឹងមាំ ឬជាក់លាក់ដើម្បីគាំទ្រឡើយ»។
គិតត្រឹមថ្ងៃទី៦ ខែកក្កដា អ្នកឆ្លងជំងឺ COVID-19 មានចំនួនជាង១១លាននាក់ និងស្លាប់ចំនួនជាង៥២ម៉ឺននាក់ រីឯអ្នកជាសះស្បើយមានចំនួន៦,១លាននាក់។ អាមេរិកតែឯងមានករណីឆ្លងចំនួន ៥,៧លាននាក់ ខណៈអឺរ៉ុបមានចំនួន២,៧លាននាក់។ នេះយោងតាមទិន្ន័យរបស់ WHO៕
© រក្សាសិទ្ធិដោយ thmeythmey.com
