អូស្ត្រាលី អាចខាតបង់សេដ្ឋកិច្ច៧០០លានដុល្លារក្នុងមួយសប្តាហ៍ ដោយសារការរឹតត្បិតរដ្ឋ Victoria

COVID-19

អន្តរជាតិ

អូស្ត្រាលី អាចខាតបង់សេដ្ឋកិច្ច៧០០លានដុល្លារក្នុងមួយសប្តាហ៍ ដោយសារការរឹតត្បិតរដ្ឋ Victoria

08, Jul 2020 , 8:19 pm

រូបភាព

រដ្ឋមន្រ្តីរតនាគារអូស្រ្តាលី លោក josh frydenberg។ រូបភាព៖ AAP

ដោយ: ធៀន ភារិន្ទ

អូស្ត្រាលី អាចនឹងខាតបង់សេដ្ឋកិច្ចរហូតដល់ ៧០០លានដុល្លារ ក្នុងមួយសប្តាហ៍ ដោយសារតែការរឹតត្បិតនៅក្នុងរដ្ឋ Victoria។ រដ្ឋមន្ត្រីរតនាគារជាតិអូស្ត្រាលី លោក Josh Frydenberg បានបញ្ជាក់បែបនេះ នៅថ្ងៃទី៨ ខែកក្កដា បន្ទាប់ពីការបិទព្រំដែនរវាងរដ្ឋVictoria និងNew South Wales បានចូលជាធរមាន។

ស្ថានភាពCOVID-19 បានហក់ឡើងយ៉ាងខ្លាំងនៅអូស្ត្រាលី។ នាថ្ងៃទី៧ ខែកក្កដា រដ្ឋVictoria បានរាយការណ៍ថា មានករណីឆ្លងថ្មីចំនួន១៩១ករណី ដែលជាចំនួនច្រើនជាងគេបំផុតចាប់តាំងពីផ្ទុះកូរូណាវីរុសនៅក្នុងប្រទេស។ ព្រំដែនរដ្ឋរវាងVictoria និង New South Wales ត្រូវបានបិទយ៉ាងតិច៦សប្ដាហ៍ដោយគិតពីយប់ថ្ងៃទី៧ ខែកក្កដា ខណៈការបិទក្រុង Melbourne និងក្រុង Mitchell Shire នៃរដ្ឋVictoria ដែលត្រូវនឹងចូលជាធរមាននៅម៉ោង១១: ៥៩យប់ ថ្ងៃទី៨ ខែកក្កដានេះ។

ក្រោមការរឹតត្បិត និងការបិទក្រុងនេះ ជំនួញមួយចំនួនដូចជា ហាងកាហ្វេ បារ ភោជនីយដ្ឋាន កន្លែងកាត់សក់ និងហាត់ប្រាណជាដើម នឹងត្រូវបិទ ហើយប្រជាជនប្រមាណ ៤,៩លាននាក់ នឹងត្រូវស្នាក់នៅផ្ទះ។ វានឹងធ្វើឲ្យខាតបង់សេដ្ឋកិច្ចប្រមាណ ៧០០រយលានដុល្លារក្នុងមួយសប្ដាហ៍ផងដែរ។ នេះបើតាមការបញ្ជាក់រដ្ឋមន្ត្រីរតនាគារជាតិអូស្ត្រាលី លោក Josh Frydenberg ដែលផ្សាយដោយសារព័ត៌មានអូស្ត្រាលី ABC ។ លោកបន្តថា ការខាតបង់មួយភាគធំ នឹងធ្លាក់លើជំនួញក្នុងរដ្ឋ Victoria ផ្ទាល់។

បើតាមការចុះផ្សាយរបស់ទីភ្នាក់ងារព័ត៌មាន Reuters ប្រជាជនដែនឆ្លងព្រំដែនរវាងរដ្ឋទាំងពីខាងលើ នឹងត្រូវពិន័យជាប្រាក់ប្រមាណ៧,៧០០ដុល្លារ និងជាប់ពន្ធនាគារ ៦ខែ។ ដើម្បីយាមល្បាតតាមព្រំដែនរវាងរដ្ឋ Victoria និងNew South Wales ឲ្យមានប្រសិទ្ធភាព អូស្ត្រាលីបានពង្រាយកម្លាំងប៉ូលិស និងយោធា ដោយមានបន្ថែមបច្ចេកវិទ្យាដូចជា ដ្រូនជាដើម។ យ៉ាងណាក៏ដោយ ប្រជាជនមួយចំនួន ដូចជាអ្នកធ្វើការ អាចចេញចូលរដ្ឋVictoria បាន។

គិតត្រឹមថ្ងៃទី៨ ខែកក្កដា អូស្ត្រាលីមានករណីCOVID-19 សរុបចំនួនជាង ៨ពាន់ករណី អ្នកស្លាប់មានជាង ១០០នាក់ និងអ្នកជាសះស្បើយមានជាង ៧ពាន់នាក់៕