ជាតិ
ជួរភ្នំក្រវាញ ប្រែក្លាយពីតំបន់ដែលរងការបំផ្លាញមកជាតំបន់ទេសចរណ៍ដ៏មានសក្ដានុពល
×![]()
ដោយ: ផាត ដាណេ
កោះកុង៖ ក្រោយពីរងការបំផ្លិចបំផ្លាញធនធានធម្មជាតិដូចជាការកាប់ព្រៃឈើ និងបរបាញ់សត្វពីសកម្មភាពប្រជាជនដើម្បីផ្គត់ផ្គង់ជីវភាពរស់នៅ តំបន់ជួរភ្នំក្រវាញ បានប្រែក្លាយមកជាតំបន់ដែលមានសក្ដានុពលលើវិស័យទេសចរណ៍នាពេលបច្ចុប្បន្ន។ តាមរយៈការជំរុញ ក៏ដូចជាទប់ស្កាត់ពីក្រសួងបរិស្ថាន និងអង្គការសម្ព័ន្ធមិត្តសត្វព្រៃ តំបន់នេះមានសន្ទុះខ្លាំងលើវិស័យទេសចរណ៍ ហើយប្រជាពលរដ្ឋដែលរស់នៅទីនោះស្ទើរតែទាំងស្រុងបានចូលរួមអភិរក្ស និងបោះបង់ចោលការបំផ្លាញធម្មជាតិ ហើយងាកមកពឹងផ្អែកលើវិស័យទេសចរណ៍វិញ។ 
តំបន់ជួរភ្នំក្រវាញមានទំហំ ១,៤លានហិចតា ដោយកន្លងមកប្រជាជនដែលរស់នៅទីនោះស្ទើរតែទាំងអស់ចិញ្ចឹមជីវិតដោយការបរបាញ់សត្វ និងកាប់ព្រៃឈើ សម្រាប់បរិភោគ និងធ្វើអាជីវកម្ម ដើម្បីផ្គត់ផ្គង់ជីវភាពរបស់ពួកគេ។ ក្រោយមកចាប់ពីឆ្នាំ២០០៤ អង្គការសម្ព័ន្ធមិត្តសត្វព្រៃ បានធ្វើការទប់ស្កាត់សកម្មភាពទាំងនោះ ដោយបានបង្វែរផ្នត់គំនិតពលរដ្ឋឲ្យងាកមកស្រឡាញ់និងចូលរួមអភិរក្សធនធានធម្មជាតិ ដែលវាក៏ជាកត្តាជម្រុញផ្នែកទេសចរណ៍ផងដែរ។ ក្នុងនោះក៏មានការចូលរួមសហការពីក្រសួងបរិសា្ថនថែមទៀតផង។
ទោះជាយ៉ាងនោះក្ដី ក៏នៅតែមានពលរដ្ឋមួយចំនួនតូចនៅតែលួចបរបាញ់សត្វព្រៃខុសច្បាប់ ដែលមន្ត្រីឧទ្យានុរក្សកំពុងធ្វើការហាមឃាត់ដើម្បីលុបបំបាត់ទាំងស្រុងទៅលើករណីនេះ។ រយៈពេល១៨ខែចុងក្រោយ គិតចាប់ពីខែមករា ឆ្នាំ២០១៩ ដល់ខែមិថុនា ឆ្នាំ២០២០នេះ ក្រុមការងារឧទ្យានុរក្សបានធ្វើការងារល្បាតយ៉ាងយកចិត្តទុកដាក់ ដោយបានចុះល្បាតចំនួន៦៥៤៥លើក ក្នុងចម្ងាយ ២៤៥០០០គម។ ក្នុងនោះដោះបានអន្ទាក់ចំនួន ៣២៣២២អន្ទាក់, រឹបអូសរណាយន្ដបាន ១៩៥៤គ្រឿង, រឹបអូសឈើខុសច្បាប់បានចំនួន ២១៧៨ ម៣ ចាប់បញ្ជូនជនសង្ស័យទៅតុលាការបាន ៨៧ នាក់ ចាប់ឃាត់មធ្យោបាយដឹកជញ្ជូនបាន ១០១៩ គ្រឿង និងបានទប់ស្កាត់ការរុកទានទន្ទ្រានយកដីរដ្ឋបានចំនួន ១៧២ករណីផងដែរ។ របស់ដែលរឹបរូសមកទាំងអស់នោះត្រូវបានយកមករក្សាទុកនៅស្នាក់ការល្បាតស្រែអំបិល និងស្នាក់ការល្បាតស្ទឹងព្រាត នៅឃុំជីផាត ស្រុកថ្មបាំង ខេត្តកោះកុង។
នៅក្នុងដំណើរទស្សនកិច្ចរយៈពេលពីរថ្ងៃ គឺថ្ងៃទី៩ និង១០ ខែកក្កដា ឆ្នាំ២០២០ សម្រាប់អ្នកយកព័ត៌មានធ្វើដំណើរទៅកាន់ព្រៃឈើតំបន់ជួរភ្នំក្រវាញ ដើម្បីទៅទស្សនាកម្មវិធីការពារព្រៃឈើតំបន់ជួរភ្នំក្រវាញ លោក នេត្រ ភក្រា អ្នកនាំពាក្យក្រសួងបរិស្ថានបានលើកឡើងថា៖ ក្រសួងបរិស្ថានបានរៀបចំផែនការបង្កើនជីវភាពប្រជាសហគមន៍មូលដ្ឋានដែលរស់នៅក្នុង និងជុំវិញតំបន់ការពារធម្មជាតិឲ្យរីកចម្រើនឡើងវិញតាមរយៈការជម្រុញឲ្យមានការបង្កើតការងារថ្មីក្នុងវិស័យទេសចរណ៍ធម្មជាតិនៅក្នុងតំបន់របស់ពួកគាត់៕
Tag:
ជួរភ្នំក្រវាញ
ខេត្តកោះកុង
© រក្សាសិទ្ធិដោយ thmeythmey.com
