អន្តរជាតិ
ចិន ប្រកាសអាសន្នទឹកជំនន់កម្រិតខ្ពស់នៅក្នុងខេត្តពីរ ទឹកជំនន់តាមបណ្តោយទន្លេយ៉ង់សេ។ រូបភាពAFP
× ចិន នៅថ្ងៃទី១២ ខែកក្កដា បានប្រកាសអាសន្នកម្រិតខ្ពស់លំដាប់ទីពីរក្នុងការឆ្លើយតបនឹងទឹកជំនន់ដែលហូរចេញយ៉ាងគំហុកពីទន្លេយ៉ង់សេ។ ការកើនឡើងកម្ពស់ទឹកនៃទន្លេយ៉ង់សេ បណ្តាលឲ្យតំបន់ភាគខាងកើតនៃខេត្តជាំងស៊ូ និងខេត្តជាំងស៊ី រងផលប៉ះពាល់ពីទឹកជំនន់ខ្លាំងជាងគេ។ នេះយោងតាមទីភ្នាក់ងារព័ត៌មានរដ្ឋចិន Xinhua។
នៅចិន ការប្រកាសអាសន្នក្នុងការឆ្លើយតបទៅនឹងទឹកជំនន់ត្រូវបានបែងចែកជាបួនកម្រិត ដែលកម្រិតទី១ជាកម្រិតធ្ងន់ធ្ងរបំផុត។ យោងតាមទិន្ន័យពីក្រសួងធនធានទឹកចិន កម្ពស់ទឹកនៅក្នុងទន្លេចំនួន២១២ បានកើនឡើងហួសពីកម្រិតប្រកាសអាសន្ននាដើមខែកក្កដា ក្នុងនោះកំពស់ទឹកក្នុងទន្លេចំនួន១៩ កើនដល់កម្ពស់មិនធ្លាប់មាន។
ទឹកជំនន់ក្នុងតំបន់ Poyang ខេត្តជាំងស៊ីបណ្តាលឲ្យកម្ពស់ទឹកក្នុងបឹង Poyang ដែលជាបឹងទឹកសាបធំជាងគេ កើនដល់២២,៥ម៉ែត្រ ដែលជាកម្ពស់មិនធ្លាប់មាន និងដែលលើសកម្ពស់១៩,៥ម៉ែត្រដែលជាកម្រិតប្រកាសអាសន្ន។ ជាមួយនឹងការប្រកាសអាសន្នកម្រិតទីពីរក្នុងខេត្ត Jiangxi គេប៉ាន់ស្មានថា នឹងមានគ្រោះមហន្តរាយបន្ថែមទៀតដូចជាការបាក់ទំនប់ ឬទឹកជំនន់ធ្ងន់ធ្ងរមិនធ្លាប់មានក្នុងទន្លេជាច្រើន។
ដើម្បីឆ្លើយតបទៅនឹងគ្រោះទឹកជំនន់នេះ អាជ្ញាធរយោធានៅតាមខេត្តបានបញ្ជូនទាហានរាប់ពាន់នាក់ឲ្យ ទៅជួយពង្រឹងច្រាំងប្រវែង៩គីឡូម៉ែត្រនៅជុំវិញមាត់បឹង ដើម្បីបង្ការការបាក់ច្រាំង ដែលនឹងអាចបណ្តាលឲ្យទឹកហូរចេញកាន់តែច្រើន។ ចំណែកឯ នៅតំបន់ជាំងចូវ នៃខេត្តជាំងស៊ី ឯណោះវិញ អាជ្ញាធរតំបន់ បានអំពាវនាវតាមរយៈបណ្តាញសង្គមឲ្យបុរសអាយុពី១៨ឆ្នាំទៅ៦០ឆ្នាំរួមគ្នាប្រយុទ្ធនឹងទឹកជំនន់ដោយទៅជួយពង្រឹងទំនប់។
ក្នុងពេលជាមួយគ្នានេះដែរ ទីក្រុងផ្សេងទៀតនៅតាមទន្លេយ៉ង់សេ ក៏បានប្រកាសកម្រិតអាសន្នរៀងៗខ្លួន ដោយសារកំណើនទឹកយ៉ាងខ្លាំង ក៏ដូចជាភ្លៀងឥតឈប់ឈរ ដែលបណ្តាលឲ្យបាក់ដី និងជន់លិចផ្លូវ និងស្រែចំការ។
ក្រៅតែការប្រកាសអាសន្នកម្រិតខ្ពស់លំដាប់ពី នៅខេត្ត Jiangsu និង Jiangxi នៅភាគខាងកើត ទីភ្នាក់ងារឧតុនិយមចិន ក៏បានព្យាករផងដែរពីព្យុះភ្លៀងនៅខេត្តស៊ីឈ័ន និងទីក្រុងចុងឈីង នៅភាគនារតីប្រទេស ខេត្តហ៊ូប៉ីនៅកណ្តាល និងខេត្តហ៊ូណាននៅខាងត្បូងប្រទេស៕
© រក្សាសិទ្ធិដោយ thmeythmey.com