អន្តរជាតិ
ប៉េកាំងដាក់ទណ្ឌកម្មសមាជិកសភាអាមេរិកវិញ ក្រោយមន្ត្រីចិនរងទណ្ឌកម្មក្នុងសំណុំរឿងស៊ីនជាំង
ទង់ជាតិចិន និងអាមេរិក។ រូបភាព៖ AFP
×![]()
រដ្ឋាភិបាលចិន នៅថ្ងៃទី១៣ ខែកក្កដា បានដាក់ទណ្ឌកម្មសងសឹកទៅលើតំណាងរាស្ត្រគណបក្សប្រជាធិបតេយ្យចំនួន៣ រូប និងបេសកជនអាមេរិកមួយរូប។ ការដាក់ទណ្ឌកម្មរបស់ចិនទៅលើមន្ត្រីអាមេរិកនេះធ្វើឡើងបន្ទាប់អាមេរិក កាលពីថ្ងៃ៩ ខែកក្កដាបានសម្រេចដាក់ទណ្ឌកម្មលើមន្ត្រីជាន់ខ្ពស់ចិនជាច្រើនរូបពាក់ព័ន្ធការបំពានសិទ្ធិមនុស្សលើជនជាតិភាគតិចមូស្លីមវីហ្គ័រនៅតំបន់ស៊ីនជាំង។
តំណាងរាស្ត្រ និងបេសកជនអាមរិក ដែលស្ថិតនៅក្នុងបញ្ជីទណ្ឌកម្មរបស់ចិននោះមាន លោក Marco Rubio និង Ted Cruz ដែលជាសមាជិកព្រឹទ្ធសភា រួមជាមួយនឹងលោក Chris Smith ដែលជាតំណាងរាស្ត្រ។ បុគ្គលទាំង៣រូបនេះ ត្រូវបានគេដឹងថាជាអ្នកនិយាយតិះទៀនរដ្ឋាភិបាលចិនខ្លាំងជាងគេ។ ចំណែកឯ លោក Sam Brownback ដែលជាឯកអគ្គរដ្ឋទូតអាមេរិកទទួលបន្ទុកសេរីភាពសាសនាអន្តរជាតិ ក៏មានឈ្មោះក្នុងបញ្ជីដែរ។
ទណ្ឌកម្ម ដែលចិនដាក់លើតំណាងរាស្ត្រ អាមេរិកលើកនេះ គឺជាការឆ្លើយតបទៅនឹងទណ្ឌកម្មអាមេរិក កាលពីថ្ងៃ៩ ខែកក្កដា ដែលដាក់សំដៅទៅលើមន្ត្រីជាន់ខ្ពស់ចិនជាច្រើនរូបក្នុងតំបន់ស៊ីនជាំង ដោយមិនផ្តល់ទិដ្ឋាការ និងបង្កកទ្រព្យសម្បត្តិ។ ក្នុងចំណោមមន្ត្រីចិនដែលរងទណ្ឌកម្ម ក៏មានលោក Chen Quanguo លេខាបក្សកុម្មុយនីស្តចិនប្រចាំតំបន់ស៊ីនជាំង ។
បន្ថែមពីនេះ ទណ្ឌកម្មរបស់ចិននេះ ក៏ដាក់ទៅលើគណៈកម្មការកិច្ចការចិនរបស់សភាអាមេរិក ដែលទទួលបន្ទុកឃ្លាំមើលការគោរពសិទ្ធិមនុស្សក្នុងប្រទេសចិនផងដែរ។ ទោះជាយ៉ាងណាក្តី ទណ្ឌកម្មរបស់ចិនពុំបានបញ្ជាក់ពីវិធានការអ្វីឡើយដែលនឹងដាក់ទៅតំណាងរាស្ត្រ និងអ្នកការទូតអាមេរិកឡើយ។
លោកស្រីHua Chunying អ្នកនាំពាក្យក្រសួងការបរទេសចិន លើកឡើងក្នុងថា វិធានការនេះ គឺជាការឆ្លើយតបទៅនឹងសកម្មភាពខុសឆ្គងរបស់អាមេរិក។ ក្នុងសន្និសីទសារព័ត៌មានថ្ងៃទី១៣ ខែកក្កដា លោកស្រី Hua បន្ថែមថា ចិនទទូចឲ្យអាមេរិកលុបចោលសេចក្តីសម្រេចខុសរបស់ខ្លួន និងបញ្ឈប់ពាក្យសម្តី និងសកម្មភាពដែលជ្រៀតជ្រែកចូលក្នុងកិច្ចការផ្ទៃក្នុងរបស់ចិន និងប៉ះពាល់ផលប្រយោជន៍ចិន។
អ្នកនាំាពាក្យរូបនេះ បានសង្កត់ធ្ងន់ផងដែរថា កិច្ចការនៅក្នុងតំបន់ស៊ីនជាំងជាកិច្ចការផ្ទៃក្នុងទាំងស្រុងរបស់ចិន ហើយអាមេរិកគ្មានសិទ្ធិ និងមូលដ្ឋានអ្វីក្នុងការជ្រៀតជ្រែកឡើយ៕
Tag:
ចិន
អាមេរិក
© រក្សាសិទ្ធិដោយ thmeythmey.com
