ជាតិ
ជាង១ខែកន្លងមក អាជ្ញាធរជាតិអប្សរាផ្តល់កូនឈើជិត៥ម៉ឺនដើមដល់ស្ថាប័នរដ្ឋ និងឯកជន
× ភ្នំពេញ៖ អាជ្ញាធរជាតិអប្សរា បានចែកចាយកូនឈើគ្រប់ប្រភេទជិត៥ម៉ឺនដើម ទៅដល់សហមន៍ អង្គការ ក្រសួង ស្ថាប័នរដ្ឋ និងឯកជន នៅក្នុងខេត្តសៀមរាប និងតាមបណ្ដាខេត្តផ្សេងៗ ក្នុងរយៈពេលជាងមួយខែនៃយុទ្ធនាការដាំ។ នេះបើតាមសេចក្ដីប្រកាសព័ត៌មានរបស់អាជ្ញាធរជាតិអប្សរា ចេញផ្សាយនៅថ្ងៃទី១៣ ខែកក្កដា ឆ្នាំ២០២០នេះ។
កូនឈើទាំង៥ម៉ឺនដើមនេះ រួមបញ្ចូលទាំងប្រភេទឈើដែលមានតម្លៃ និងកម្រនៅក្នុងប្រទេសកម្ពុជា ដែលក្នុងនោះរួមមាន ប្រភេទកូនឈើគ្រញូង ធ្នង់ បេង ច្រេស ឈើទាល ជាដើម។ ក្រៅពីប្រភេទកូនឈើដែលមានតម្លៃទាំងនេះ អាជ្ញាធរជាតិអប្សរាក៏បានចែកនូវ ប្រភេទកូនឈើផ្សេងទៀតដូចជា ច្រេស ឈើទាល គគីរ កកោះ រំដួល គុយ សិរមាន់ ផ្ការក្ងោក និងផ្ការឥន្ទនេល។
បើតាមសេចក្ដីជូនដំណឹងដដែល កូនឈើទាំងអស់នោះ ត្រូវបានប្រគល់ទៅដល់ស្ថាប័នរដ្ឋ អង្គការ សហគមន៍ សាលារៀន វត្តអារាម វិស័យឯកជន និងសាធារណជនទូទៅ ដើម្បីបង្កើនគម្របព្រៃឈើឱ្យប្រសើរឡើងវិញ ទាំងនៅក្នុងខេត្តសៀមរាប និងខេត្តដទៃទៀតនៃប្រទេសម្ពុជា។
កូនឈើគ្រប់ប្រភេទទាំង ៥ម៉ឺនដើមនេះ ត្រូវបានចែកដល់ក្រុមហ៊ុន ម៉ុង ប្ញទ្ធី ចំនួន១០,៧០០ដើម, ទីបញ្ជាការយោធភូមិភាគ៤ ចំនួន៥ពាន់ដើម និងស្ថាប័នជាច្រើនទៀត ចំនួនជាង១ពាន់ដើម ក្នុងមួយស្ថាប័ន៕
© រក្សាសិទ្ធិដោយ thmeythmey.com