ភ្នំពេញ៖ វិបត្តិកូវីដ-១៩ បានធ្វើឱ្យរដ្ឋាភិបាល ផ្លាស់ប្ដូរទិសដៅយ៉ាងឆាប់ មកពង្រឹងវិស័យកសិកម្ម បែបវារីវប្បកម្មវិញ។ សម្ដេចនាយករដ្ឋមន្ត្រី ហ៊ុន សែន ថ្លែងបែបនេះ នៅក្នុងពិធីជួបសំណេះសំណាលជាមួយកសិករនៅខេត្តព្រៃវែង នាព្រឹកថ្ងៃទី១៤ កក្កដានេះ។
សម្ដេច ហ៊ុន សែន បានសង្កត់ធ្ងន់ថា ទោះបីវិស័យមួយចំនួន ដូចជាវិស័យឧស្សហកម្ម និងវិស័យសេវាកម្មជាដើម កំពុងជួបវិបត្តិ នៅក្នុងអំឡុងពេលរាតត្បាតនៃជំងឺកូវីដ-១៩ក្តី ប៉ុន្តែវិស័យកសិកម្ម គឺជាវិស័យមួយដែលនៅតែមានភាពល្អប្រសើរបំផុត ហើយបានធានាដល់បញ្ហាស្បៀងអាហារនៅក្នុងស្រុក និងការនាំចេញទៅកាន់ទីផ្សារអន្តរជាតិទៀតផង។
ដោយមើលឃើញពីភាពវិជ្ជមាននៃវិស័យកសិកម្មនេះ ទើបប្រមុខរដ្ឋាភិបាល សម្រេចផ្ដាស់ប្ដូរទិសដៅសេដ្ឋកិច្ច ដោយផ្ដោតមកលើការអភិវឌ្ឍវិស័យកសិកម្ម ពិសេសផ្នែកវារីវប្បកម្មនេះ ដើម្បីបង្កើនសក្ដានុពលក្នុងតំបន់ ក៏ដូចក្នុងពិភពលោក។ «មិនត្រូវភ្លេចថាយើងជាប្រទេសកសិកម្ម ដោយវាមិនគ្រាន់តែមិនប៉ះពាល់ទេ ប៉ុន្តែវាបែរជាមានឧត្តមភាពត្រឡប់ទៅវិញ នៅក្នុងវិស័យកសិកម្ម ដូច្នេះហើយបានជារាជរដ្ឋាភិបាល បានប្ដូរទិសយ៉ាងឆាប់ ទៅក្នុងការជំរុញវិស័យកសិកម្មឱ្យមានលូតលាស់ឡើង ។ហើយយើងក៏នឹងចូលរួមចំណែក មួយផ្នែកដោះស្រាយ និងធានាសន្តិសុខស្បៀងក្នុងស្រុក តែមួយផ្នែកទៀត យើងក៏នឹងចូលរួមសង្វាក់ផ្គត់ផ្គង់នៅក្នុងតំបន់ និងពិភពលោកផងដែរ»។ នេះជាការបញ្ជាក់របស់សម្ដេច ហ៊ុន សែន។
កន្លងមករដ្ឋាភិបាល បានផ្ដោតការយកចិត្តទុកដាក់យ៉ាងសំខាន់ទៅលើវិស័យឧស្សាហកម្ម សេវាកម្ម និងសំណង់ជាដើម ខណៈដែលវិស័យកសិកម្ម មានតែជាង២០ភាគរយ។ សម្ដេច បានបញ្ជាក់ថា កម្ពុជានឹងប្រែក្លាយវិបត្តិកូវីដ១៩ នេះ ឱ្យទៅជាឱកាសនៃវិស័យកសិកម្ម ហើយកម្លាំងដែលបាត់បង់ពីវិស័យឧស្សាហកម្ម នឹងបង្វែរមកវិស័យកសិកម្មវិញ។
ថ្លែងចំពោះមុខមន្ត្រីរដ្ឋាភិបាល អ្នកជំនាញ និងកសិករ នៅទឹកដីស្រុមពាមរ ខេត្តព្រៃវែង នាយករដ្ឋមន្ត្រីកម្ពុជា បានបញ្ជាក់ដូច្នេះថា៖«ពេលនេះ គឺជាប្រក្រតីភាពនៃជីវភាពតាមគន្លងថ្មី បន្ទាប់ពីយើងជួបនូវវិបត្តិកូវីដ១៩ ។ ថ្វីត្បិតតែវិស័យមួយចំនួនយើងជួបបញ្ហា និងផ្អាកពិធីសំខាន់ៗ តែដំណើរការរបស់ប្រជាកសិករមិនផ្លាស់ប្តូរ ឬផ្អាកនោះទេ។ វឌ្ឍនភាព និងភាពរីកចម្រើនវិស័យវារីវប្បកម្ម ដែលបានរួមចំណែកយ៉ាងសំខាន់ក្នុងការជួយលើកស្ទួយជីវភាពប្រជាជន និងសេដ្ឋកិច្ចជាតិផងដែរ»។
កន្លងមកអ្នកជំនាញកសិកម្ម ក៏ធ្លាប់បានជំរុញឱ្យរដ្ឋាភិបាល យកឱកាសនៃវិបត្តិកូវីដ-១៩នេះ មកពង្រឹងវិស័យកសិកម្មដែរ។ ពួកគេយល់ឃើញថា វិបត្តិកូវីដ-១៩ ជាកាលានុវត្តភាពមួយ ដែលអាចឱ្យកម្ពុជា កាត់បន្ថយការនាំចូល តាមរយៈការបង្កើនផលដាំដុះ និងចិញ្ចឹមសត្វសម្រាប់ផ្គត់ផ្គង់នៅក្នុងស្រុក និងតំបន់វិញម្ដង។ ប៉ុន្តែដើម្បីអាចអភិវឌ្ឍន៍វិស័យកសិកម្មបានយ៉ាងឆាប់រហ័សនោះ លុះត្រាតែមានការចូលរួមពីរដ្ឋាភិបាល តាមរយៈការផ្ដល់ជំនួយបច្ចេសទេស មន្ត្រីជំនាញ រៀបចំចងក្រងជាសហគមន៍ និងជួយរកទីផ្សារឱ្យកសិករ ជាពិសេសលុបបំបាត់ឈ្មួញកណ្ដាល ដែលបង្ខូចតម្លៃកសិផលរបស់កសិករ។
រដ្ឋាភិបាល ក៏បានគិតពីចំណុចនេះដែរ។ សម្ដេច ហ៊ុន សែន ក៏បញ្ជាឱ្យក្រសួងមុខងារសាធារណៈ ,ក្រសួងសេដ្ឋកិច្ច និងហិរញ្ញវត្ថុ និងក្រសួងកសិកម្ម រុក្ខាប្រមាញ់ និងនេសាទ រៀបចំបញ្ជូនមន្ត្រីជំនាញបច្ចេកទេសកសិកម្ម ទៅជួយដល់កសិករ នៅក្នុងផ្នែកវារីវប្បកម្មនេះទៀតផង។ មិនតែប៉ុណ្ណោះសម្ដេច ហ៊ុន សែន ក៏បានប្រកាសទម្លាក់ដើមទុន៥០ម៉ឺនដុល្លារ សម្រាប់ឱ្យពលរដ្ឋដែលបាត់បង់ការងារនៅក្នុងវិស័យឧស្សាហកម្ម និងសេវាកម្មជាដើម យកទៅប្រើប្រាស់ក្នុងការបង្កើតរបរនៅក្នុងវិស័យកសិកម្មនេះ ។
សម្ដេចនាយករដ្ឋមន្ត្រី ហ៊ុន សែន ស្នើឱ្យពលរដ្ឋខិតខំប្រឹងប្រែងបង្កើនកសិផល ដើម្បីផ្គត់ផ្គង់ក្នុងស្រុកឱ្យច្រើន ជាងការនាំចូល។ សម្ដេច ក៏បានបដិសេធសំណើរបស់ក្រុមហ៊ុនឯកជនមួយ ដែលបានស្នើសុំនាំចូលជ្រូក១លានក្បាលពីប្រទេសថៃ មកកម្ពុជា។ សម្ដេច អះអាងថា បើសម្ដេចយល់ព្រមតាមសំណើនោះ វាហាក់ដូចជាសម្លាប់កសិករខ្មែរ ដែលកំពុងចិញ្ចឹមជ្រូក ក៏ដូចជាការចិញ្ចឹមសត្វដទៃទៀតដែរ។
«កុំនាំចូល(សត្វ )ពីគេ ហើយសម្លាប់ការចិញ្ចឹមសត្វក្នុងប្រទេសរបស់ខ្លួន។ ខ្ញុំមិនយល់ស្របចំណុចហ្នឹងទេ»។ នេះជាការលើកឡើងរបស់សម្ដេច ហ៊ុន សែន ដែលបន្ថែមថា ការបើកឱ្យនាំចូលជ្រូក ឬសត្វដទៃពីប្រទេសថៃ ឬវៀតណាមនោះ វាដូចជាបើកឱកាសទីផ្សារឱ្យគេ ជាងកម្ពុជា ដែលធ្វើឱ្យខាតប្រយោជន៍កសិករខ្មែរ៕