ជាតិ
ពីអ្នកដែលធ្លាប់កាប់ឈើ ទៅជាអ្នកបើកទូកទេសចរណ៍ និងការពារធនធានធម្មជាតិ...
×![]()
ដោយ: ផាត ដាណេ
កោះកុង៖ លោក ឃឿន រ៉ាត់ និងលោក ហាន់ ប្រុស ជាអ្នកបើកទូកដឹកភ្ញៀវទេសចរតាមតំបន់ទេសចរណ៍ធម្មជាតិជីផាតក្នុងខេត្តកោះកុង។ កន្លងមក ពលរដ្ឋទាំងពីររូបនេះ ប្រកបរបរបាញ់សត្វព្រៃ កាប់ទន្ទ្រានព្រៃឈើ និងនេសាទខុសច្បាប់ជាដើម។ ប៉ុន្តែក្រោយពីក្រសួងបរិស្ថាន សហការជាមួយ អង្គការសម្ព័ន្ធមិត្តសត្វព្រៃ បានហាមឃាត់ និងទប់ស្កាត់ លើការបំផ្លាញធនធានធម្មជាតិ ពួកគាត់ទាំងពីរនាក់ បានផ្លាស់ប្ដូរអាជីពមកបើកទូកដឹកភ្ញៀវទេសចរវិញ ហើយសប្បាយចិត្តជាមួយរបរមួយនេះ និងមិនចង់ឲ្យធនធានធម្មជាតិទាំងនេះបាត់បន្តទៀតឡើយ។
ក្រោយពីប្រភពចំណូលរបស់ខ្លួនត្រូវបានហាមឃាត់ដោយមន្ត្រីឧទ្យានុរក្សនៃក្រសួងបរិស្ថាន និងមានការពន្យល់ពីសារសំខាន់របស់ធម្មជាតិ លោក ហាន់ ប្រុស បានងាកមកចាប់អាជីពជាអ្នកបើកទូកដឹកភ្ញៀវទេសចររយៈពេល ៥ឆ្នាំហើយ។
លោក ហាន់ ប្រុស ប្រាប់ Thmeythmey25 ដូច្នេះថា៖«រយៈពេល៥ឆ្នាំមកនេះដែលខ្ញុំធ្វើជាអ្នកបើកទូកដឹកភ្ញៀវទេសចរ។ ខ្ញុំមានអារម្មណ៍ថាស្រឡាញ់ធម្មជាតិ ហើយក៏សប្បាយចិត្តជាមួយភ្ញៀវទេសចរដែលមកជិះទូកនេះផងដែរ»។
លោក ឃឿន រ៉ាត់
លោក ឃឿន រ៉ាត់
លោកបន្តថា ចំណូលរកបានពីការនេសាទ មិនលើសអីពីការបើកទូកនេះទេ។ លោកពេញចិត្តនឹងការងារនេះណាស់ ព្រោះលោកអាចរកចំណូលបានសម្រាប់ផ្គត់ផ្គង់គ្រួសារ និងឲ្យកូនរៀនបាន។
ចំណែកឯអតីតអ្នកកាប់ឈើខុសច្បាប់លោក ឃឿន រ៉ាត់ បានប្តូរមកជាអ្នកបើកទូកដឹកភ្ញៀវទេសចរវិញ។ លោកសប្បាយចិត្តជាមួយការងារមួយនេះ ហើយលោកក៏ចង់ចូលរួមអភិរក្សធនធានធម្មជាតិដែលមានផងដែរ។
លោក ហាន់ ប្រុស
«ព្រៃឈើធម្មជាតិទាំងអស់នេះ វាពិតជាមានប្រយោជន៍។ ខ្ញុំសប្បាយចិត្តដែលធ្វើជាអ្នកបើកទូកដឹកភ្ញៀវបែបនេះ។ ខ្ញុំរំភើបនៅពេលភ្ញៀវទេសចរមកកម្សាន្តច្រើន»។ នេះជាការលើកឡើងរបស់លោក ឃឿន រ៉ាត់ ដោយបន្តថា លោកធ្លាប់ធ្វើការងារច្រើនកន្លែងរួចមកហើយ មិនមែនតែកាប់ព្រៃ បាញ់សត្វ ឬបើកទូកនេះទេ។ ប៉ុន្តែការធ្វើជាអ្នកបើកទូកនេះ លោកមិនគិតថាចង់ផ្លាស់ប្តូរទៀតនោះទេ។
ជាមួយគ្នានេះ លោក ហាន់ ប្រុស វ័យ៣២ឆ្នាំ បញ្ជាក់ទៀតថា៖ លោកមិនដែលមានអារម្មណ៍ថាធុញនឹងការបើកទូកដឹកភ្ញៀវទេសចរនេះឡើយ។ ការងារនេះ ធ្វើឲ្យគាត់ស្រឡាញ់ធនធានធម្មជាតិក្នុងស្រុក និងមិនចង់ផ្លាស់ប្តូរអាជីពឡើយ។ លោកបន្តថា លោកបើកទូកដឹកភ្ញៀវទេសចរមួយថ្ងៃ អាចរកបាន១០ម៉ឺនរៀល។ លោកស្រឡាញ់អាជីពមួយនេះ ហើយចង់ឲ្យកូនរបស់ខ្លួនក្លាយជាមគ្គទេសក៍នាំភ្ញៀវទេសចរអន្តរជាតិមកកម្សាន្តនៅប្រទេសកម្ពុជានៅថ្ងៃអនាគត៕
© រក្សាសិទ្ធិដោយ thmeythmey.com
