ទីក្រុងតូក្យូ ដំឡើងកម្រិតអាសន្នខ្ពស់បំផុត បន្ទាប់ពីករណីឆ្លង COVID-19 ហក់ឡើងជាច្រើនថ្ងៃ

COVID-19

អន្តរជាតិ

ទីក្រុងតូក្យូ ដំឡើងកម្រិតអាសន្នខ្ពស់បំផុត បន្ទាប់ពីករណីឆ្លង COVID-19 ហក់ឡើងជាច្រើនថ្ងៃ

16, Jul 2020 , 11:06 am

រូបភាព

លោកស្រី Yuriko Koike អភិបាលក្រុងតូក្យូ។ រូបភាព៖ Kyodo

ដោយ: ធៀន ភារិន្ទ

រដ្ឋាភិបាលទីក្រុងតូក្យូ នៅថ្ងៃទី១៥ ខែកក្កដា បានដំឡើងកម្រិតអាសន្ននៃករណីឆ្លង COVID-19 នៅក្នុងទីក្រុងទៅកម្រិតខ្ពស់បំផុត។ ការដំឡើងកម្រិតអាសន្ននេះ ធ្វើឡើងបន្ទាប់ពីទីក្រុងតូក្យូ បានរាយការណ៍ពីការកើនឡើងករណីឆ្លងក្នុងរយៈពេលជាច្រើនថ្ងៃជាប់ៗគ្នា។

តាមរយៈសន្និសីទសារព័ត៌មានស្តីពីស្ថានភាពកូរ៉ូណាវីរុសនៅក្រុងទីក្រុងតូក្យូ លោកស្រី Koike Yuriko អភិបាលក្រុងតូក្យូបានលើកឡើងយ៉ាងដូច្នេះថា៖ «យើងបានសម្រេចថា យើងត្រូវការដំឡើងកម្រិតអាសន្ន ដើម្បីការពារប្រជាជន ខណៈកូរ៉ូណាវីរុស កំពុងតែរាតត្បាត»។ បើតាមការចុះផ្សាយរបស់ទូរទស្សន៍ជប៉ុន NHK ទីក្រុងតូក្យូ បានសម្រេចដំឡើងកម្រិតអាសន្ន ទៅកម្រិតខ្ពស់បំផុត ក្នុងចំណោមកម្រិតអាសន្នចំនួន៤នៃCOVID-19។

ទីក្រុងតូក្យូ បានរាយការណ៍ថា មានករណីឆ្លងកូរ៉ូណាវីរុស ច្រើនជាង២០០ករណីប៉ុន្មានថ្ងៃមកហើយ។ ប៉ុន្តែនៅថ្ងៃទី១៥ ខែកក្កដា ករណីឆ្លងនៅក្នុងទីក្រុងធ្លាក់ចុះបន្តិច ដោយមានចំនួន ១៦៥ករណី។ យ៉ាងណាក៏ដោយ ចំនួន១៦៥ករណីនេះ ក៏នៅតែច្រើនដដែល។

ទាក់ទិននឹងការដំឡើងកម្រិតអាសន្នបែបនេះ លោកស្រីអភិបាលក្រុង បានទទូចឲ្យប្រជាជនកុំធ្វើដំណើរទៅកន្លែងណាមួយបើមិនចាំបាច់ និងកុំទៅភោជនីយដ្ឋាន និងក្លឹបកម្សាន្តទាំងឡាយណា ដែលមិនបានចាត់វិធានការទប់ស្កាត់ការរាតត្បាតនៃCOVID-19 ត្រឹមត្រូវ។ ចំណែកម្ចាស់អាជីវកម្មវិញ លោកស្រីអភិបាលក្រុង បានសំណូមពរឲ្យមានការយកចិត្តទុកដាក់ជាងមុនលើកូរ៉ូណាវីរុស ដើម្បីបញ្ចៀសការរាតត្បាតនៃករណីឆ្លង។

គិតចាប់តាំងពីជប៉ុនលើកចោលស្ថានភាពអាសន្ននៅក្នុងប្រទេសតាំងពីថ្ងៃទី២៥ ខែឧសភាមក នៅតំបន់ផ្សេងទៀតក្រៅពីទីក្រុងតូក្យូក៏មានការកើនឡើងដែរ។ នៅក្នុងថ្ងៃទី១៥ ខែកក្កដា នៅទីក្រុងអូសាកា បានរាយការណ៍ថា មានករណីឆ្លង ៦១ករណី។

សូមបញ្ជាក់ថា គិតមកត្រឹមថ្ងៃទី១៥ ខែកក្កដា ជប៉ុនមានករណីឆ្លង COVID-19 សរុបចំនួន២២៥០៨ករណី អ្នកស្លាប់មានចំនួន ៩៨៤នាក់ និងអ្នកជាសះស្បើយមានចំនួន ១៨៥៤៥នាក់៕