គណៈកម្មការអន្តរក្រសួងជំរុញការអនុវត្តគម្រោងផ្លូវល្បឿនលឿនភ្នំពេញ-បាវិត

ជាតិ

គណៈកម្មការអន្តរក្រសួងជំរុញការអនុវត្តគម្រោងផ្លូវល្បឿនលឿនភ្នំពេញ-បាវិត

17, Jul 2020 , 9:59 pm

រូបភាព

រូបភាព JICA

ដោយ:

សម្តេចនាយករដ្ឋមន្ត្រី ហ៊ុន សែន កាលពីថ្ងៃ១៥ ខែកក្កដា បានចេញសេចក្តីសម្រេចស្តីពីការបង្កើតក្រុមអន្តរក្រសួង ដើម្បីជំរុញដំណើរការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿន តភ្ជាប់ពីរាជធានីភ្នំពេញ ទៅក្រុងបាវិត ខេត្តស្វាយរៀង ដោយចាត់តាំងលោក ស៊ុន ចាន់ថុល ទេសរដ្ឋមន្ត្រីរដ្ឋមន្ត្រីក្រសួងសាធារណការ និងដឹកជញ្ជូន ជាប្រធាន។

បើតាមសេចក្ដីសម្រេចរបស់ប្រមុខរដ្ឋាភិបាល ភារកិច្ចរបស់គណៈកម្មការនេះ មានដូចជា ការពិនិត្យ និងផ្ដល់យោបល់អំពីនីតិវិធីក្របខណ្ឌគតិយុត្ត និងរូបភាពនៃការវិនិយោគ ជំរុញគម្រោងហេដ្ឋារចនាសម្ព័ន្ធផ្លូវល្បឿនលឿនភ្នំពេញ-ក្រុងបាវិតនេះ ឲ្យបានសម្រេចជាស្ថាពរ រួមទាំងធ្វើរបាយការណ៍ស្ដីពីលទ្ធផលការងារជូនប្រមុខរាជរដ្ឋាភិបាលតាមរយៈទីស្ដីការគណៈរដ្ឋមន្ត្រី។

គម្រោងផ្លូវល្បឿនលឿន (Expressway) ភ្នំពេញ-ក្រុងបាវិត ត្រូវបានក្រុមហ៊ុន China Railway International Group.,Ltd ស្នើសុំវិនិយោគ និងស្ថិតក្រោមក្របខណ្ឌសាងសង់ ធ្វើអាជីវកម្ម និងផ្ទេរ (Build-Operate-Transfer) ដោយរាជរដ្ឋាភិបាលកម្ពុជាដែលមានក្រសួងសាធារណការ និងដឹកជញ្ជូនជាប្រធាន។

សម្រាប់សមាសភាពផ្សេងទៀត លោក ស៊ុន ចាន់ថុល មានអនុប្រធាន៣នាក់ គឺលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា, លោក វង្ស៊ី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ និងលោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន។

សមាជិក១៣នាក់ទៀត ជារដ្ឋលេខាធិការ អនុរដ្ឋលេខាធិការ សមាជិកក្រុមប្រឹក្សាអ្នកច្បាប់ អគ្គនាយក អគ្គនាយករង នៃក្រសួងពាក់ព័ន្ធ រួមទាំងអភិបាលរាជធានភ្នំពេញ អភិបាលខេត្តកណ្តាល ព្រៃវែង និងស្វាយរៀង៕