ជាតិ
បរទេសជាង១៦ម៉ឺននាក់ ចុះឈ្មោះរស់នៅក្នុងប្រទេសកម្ពុជា ខណៈបរទេសជិត២ពាន់នាក់ កំពុងជាប់ឃុំ
លោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ដែលកំពុងថ្លែងសុន្ទរកថាបង្ហាញរបាយការណ៍បូកសរុបការងារលទ្ធផលការងារប្រចាំឆមាសទី១ ឆ្នាំ២០២០ រូបភាពពីក្រសួងមហាផ្ទៃ
×![]()
ភ្នំពេញ៖ ក្នុងរយៈពេល៦ខែ ឆ្នាំ២០២០ មានជនបរទេសជាង១៦ម៉ឺននាក់ បានចុះឈ្មោះតាមប្រព័ន្ធព័ត៌មានវិទ្យា មករស់នៅក្នុងប្រទេសកម្ពុជា។ ប៉ុន្តែវត្តមានជាក់ស្តែងរបស់បរទេស ដែលកំពុងស្ថិតនៅក្នុងប្រទេសកម្ពុជា មានជាង១១ម៉ឺននាក់។ ទន្ទឹមនឹងនេះ មានជនបរទេសជិត២ពាន់នាក់ កំពុងតែជាប់ឃុំនៅក្នុងពន្ធនាគារទូទាំងប្រទេសកម្ពុជា។ នេះបើតាមរបាយការណ៍បូកសរុបការងារឆមាសទី១ ឆ្នាំ២០២០ របស់លោក គៀត ច័ន្ទថារិទ្ធ អគ្គនាយកដ្ឋានអន្តោប្រវេសន៍។ 
ក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២០ របស់អគ្គនាយកដ្ឋានអន្ដោប្រវេសន៍ នាព្រឹកថ្ងៃទី១៧ ខែកក្កដា ឆ្នាំ២០២០ នៅក្រសួងមហាផ្ទៃ លោក គៀត ច័ន្ទថារិទ្ធ បានបញ្ជាក់ថា តាំងពីការបង្កើតឲ្យមានប្រព័ន្ធព័ត៌មានវិទ្យា សម្រាប់ឲ្យម្ចាស់ទីតាំង ឬម្ចាស់លំនៅឋាន ឬអ្នកកាន់កាប់លំនៅដ្ឋាន ស្រង់វត្តមានជនបរទេសដែលស្នាក់នៅ និងជួលលំនៅដ្ឋានរបស់ខ្លួនមក បានផ្តល់ភាពងាយស្រួលក្នុងការស្រង់យកស្ថិតិជនបរទេសដែលរស់នៅកម្ពុជា។
លោក ស្នើឲ្យពលរដ្ឋដែលមានទីតាំង ម្ចាស់លំនៅឋាន និង ម្ចាស់អគារផ្សេងៗ បន្តការងារចុះបញ្ជីឈ្មោះរបស់ជនបរទេសតាមប្រព័ន្ធព័ត៌មានវិទ្យារបស់អគ្គនាយកដ្ឋានអន្តោប្រវេសន៍ ដើម្បីឲ្យការងារនេះប្រកបដោយប្រសិទ្ធភាព និងតម្លាភាព។ លោក សង្ឃឹមថា ការងារនេះនឹងកាន់តែល្អបន្ថែមទៀត។
អគ្គនាយកអន្ដោប្រវេសន៍រូបនេះ អះអាងថា កម្ពុជានឹងបន្តទទួលបានជនបរទេសមកស្នាក់នៅកម្ពុជាជាបន្តទៀត តាមរយៈការប្រើប្រព័ន្ធព័ត៌មានវិទ្យាសម្រាប់ចុះបញ្ជីឈ្មោះជនបរទេស។
លោក ថ្លែងដូច្នេះថា៖«ប្រព័ន្ធព័ត៌មានវិទ្យាកំពុងតែតាមដានបន្ដទៀត ចំពោះជនបរទេសស្នាក់នៅកម្ពុជា។ ដូច្នេះជនបរទេសអាច នឹងមានការកើនឡើងបន្ថែមទៀត ដោយសារតែអគ្គនាយកដ្ឋានអន្ដោប្រវរសន៍ បានប្រកាសដាក់ឲ្យប្រើប្រាស់កម្មវិធីប្រព័ន្ធព័ត៌មានវិទ្យានេះ»។
លោក បន្តថា ប្រសិនបើមានម្ចាស់ទីតាំងណាមួយឲ្យជនបរទេសស្នាក់នៅ ហើយមិនសហការជាមួយសមត្ថកិច្ច នោះម្ចាស់ទីតាំងនឹងទទួលពិន័យតាមផ្លូវច្បាប់។
ទន្ទឹមនឹងមានជនបរទេសជាង១១ម៉ឺននាក់ បានចុះឈ្មោះរស់នៅក្នុងប្រទេសកម្ពុជា ដើម្បីប្រកបមុខរបរផ្សេងៗ ក្នុងនោះក៏មានជនបរទេសជាង១,៨ពាន់នាក់ (ស្រី២៤៩នាក់) ដែលមាន៤៥សញ្ជាតិ កំពុងតែជាប់ឃុំក្នុងពន្ធនាគារទូទាំងប្រទេស។
ជនបរទេសដែលកំពុងជាប់ឃុំទាំងនោះ មានជនជាតិវៀតណាម ៧៤៩នាក់ (ស្រី១៦៨) ចិន៧២៧នាក់ (ស្រី២៤នាក់) នីហ្សេរីយ៉ា៧៣នាក់ (ស្រី១នាក់) និង ថៃ៦៨នាក់ (ស្រី២៦)។
ដោយឡែកជនបរទេស ដែលបានរងគ្រោះដោយឧប្បទ្ទវហេតុផ្សេងៗមាន២១១នាក់ ក្នុងនោះមានជនបរទេសស្លាប់ដោយជំងឺ១០០នាក់ ស្លាប់ដោយឃាតកម្ម៤នាក់ ធ្វើអត្តឃាត១៤នាក់ គ្រោះថ្នាក់ចរាចរណ៍៥នាក់ និង រងគ្រោះដោយសារអំពើផ្សេងៗ៨៨នាក់។
បើតាមរបាយការណ៍របស់អគ្គនាយកដ្ឋានអន្ដោប្រវេសន៍ ចាប់តាំងពីឆ្នាំ២០១៤ រហូតមកដល់ខែមិថុនា ឆ្នាំ២០២០នេះ កម្ពុជាបានបណ្ដេញជនបរទេសខុសច្បាប់ត្រឡប់ទៅមាតុភូមិវិញ ជាង១,៧ម៉ឺននាក់ (ស្រីជិត៣ពាន់នាក់) ដោយមាន១០៤សញ្ជាតិ៕
Tag:
បរទេស
© រក្សាសិទ្ធិដោយ thmeythmey.com
