COVID-19
អន្តរជាតិ
នយោបាយអន្តរជាតិ
រូបពី Reuters
×![]()
ករណីឆ្លង COVID-19 នៅទូទាំងពិភពលោក បានកើនដល់ ១៤លានករណីហើយ គិតត្រឹមថ្ងៃទី ១៧ ខែកក្កដា ។ នេះបើយោងតាមទីភ្នាក់ងារព័ត៌មាន Reuters។ ហើយនេះជាលើកដំបូងដែលវាហក់ឡើងរហូតដល់១លានករណីត្រឹម១០០ម៉ោង ឬជាង៤ថ្ងៃប៉ុណ្ណោះ។
ករណីឆ្លង COVID-19 ទី១ ត្រូវបានរាយការណ៍ក្នុងប្រទេសចិន កាលពីដើមខែមករា ហើយវាត្រូវការពេលរហូតជាង៣ខែ ទើបឈានដល់១លានករណី។ ផ្ទុយទៅវិញ វាត្រូវការពេលត្រឹម៤ថ្ងៃប៉ុណ្ណោះ ដែលករណី COVID-19 សរុបនៅទូទាំងពិភពលោកកើនដល់ ១៤លានករណី ពីចំនួន១៣លានករណី កាលពីថ្ងៃទី ១៣ ខែកក្កដា។
សហរដ្ឋអាមេរិក ដែលបច្ចុប្បន្នមានករណីឆ្លងសរុបជាង ៣,៦លានករណី នៅតែបន្តហក់ឡើងខ្ពស់ក្នុងរលកឆ្លងទី១របស់ខ្លួនដដែល។ តួយ៉ាង អាមេរិកនៅតែរាយការណ៍ឆ្លងច្រើនប្រចាំថ្ងៃ ដោយកាលពីថ្ងៃទី ១៦ ខែកក្កដា មានជាង៧៧ ០០០ករណី។
បើតាមអង្គការសុខភាពពិភពលោក (WHO) តួលេខឆ្លង COVID-19 នៅទូទាំងសកលលោក គឺកើន៣ដងលើសតួលេខអ្នកជំងឺផ្ដាសាយធ្ងន់ធ្ងរប្រចាំឆ្នាំ ។ បច្ចុប្បន្ន ជំងឺរាតត្បាតសកល COVID-19 បានសម្លាប់មនុស្សជាង ៥៩ម៉ឺននាក់ហើយក្នុងពេលជិត៧ខែ ។
ករណីស្លាប់ដំបូងបានរាយការណ៍កាលពីថ្ងៃទី ១០ ខែមករា ក្នុងទីក្រុង វូហាន ប្រទេសចិន មុនពេលករណីឆ្លងរាលដាលខ្លាំងក្នុងតំបន់អឺរ៉ុប ហើយក្រោយមកសហរដ្ឋអាមេរិក។
បើតាម Reuters ដែលផ្អែកលើរបាយការណ៍រដ្ឋាភិបាល ជំងឺ COVID-19 មានល្បឿនឆ្លងលឿនរហ័សខ្លាំងក្នុងតំបន់អាមេរិក ដែលគ្របដណ្ដប់ជាងពាក់កណ្ដាលនៃករណីឆ្លងសរុបរបស់ពិភពលោក និងពាក់កណ្ដាលនៃករណីស្លាប់។
ជាក់ស្តែង ក្នុងប្រទេស ប្រេស៊ីល មនុស្សជាង២លាននាក់ បានឆ្លង COVID-19 ក្នុងនោះក៏មាន ប្រធានាធិបតី Jair Bolsonaro ផងដែរ ហើយមនុស្សជាង៧៦ ០០០នាក់បានបាត់បង់ជីវិតដោយជំងឺនេះ៕
Tag:
COVID-19
សហរដ្ឋអាមេរិក
© រក្សាសិទ្ធិដោយ thmeythmey.com
