អន្តរជាតិ
នយោបាយអន្តរជាតិ
ប៉េកាំង៖ បម្រាមអាមេរិកលើសមាជិកបក្សកម្មុយនីស្តចូលទឹកដីខ្លួន ដូចប្រឆាំងឆន្ទៈប្រជាជនចិន
រដ្ឋមន្ត្រីការបរទេសចិន លោក វ៉ាង យី (AFP)
×![]()
រដ្ឋាភិបាលចិន តាមរយៈក្រសួងការបរទេស បានបញ្ជាក់ថា សហរដ្ឋអាមេរិកនឹងចាត់ទុកប្រជាជនចិនទាំង១,៤ពាន់លាននាក់ជាសត្រូវ បើក្រុងវ៉ាស៊ីនតោនរឹងរូសបន្តផែនការហាមសមាជិកបក្សកាន់អំណាចចិនទាំងអស់ចូលទឹកដីអាមេរិក។ ប៉េកាំងបន្តថា ទង្វើនេះក៏ប្រឆាំងនឹងឆន្ទៈប្រជាជនផងដែរ។
រដ្ឋបាលប្រធានាធិបតីអាមេរិក ដូណាល់ ត្រាំ ត្រូវបានរាយការណ៍កំពុងត្រួតពិនិត្យលើគម្រោងការមួយ ដែលនឹងហាមឃាត់ការធ្វើដំណើរចូលទឹកដីសហរដ្ឋអាមេរិកពីសំណាក់សមាជិកបក្សកុម្មុយនីស្តចិន (CPC) ។ យ៉ាងណា ទាក់ទិនដំណឹងនេះ ទីក្រុងប៉េកាំង បានហៅទង្វើរបស់ក្រុងវ៉ាស៊ីនតោនថាគួរឲ្យអស់សំណើច។
«ប្រសិនបើរបាយការណ៍នេះ គឺជាការពិតមែននោះ សហរដ្ឋអាមេរិកកំពុងជ្រើសរើសជំហរប្រឆាំងនឹងប្រជាជនចិនទាំង ១,៤ពាន់លាននាក់»។ អ្នកនាំពាក្យក្រសួងការបរទសចិន អ្នកស្រី Hua Chunying បញ្ជាក់បែបនេះ នៅថ្ងៃទី ១៧ ខែកក្កដាក្នុងសន្និសីទព័ត៌មាន ដែលដកស្រង់ចុះផ្សាយដោយកាសែតហុងកុង South China Morning Post ។
អ្នកស្រី បន្តថា៖«នេះនឹងប្រឆាំងចំពោះឆន្ទៈរបស់ប្រជាជននៃប្រជាជាតិទាំងពីរ ហើយប្រឆាំងនឹងចរន្តនៃសតវត្សរ៍ទី២១ផងដែរ។ វាគឺជារឿងគួរឲ្យអស់សំណើចបំផុត»។
មែនទែនទៅ ការហាមឃាត់នេះ មានន័យថា សមាជិកជិត ៩២លាននាក់របស់បក្សកុម្មុយនីស្តដែលមានអាយុកាល៩៩ឆ្នាំនេះ នឹងលែងអាចចូលទឹកដីអាមេរិកបានតទៅទៀតហើយ។ មន្ត្រីបក្សទាំងនេះ គឺមន្ត្រីគ្រប់ជាន់ថ្នាក់ទាំងអស់ ដែលរាប់ចាប់តាំងពីមន្ត្រីថ្នាក់មូលដ្ឋាន រហូតដល់ថ្នាក់កំពូល។
ក្នុងសន្និសីទព័ត៌មានដដែល អ្នកស្រីអ្នកនាំពាក្យ Hua ពន្យល់ថា បក្សកុម្មុយនីស្ត គឺចាក់ឫសយ៉ាងជ្រៅទៅក្នុងសង្គមចិន ហើយបានរួមចំណែកយ៉ាងសំខាន់សម្រាប់ភាពជោគជ័យរបស់ប្រជាជាតិមួយនេះ។
ត្រង់ចំណុចនេះ អ្នកស្រីនិយាយដូច្នេះថា៖«ក្រោមការដឹកនាំរបស់បក្សកុម្មុយនីស្ត ប្រជាជនចិនទទួលបានឯករាជ្យ សេរីភាព និងការរំដោះ។ ផ្លូវឆ្ពោះទៅកាន់លទ្ធិសង្គមនិយមរបស់ចិន ពុំគ្រាន់តែជួយប្រជាជនចិនងើបផុតពីភាពក្រីក្រប៉ុណ្ណោះទេ តែវាក៏បានធ្វើវិភាគទានយ៉ាងធំធេងដល់វឌ្ឍនភាពរបស់មនុស្សជាតិផងដែរ»។
កាលពីសប្តាហ៍មុន ក្រសួងការបរទេសអាមេរិក បានប្រកាសថា ខ្លួននឹងដាក់បម្រាមលើទិដ្ឋាការរបស់មន្ត្រីជាន់ខ្ពស់មួយចំនួនរបស់បក្សកុម្មុយនីស្តចិន ដែលខ្លួនចាត់ទុកថា ទទួលខុសត្រូវលើការរំលោភសិទ្ធិមនុស្សប្រឆាំងជនមូស្លីមក្នុងតំបន់ស្វយ័ត Xinjiang ៕
Tag:
ចិន
សហរដ្ឋអាមេរិក
© រក្សាសិទ្ធិដោយ thmeythmey.com
