អន្តរជាតិ
នយោបាយអន្តរជាតិ
ភរិយាលោក អូបាម៉ា នឹងធ្វើជាពិធីការនីវិទ្យុនិយាយរឿងទំនាក់ទំនងស្នេហានិងសុខភាព
ប្រធានាធិបតីអាមេរិកទី៤៤ លោក បារ៉ាក អូបាម៉ា និងភរិយាលោក អ្នកស្រី មីឈែល អូបាម៉ា (AFP)
×![]()
អតីតស្ត្រីទីមួយសហរដ្ឋអាមេរិក អ្នកស្រី មីឈែល អូបាម៉ា នឹងចាប់ផ្ដើមអាជីពថ្មី ដែលធ្វើជាពិធីការិនីវិទ្យុ (podcaster) នៅលើប្រព័ន្ធផ្សព្វផ្សាយ Spotify ។ ក្នុងកម្មវិធីនេះ អ្នកស្រី នឹងលើកពិភាក្សា ដើម្បីដោះស្រាយបញ្ហាទំនាក់ទំនងស្នេហានិងសុខភាព។ 
«សម្រាប់រដូវកាលទី១ ខ្ញុំនឹងជជែកពិភាក្សាជាមួយមនុស្សមួយចំនួនដែលជិតស្និទ្ធខ្ញុំ ដូចជា ម្ដាយខ្ញុំ បងប្អូនប្រុសខ្ញុំ មិត្តខ្ញុំ មិត្តរួមការងារខ្ញុំ និងអ្នកដទៃទៀត»។ អ្នកស្រី អូបាម៉ា សរសេរបែបនេះ នៅលើបណ្ដាញសង្គម Instagram ។
ក្នុងសំណេរដដែល ស្ត្រីវ័យ៥៦ឆ្នាំរូបនេះ បន្តថា ក្នុងវគ្គនីមួយៗ អ្នកស្រី នឹងពិភាក្សាអំពីមិត្តភាព ទំនាក់ទំនងស្នេហា សុខភាព និងបញ្ហាដែលមនុស្សទូទៅជួបប្រទះជារៀងរាល់ថ្ងៃ។
ការចេញផ្សាយលើកដំបូងរបស់កម្មវិធីអ្នកស្រី មីឈែល នឹងចាប់ផ្ដើមនាថ្ងៃទី ២៩ ខែកក្កដា ហើយគ្រប់គ្នាអាចបើកស្ដាប់បានដោយប្រើប្រាស់កម្មវិធី Spotify ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
អ្នកស្រី មីឈែល អូបាម៉ា ដែលបានជាភរិយារបស់អតីតប្រធានាធិបតីអាមេរិក បារ៉ាក់ អូបាម៉ា គឺជាបុគ្គលល្បីល្បាញបំផុតមួយរបស់សហរដ្ឋអាមេរិក។ ជាមនុស្សពូកែនិយាយជាសាធារណៈ អ្នកស្រីក៏បានសរសេរសៀវភៅលក់ដាច់បំផុតមួយ ចំណងជើង «Becoming» ដែលលក់ដាច់ជាង១១,៥លានក្បាល់នៅទូទាំងពិភពលោក ៕
Tag:
សហរដ្ឋអាមេរិក
មីឈែល អូបាម៉ា
© រក្សាសិទ្ធិដោយ thmeythmey.com
