COVID-19
អន្តរជាតិ
នាយករដ្ឋមន្ត្រីម៉ាឡេស៊ី ប្រកាស «យុទ្ធនាការទិញផលិតផលម៉ាឡេស៊ីដើម្បីម៉ាឡេស៊ី» ដើម្បីស្តាសេដ្ឋកិច្ចឡើងវិញ
×![]()
រដ្ឋាភិបាលម៉ាឡេស៊ី បានអំពាវនាវឲ្យគ្រប់ភាគីពាក់ព័ន្ធទាំងអស់ក្នុងស្រុកបន្តចាយប្រាក់ ដើម្បីជាផ្នែកមួយធានាឲ្យបានលំហូរសាច់ប្រាក់ក្នុងទីផ្សារ ក៏ដូចជាជួយស្តាសេដ្ឋកិច្ចរបស់ឡើងវិញ ក្រោយពីរងការគំរាមកំហែងធ្ងន់ធ្ងរដោយសារតែវិបត្តិជំងឺរាតត្បាត Covid-19។ ប្រមុខរដ្ឋាភិបាលម៉ាឡេស៊ី នឹងបន្តលើកកម្ពស់ផលិតកម្មនៅក្នុងស្រុក។ 
លោកនាយករដ្ឋមន្ត្រី Muhyiddin Yassin នៅថ្ងៃ១៨ កក្កដា បានប្រកាសអនុវត្តជាផ្លូវការយុទ្ធនាការ ទិញផលិតផលម៉ាឡេស៊ី ដើម្បីម៉ាឡេស៊ី។ លោកនាយករដ្ឋមន្ត្រី អះអាងថា យុទ្ធការនេះ គឺជាផ្នែកមួយដ៏សំខាន់ក្នុងការស្តាសេដ្ឋកិច្ចឡើងវិញ ដែលទាមទារឲ្យអ្នកសេដ្ឋកិច្ចជួរមុខចូលរួមទាំងអស់គ្នា។ នេះបើយោងតាមការចុះផ្សាយរបស់សារព័ត៌មាន The Star។
តាមប្រភពព័ត៌មានដដែលនោះ លោកនាយករដ្ឋមន្ត្រី បានលើកឡើងថា យុទ្ធនាការ ទិញផលិតផលម៉ាឡេស៊ី ដើម្បីម៉ាឡេស៊ី មិនមែនជាគោលនយោបាយថ្មីនោះទេ។ តាមលោកនាយករដ្ឋមន្ត្រី យុទ្ធនាការនេះ ធ្លាប់ត្រូវបានដាក់ឲ្យអនុវត្តក្នុងឆ្នាំ ១៩៨៤ ម្តងរួចទៅហើយ ពោលគឺវាត្រូវបានយកមកអនុវត្តក្នុងពេលដែលប្រទេសជួបឱនភាពសេដ្ឋកិច្ច ដែលតម្រូវឲ្យមានការជំរុញការចំណាយក្នុងស្រុកឲ្យកាន់តែច្រើនមកវិញ។
លោកនាយករដ្ឋមន្ត្រី បានគូសបញ្ជាក់ថា ដើម្បីទប់ទល់ការរីករាលនៃវីរុស Covid-19 រដ្ឋាភិបាលត្រូវការក្រុមគ្រូពេទ្យជួរមុខបំផុត ហើយនៅពេលនេះ ដើម្បីលើកស្ទួយសេដ្ឋកិច្ចឡើងវិញ រដ្ឋាភិបាល ត្រូវការបំផុតអ្នកពាក់ព័ន្ធវិស័យសេដ្ឋកិច្ចវិញម្តង។
លោក អះអាងថា ដោយសារតែវិបត្តិ Covid-19 នេះ វត្ថុធាតុដើមដែលកន្លងមកត្រូវបាននាំចូលពីក្រៅប្រទេសដើម្បីផ្គត់ផ្គង់ការផលិតរបស់ឧស្សាហកម្មធំៗក្នុងប្រទេស ត្រូវបានរាំងស្ទះរួចទៅហើយ។ ចំណុចនេះ លោក ថា ម៉ាឡេស៊ី នៅតែមានលទ្ធភាព និងសមត្ថភាពក្នុងការធានាផលិតកម្មផលិតផលដែលរោងចក្រ ឬក្រុមហ៊ុនក្នុងស្រុកអាចធ្វើបានរួមមានដូច ឱសថ ចំណីអាហារ ភេសជ្ជៈ និងសម្ភារវេជ្ជសាស្ត្រជាដើម។
លោកនាយករដ្ឋមន្ត្រី សង្កត់ធ្ងន់ថា នៅពេលដែលប្រជាជនមានការចាយវាយច្រើនក្នុងទីផ្សារ ពេលនេះ វា ជះឥទ្ធិពលដល់សេដ្ឋកិច្ចហើយ ដែលក្នុងនោះរួមមានទាំងការបង្កើតឱកាសការងារ និងការបង្កើនចំណូលរបស់ប្រជាជនជាដើម៕
Tag:
ម៉ាឡេស៊ី
អាស៊ាន
© រក្សាសិទ្ធិដោយ thmeythmey.com
