មេដឹកនាំហុងកុងថា ករណីឆ្លង COVID-19 ក្នុងទីក្រុងស្ថិតក្នុងស្ថានភាពមិនអាចគ្រប់គ្រងបាន

COVID-19

អន្តរជាតិ

មេដឹកនាំហុងកុងថា ករណីឆ្លង COVID-19 ក្នុងទីក្រុងស្ថិតក្នុងស្ថានភាពមិនអាចគ្រប់គ្រងបាន

20, Jul 2020 , 9:47 am

រូបភាព

ប្រធានប្រតិបត្តិទីក្រុងហុងកុង លោកស្រី ការី ឡាំ។ រូបភាព៖ China Daily

ដោយ: ធៀន ភារិន្ទ

ទីក្រុងហុងកុង នៅថ្ងៃទី១៩ ខែកក្កដា បានរាយការណ៍ថា មានករណីឆ្លង COVID-19 ជាង១០០ករណីថ្មី។ ទាក់ទិននឹងបញ្ហានេះ ប្រធានប្រតិបត្តិហុងកុង លោកស្រី ការី ឡាំ បានលើកឡើងថា ការរាតត្បាតកូរ៉ូណាវីរុសនៅក្នុងទីក្រុង កំពុងស្ថិតក្នុងស្ថានភាពមិនអាចគ្រប់គ្រងបាន។

ចាប់តាំងពីផ្ទុះកូរ៉ូណាវីរុសមក ហុងកុង ត្រូវបានគេស្គាល់ថា គឺជាទីក្រុងដែលមានវិធានការទប់ស្កាត់ការរាតត្បាតនៃCOVID-19 យ៉ាងល្អបំផុត។ ប៉ុន្តែក្នុងរយៈពេលពីរសប្តាហ៍ចុងក្រោយនេះ ករណីឆ្លងនៅក្នុងទីក្រុង បានហក់ឡើងជាថ្មី។ នៅថ្ងៃទី១៩ ខែកក្កដា តួលេខឆ្លងកូរ៉ូណាវីរុសប្រចាំថ្ងៃ បានកើនឡើងដល់ ១០៨ករណី ដែលមានអ្នកឆ្លងក្នុងស្រុកចំនួន ៨៣ករណី និងឆ្លងមកពីបរទេស ២៥ករណី។ តួលេខនេះ គឺជាចំនួនឆ្លងខ្ពស់បំផុត ក្នុងអត្រាឆ្លងក្នុងមួយថ្ងៃ ចាប់តាំងពីផ្ទុះករណីឆ្លងនៅក្នុងទីក្រុង។

ថ្លែងនៅក្នុងសន្និសីទសារព័ត៌មាននៅថ្ងៃទី១៩ ខែកក្កដា ប្រធានប្រតិបត្តិតំបន់រដ្ឋបាលពិសេសហុងកុង លោកស្រី ការី ឡាំ បានបញ្ជាក់ថា ស្ថានការណ៍កូរ៉ូណាវីរុសនៅក្នុងទីក្រុង គឺពិតជាធ្ងន់ធ្ងរណាស់ និងកំពុងស្ថិតក្នុងស្ថានភាព ដែលមិនអាចគ្រប់គ្រងបាន។ លោកស្រីបានទទូចឲ្យប្រជាជនស្នាក់នៅផ្ទះ និងរក្សាគម្លាតសុវត្ថិភាពឲ្យបានម៉ត់ចត់។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

ជាមួយគ្នានេះ ប្រមុខដឹកនាំទីក្រុងហុងកុង ក៏បានលើកឡើងពីវិធានការថ្មីៗមួយចំនួនបន្ថែមទៀតដូចជា គម្រោងតម្រូវឲ្យប្រជាជនពាក់ម៉ាស់ក្នុងអាគារសាធារណៈ និងបទបញ្ជាថ្មី ដែលតម្រូវឲ្យបុគ្គលិករដ្ឋ ដែលបម្រើការក្នុងវិស័យមិនសូវសំខាន់ ត្រូវមកធ្វើការនៅផ្ទះជាដើម។

នៅសប្តាហ៍មុន ទីក្រុងហុងកុង បានប្រកាសពីវិធានការតឹងរ៉ឹងមួយចំនួនរួចហើយដូចជាការរក្សាគម្លាតសុវត្ថិភាព ការបិទមុខជំនួញមួយចំនួនដូចជា បារ កន្លែងហាត់ប្រាណ ក្លឹបរាត្រី និងបញ្ជាឲ្យប្រជាជនហុងកុងទាំងអស់ពាក់ម៉ាស់នៅក្នុងសេវាដឹកជញ្ជូនសាធារណៈ។ បន្ថែមពីលើនេះ ហុងកុង ក៏បានសាងសង់មជ្ឈមណ្ឌលចត្តាឡីស័ក ដែលមានចំនួន ២០០០បន្ទប់ នៅក្បែងតំបន់កម្សាន្ត Disneyland ផង។

សូមបញ្ជាក់ថា គិតមកត្រឹមថ្ងៃទី១៩ ខែកក្កដា ទីក្រុងហុងកុង មានករណីឆ្លងCOVID-19 សរុបចំនួន ១៧៨៨ករណី និងស្លាប់ចំនួន ១២នាក់៕