អន្តរជាតិ
អង់គ្លេស សម្រេចផ្អាកសន្ធិសញ្ញាបត្យាប័នជាមួយហុងកុងដោយគ្មានរយៈពេលកំណត់
លោកDominic Raab រដ្ឋមន្រ្តីការបរទេសអង់គ្លេស ថ្លែងពីការផ្អាកសន្ធិសញ្ញាបត្យាប័នហុងកុង និងអង់គ្លេស នាថ្ងៃទី២០ ខែកក្កដា។ រូបភាព៖ BBC
×![]()
ដោយ: ធៀន ភារិន្ទ
អង់គ្លេស បានសម្រេចផ្អាកសន្ធិសញ្ញាបត្យាប័នជាមួយហុងកុងភ្លាមៗ និងគ្មានពេលកំណត់។ រដ្ឋមន្ត្រីការបរទេសអង់គ្លេស លោក Dominic Raab បានលើកឡើងបែបនេះ នៅថ្ងៃទី២០ ខែកក្កដា។ ទន្ទឹមនេះ លោករដ្ឋមន្ត្រី ក៏បានលើកឡើងពីការផ្អាកការនាំចេញអាវុធមួយចំនួនមកហុងកុងផងដែរ។
ថ្លែងនៅក្នុងសភា រដ្ឋមន្ត្រីការបរទេសអង់គ្លេស លោក Dominic Raap បានលើកឡើងយ៉ាងដូច្នេះថា រដ្ឋាភិបាល សម្រេចផ្អាកសន្ធិសញ្ញាបត្យាប័ន «ភ្លាមៗ និងគ្មានពេលកំណត់» ជាមួយហុងកុង។ ក្នុងន័យនេះ អង់គ្លេស នឹងមិនពិចារណាលើការធ្វើឲ្យកិច្ចព្រមព្រៀងបត្យាប័នមានសុពលឡើងវិញឡើយ។
ច្បាប់សន្តិសុខជាតិហុងកុងដែលទើបចូលធរមានក្ដី បានកំណត់ពីការនាំយកជនសង្ស័យក្រោមបទល្មើសសន្តិសុខជាតិនៅហុងកុង យកទៅកាត់ទោសនៅចិនដីគោក។ បញ្ហានេះ បានធ្វើឲ្យប៉ះពាល់ដល់ការធ្វើបត្យាប័នអ្នកទោសពីអង់គ្លេស ទៅហុងកុង ដោយផ្អែកទៅតាមសន្ធិសញ្ញាបត្យាប័នភាគីទាំងពីរ។ អង់គ្លេសបារម្ភថា ជនដែលត្រូវធ្វើបត្យាប័នពីអង់គ្លេសទៅហុងកុង អាចត្រូវធ្វើបត្យាប័នបន្តទៅចិនដីគោក ដោយផ្អែកទៅតាមច្បាប់សន្តិសុខជាតិថ្មីនេះ។
នៅមុនការសម្រេចផ្អាកសន្ធិសញ្ញាបត្យាប័នរបស់អង់គ្លេស អ្នកនាំពាក្យក្រសួងការបរទេសចិនឯណោះវិញ បានរិះគន់អង់គ្លេសយ៉ាងខ្លាំងថា មិនគោរពមូលដ្ឋានច្បាប់សន្តិសុខជាតិហុងកុង ដែលការពារគោលការណ៍ «ប្រទេសមួយ ប្រព័ន្ធពីរ»។ លើសពីនេះ ចិនបានចាត់ទុកសកម្មភាពរបស់អង់គ្លេស គឺជាការជ្រែតជ្រែកចូលមកក្នុងកិច្ចការផ្ទៃក្នុងរបស់ចិន បំពានច្បាប់អន្តរជាតិ និងបទដ្ឋាននៃទំនាក់ទំនងអន្តរជាតិ។
ក្រៅពីបញ្ជាក់ពីការផ្អាកសន្ធិសញ្ញាបត្យាប័ន អង់គ្លេស ក៏បានប្រកាសពីការផ្អាកការនាំចេញអាវុធមួយចំនួនដូចជា គ្រាប់បែកផ្សែង ប្រដាប់ឆក់ កាំភ្លើងផ្តល់សញ្ញា និងគ្រាប់កាំភ្លើងជាដើម ទៅហុងកុងផងដែរ។ អាវុធប្រភេទនេះ ត្រូវបានអង់គ្លេសហាមនាំចូលមកចិនតាំងពីឆ្នាំ ១៩៨៩មកម្លេះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ការប្រកាសផ្អាកសន្ធិសញ្ញាបត្យាប័ន និងនាំចេញអាវុធមានសក្តានុពលមួយចំនួនបែបនេះ គឺរឹតតែធ្វើឲ្យទំនាក់ទំនងរវាងចិន និងអង់គ្លេសកាន់តែល្អក់កករថែមទៀត ខណៈប្រទេសទាំងពីរ កំពុងមើលមុខគ្នាមិនចំ ដោយសារបញ្ហាដូចជា ប្រព័ន្ធទូរគមនាគមន៍ជំនាន់ទី៥(5G) ការផ្តល់លិខិតឆ្លងដែនឲ្យប្រជាជនហុងកុងមានសិទ្ធិមកតាំងលំនៅក្នុងប្រទេសអង់គ្លេសជាអចិន្ត្រៃយ៍ និងបញ្ហាជនជាតិភាគតិចវីហ្គ័រនៅក្នុងខេត្តស៊ីនជាំងជាដើម។
សូមបញ្ជាក់ថា ក្នុងនាមជាអតីតម្ចាស់អាណានិគមហុងកុង អង់គ្លេសបានរិះគន់ចិនយ៉ាងខ្លាំង ថាច្បាប់សន្តិសុខជាតិហុងកុង គឺលុបបំបាត់សិទ្ធិសេរីភាពរបស់ប្រជាជន និងបំពានសេចក្តីប្រកាសរួមរវាងចិន និងអង់គ្លេសឆ្នាំ១៩៨៤ ដែលបានចែងពីលក្ខខណ្ឌដែលអង់គ្លេសប្រគល់ទឹកដីហុងកុងទៅឲ្យចិន៕
Tag:
អង់គ្លេស
ចិន
ហុងកុង
© រក្សាសិទ្ធិដោយ thmeythmey.com
