COVID-19៖ លោក ឌូទើតេ ព្រមានចាប់ខ្លួនពលរដ្ឋដែលមិនពាក់ម៉ាស់ ឬរក្សាគម្លាតសុវត្ថិភាព

COVID-19

អន្តរជាតិ

COVID-19៖ លោក ឌូទើតេ ព្រមានចាប់ខ្លួនពលរដ្ឋដែលមិនពាក់ម៉ាស់ ឬរក្សាគម្លាតសុវត្ថិភាព

21, Jul 2020 , 9:39 pm

រូបភាព

កម្លាំងប៉ូលិសជិះលើរថយន្តយោធា ដែលបើកកាត់បដាប្រធានាធិបតីហ្វីលីពីននៅក្នុង ក្រុង Navotas រដ្ឋធានីម៉ានីល នាថ្ងៃទី១៧ ខែកក្កដា ឆ្នាំ២០២០។ រូបភាព៖ Reuters

ដោយ: ធៀន ភារិន្ទ

ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៅថ្ងៃទី២១ ខែកក្កដា បានព្រមានចាប់ខ្លួនប្រជាពលរដ្ឋហ្វីលីពីនទាំងឡាយណា ដែលចម្លងកូរ៉ូណាវីរុស មិនពាក់ម៉ាស់ ឬរក្សាគម្លាតសុវត្ថិភាពដើម្បីទប់ស្កាត់ការរាតត្បាត COVID-19 នៅក្នុងប្រទេស។ ការព្រមាននេះ ធ្វើឡើងស្របពេលករណីឆ្លងកូរ៉ូណាវីរុសនៅក្នុងប្រទេស កំពុងហក់ឡើងជាលំដាប់។

ក្នុងរយៈពេលចុងក្រោយនេះ ករណីឆ្លងកូរ៉ូណាវីរុសនៅហ្វីលីពីន បានកើនឡើងជាលំដាប់។ នៅថ្ងៃទី២០ ខែកក្កដា ហ្វីលីពីនមានករណីឆ្លងCOVID-19 ១៥២១ករណី ខណៈអ្នកស្លាប់មានចំនួន ៤នាក់។ តួលេខសរុបរបស់ហ្វីលីពីនមានចំនួន ៦៨៨៩៨ករណី និងអ្នកស្លាប់មានចំនួន ១៨៣៥នាក់។ អត្រានេះ ធ្វើឲ្យហ្វីលីពីន ក្លាយជាប្រទេសមានករណី COVID-19 សរុបច្រើនជាងគេលំដាប់ទី២នៅក្នុងតំបន់អាស៊ីអាគ្នេយ៍ បន្ទាប់ពីឥណ្ឌូណេស៊ី ដែលមានចំនួនសរុបជិត ៩ម៉ឺនករណី។

ពាក់ព័ន្ធនឹងការកើនឡើងករណីឆ្លងនេះ លោក រ៉ូឌ្រីហ្គោ ឌូទើតេ ប្រធានាធិបតីហ្វីលីពីន បានព្រមានចាប់ខ្លួនប្រជាពលរដ្ឋហ្វីលីពីនទាំងឡាយណាដែលចម្លងវីរុសទៅអ្នកដទៃ មិនពាក់ម៉ាស់ និងមិនរក្សាកម្លាតសុវត្ថិភាពជាដើម។ «យើង មិនមានអ្វីត្រូវស្ទាក់ស្ទើរក្នុងការចាប់ខ្លួនមនុស្សនោះទេ»។ លោកប្រធានាធិបតីហ្វីលីពីន បានលើកឡើងបែបនេះ ដោយបន្ថែមថា ការចម្លងកូរ៉ូណាវីរុសទៅអ្នកដទៃ គឺជា «ឧក្រិដ្ឋកម្មធ្ងន់ធ្ងរ»។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

ទន្ទឹមនេះ លោកឌូទើតេ បានបញ្ជាក់ទៀតថា ប្រសិនបើប្រជាជនទាំងឡាយណាត្រូវបានចាប់ខ្លួន និងឃុំខ្លួននៅប៉ុស្តិ៍ប៉ូលិស ជនទាំងនោះ អាចនឹងទទួលមេរៀនគ្រប់ពេលវេលា។ នាខែមេសាកន្លងមក ប្រធានាធិបតីហ្វីលីពីនវ័យ៧៥ឆ្នាំរូបនេះ ធ្លាប់បានព្រមានថា អ្នកបំពានបម្រាមបិទប្រទេស និងបង្កបញ្ហា អាចនឹងត្រូវគេបាញ់សម្លាប់។

ក្នុងស្ថានភាព COVID-19 កំពុងរាតត្បាតក្នុងប្រទេស ក្រសួងសុខាភិបាល ដាក់គោលដៅបង្កើនការតេស្តរក COVID-19 បន្ថែមទត។ តាមរយៈកិច្ចប្រជុំដែលចាក់ផ្សាយលើកញ្ចក់ទូរទស្សន៍ហ្វីលីពីនជាមួយលោកប្រធានាធិបតី លោក Francisco Duque រដ្ឋមន្ត្រីសុខាភិបាល បានលើកឡើងថា ហ្វីលីពីន មានគោលបំណងបង្កើនការធ្វើតេស្តលើមនុស្សឲ្យបាន៣២០០០នាក់ទៅ៤០០០០នាក់ក្នុងមួយថ្ងៃ បើធៀបនឹងពេលបច្ចុប្បន្ន ដែលមានចំនួនធ្វើតេស្តលើមនុស្សពី ២០០០០ ទៅ២៣០០០នាក់ប៉ុណ្ណោះ។

លោករដ្ឋមន្ត្រីរូបនេះបានបន្តថា ហ្វីលីពីន នឹងធ្វើតេស្តរក COVID-19 លើប្រជាជនហ្វីលីពីនឲ្យបាន ១០លាននាក់ គិតត្រឹមត្រីមាសទី២ នៅឆ្នាំក្រោយ។ មកទល់ពេលនេះ ហ្វីលីពីន បានធ្វើតេស្តលើមនុស្សចំនួន១,១លាននាក់ហើយដើម្បីរកកូរ៉ូណាវីរុស។

សូមបញ្ជាក់ថា ហ្វីលីពីន បានបិទតំបន់មួយចំនួនជាថ្មី បន្ទាប់ពីករណីឆ្លង COVID-19 ហក់ឡើង។ ប្រជាជនក្នុងក្រុង Navotas រដ្ឋធានីម៉ានីល ត្រូវបានបិទតាំងពីថ្ងៃទី១៦ ខែកក្កដាចំនួនរយៈពេល ២សប្តាហ៍។ ប្រជាជន ត្រូវអនុញ្ញាតឲ្យចាកចេញពីផ្ទះ ក្នុងករណីទៅទិញរបស់ប្រើប្រាស់ចាំបាច់តែប៉ុណ្ណោះ។ កម្លាំងប៉ូលិស រថយន្តយោធា ក៏ត្រូវបានគេពង្រាយនៅក្នុងតំបន់នេះផងដែរ៕