COVID-19
ជាតិ
រដ្ឋមន្ត្រីកសិកម្ម ប្រាប់មន្រី្ត ឲ្យបង្កើតបណ្ដុំអាជីវកម្មបណ្ដុះបច្ចេកទេស ដើម្បីបង្កើនស្បៀងនិងការនាំចេញ
× ភ្នំពេញ៖ លោក វេង សាខុន រដ្ឋមន្រី្តក្រសួងកសិកម្ម រុក្ខាប្រមាញ់ និង នេសាទ បានណែនាំ ប្រធានមន្ទីរកសិកម្មរាជធានី-ខេត្ត និងអង្គភាពផ្សេងទៀត ដែលស្ថិតក្រោមឱវាទរបស់លោក ឲ្យបង្កើតបណ្ដុំអាជីវកម្មកសិកម្ម ក្រុមសកិករផលិត និងសហគមន៍កសិកម្មបន្ថែមទៀត ដើម្បីបង្កើនផលិតកម្មស្បៀងអាហារ អង្ករ ត្រី សាច់ សម្រាប់បំពេញសេចក្ដីត្រូវការក្នុងស្រុកនិងនាំចេញទៅក្រៅប្រទេស ជាពិសេសនៅក្នុងបរិបទជំងឺកូវីដ-១៩។
តាមរយៈសេចក្ដីណែនាំរបស់ខ្លួន ដែលចេញនៅថ្ងៃទី២១ កក្កដា លោកក្រសួងកសិកម្ម បានណែនាំឲ្យបណ្តាមន្ត្រី ជួយដោះស្រាយបញ្ហាដែលប្រជាកសិករ កំពុងជួប ជាពិសេសផ្នែកទីផ្សារលក់ផលិតផល។ ដើម្បីជួយបញ្ហានេះបាន លោក បានប្រាប់មន្ត្រី ឲ្យអនុវត្តវិធានការចាំបាច់មួយចំនួន ដោយផ្ដោតលើការបង្កើតបណ្ដុំអាជីវកម្ម បច្ចេកទេសកសិកម្ម រួមទាំងការទប់ស្កាត់ការនាំចូលជាដើម។
វិធានការដែលត្រូវអនុវត្ត គឺត្រូវរៀបចំបង្កើតបន្ថែមនូវបណ្ដុំអាជីវកម្មកសិកម្ម ក្រុមកសិករផលិត និងសហគមន៍កសិកម្មឲ្យបានកាន់តែច្រើនឡើង ដើម្បីមានសមត្ថភាពផ្គត់ផ្គង់និងការចរចាថ្លៃ ជាមួយអ្នកប្រមូលទិញផលិតផលកសិកម្ម។ ការធ្វើបែបនេះ ជាការលើកទឹកចិត្តប្រជាកសិករនឹងធ្វើឲ្យការដាំដុះដំណាំស្បៀង ការចិញ្ចឹមសត្វ និង វារីវប្បកម្មកាន់តែសកម្មហើយមិនព្រួយបារម្ភពីបញ្ហាទីផ្សារ។ ទន្ទឹមនឹងនេះ ត្រូវខិតខំបន្តរៀបចំផែនការផលិតរបស់ក្រុមបណ្ដុំអាជីវកម្មកសិកម្ម ក្រុមកសិករផលិត និងសហគមន៍កសិកម្ម ឲ្យផលិតស្របតាមតម្រូវការនិងពេលវេលាដែលប្រមូលទិញរបស់ក្រុមហ៊ុនឬអ្នកប្រមូលទិញ។
ជាមួយគ្នាដែរ លោករដ្ឋមន្រី្ត ក៏បានណែនាំឲ្យបណ្ដុះបណ្ដាល ផ្សព្វផ្សាយបច្ចេកទេស ឲ្យបានសកម្មដល់ក្រុមបណ្ដុ អាជីវកម្មកសិកម្ម ក្រុមកសិករផលិត និងសហគមន៍កសិកម្ម ដើម្បីពង្រឹងសមត្ថភាពបច្ចេកទេសនិងការគ្រប់គ្រងឲ្យមានប្រសិទ្ធភាពខ្ពស់។ មន្រី្តទាំងអស់ត្រូវសហការឲ្យបានជិតស្និទ្ធជាមួយក្រសួង ស្ថាប័ន និងអង្គភាពមានសមត្ថកិច្ចពាក់ព័ន្ធ ដើម្បីសម្រួលដល់ ក្រុមបណ្ដុំអាជីវកម្មកសិកម្ម ក្រុមកសិករផលិត និងសហគមន៍កសិកម្ម ឲ្យទទួលបានឥណទានមានអត្រាការប្រាក់ទាបពីធនាគារអភិវឌ្ឍន៍ជនបទ។ លើសពីនេះ រដ្ឋបាលជលផលត្រូវពិនិត្យឲ្យបានគ្រប់ជ្រុងជ្រោយ នូវសំណើសុំនាំចូលផល ផលិតផលជលផលពីបរទេស ដោយមិនត្រូវអនុញ្ញាតឲ្យនាំចូលនូវផល ផលិតផលជលផលដែលមានការប្រកួតប្រជែងខ្លាំងជាមួយផលផលិតផលវារីវប្បកម្មក្នុងស្រុកឡើយ៕
© រក្សាសិទ្ធិដោយ thmeythmey.com