COVID-19
អន្តរជាតិ
អភិបាលក្រុងតូក្យូ ប្រាប់ពលរដ្ឋនៅផ្ទះអំឡុងថ្ងៃឈប់ ខណៈករណី COVID-19 ហក់ឡើង អភិបាលក្រុង តូក្យូ អ្នកស្រី Yuriko Koike (AFP)
× អភិបាលក្រុង តូក្យូ អ្នកស្រី Yuriko Koike បានទទូចឲ្យប្រជាជនជប៉ុនស្នាក់នៅផ្ទះ អំឡុងថ្ងៃឈប់សម្រាករយៈពេល៤ថ្ងៃ (បូកទាំងថ្ងៃចុងសប្តាហ៍) ដែលចាប់ផ្ដើមនាថ្ងៃទី២៣ ខែកក្កដាតទៅ។ ការអំពាវនាវនេះ ធ្វើឡើងខណៈតួលេខឆ្លង COVID-19 ក្នុងទីក្រុងនេះ បន្តហក់ឡើង។
ទីក្រុងតូក្យូ ដែលមានប្រជាជនរស់នៅជាង៩លាននាក់ ស្ថិតក្នុងកម្រិតប្រកាសអាសន្នសម្រាប់ជំងឺ COVID-19 ដោយអ្នកជំនាញព្រមានថា ករណីឆ្លង អាចនឹងកើនឡើងលឿនរហ័សនាពេលខាងមុខ។
អំឡុងកិច្ចប្រជុំជាមួយអ្នកជំនាញ COVID-19 នៅថ្ងៃទី ២២ ខែកក្កដា អ្នកស្រីអភិបាល Koike និយាយថា ករណីឆ្លងCOVID-19 កំពុងរាលដាល មិនត្រឹមតែក្នុងចំណោមមនុស្សវ័យក្មេងប៉ុណ្ណោះទេ តែក៏ឆ្លងក្នុងចំណោមនុស្សវ័យកណ្ដាលនិងវ័យចំណាស់ផងដែរ។
មួយថ្ងៃមុនថ្ងៃឈប់សម្រាកចាប់ផ្ដើម អ្នកស្រី អះអាងដូច្នេះថា៖«ខ្ញុំចង់ស្នើសុំឲ្យប្រជាជនតូក្យូកុំចេញទៅខាងក្រៅផ្ទះ ជាពិសេស មនុស្សចាស់ និងអ្នកដែលមានជំងឺជាប់ខ្លួនស្រាប់»។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
អ្នកស្រី Koike បញ្ជាក់ទៀតថា ករណីឆ្លង COVID-19 កើតឡើងក្នុងភោជនីយដ្ឋាន និងរោងកុន ហើយក៏មានករណីឆ្លងជាចង្កោម ត្រូវបានរាយការណ៍នៅកន្លែងធ្វើការ និងសាលារៀនផងដែរ។
ទីក្រុង តូក្យូ នៅថ្ងៃទី ២១ ខែកក្កដា បានរាយការណ៍ករណីឆ្លងថ្មី ២៣៧ករណី ដែលធ្វើឲ្យករណីឆ្លងសរុបក្នុងទីក្រុងនេះឡើងដល់ ៩៨១៦ករណីហើយ ។ ចំណែកនៅថ្ងៃចន្ទដើមសប្តាហ៍នេះ ករណីឆ្លងថ្មី ១៦៨ករណី ត្រូវបានរាយការណ៍ក្នុងទីក្រុង តូក្យូ ។ បច្ចុប្បន្ន ប្រទេស ជប៉ុន មានករណីឆ្លង COVID-19 សរុប ២៦ ៣០០ ករណី និងអ្នកស្លាប់ជិត១០០០នាក់៕
© រក្សាសិទ្ធិដោយ thmeythmey.com