COVID-19
កីឡាអន្តរជាតិ
អន្តរជាតិ
អ្នករៀបចំថា អូឡាំពិកតូក្យូនឹងដំណើរការរលូន ក្រោយវ៉ាក់សាំងកូវីដ-១៩ ចេញជាពន្លឺ
× ការបង្កើតវ៉ាក់សាំងការពារមេរោគ និងការព្យាបាលជំងឺ COVID-19 គឺជាគន្លឹះសំខាន់ក្នុងការអនុញ្ជាតឲ្យព្រឹត្តិការណ៍កីឡាអូឡាំពិកក្រុងតូក្យូឆ្នាំ ២០២០ ដែលបានពន្យារពេលមួយឆ្នាំ អាចដំណើរការយ៉ាងរលូននៅឆ្នាំ២០២១។ នេះបើតាមការអះអាងរបស់លោក Yoshiro Mori ប្រធានគណៈកម្មាធិការរៀបចំកីឡាអូឡាំពិកជប៉ុន នៅថ្ងៃទី២២ ខែកក្កដា។
នៅពេលសួរថា តើទីក្រុងតូក្យូនៅតែអាចរៀបចំព្រឹត្តិការណ៍កីឡាលំដាប់ពិភពលោកនេះបានទេប្រសិនបើស្ថានភាពជំងឺរាតត្បាតសកលដ៏កាចសាហាវនេះនៅតែមិនផ្លាស់ប្តូរ លោក Mori បានឆ្លើយថា ប្រសិនបើអ្វីៗនៅតែបន្តដូចពេលបច្ចុប្បន្ននេះ អូឡាំពិកនឹងមិនអាចធ្វើបានឡើយ។
លោក Mori ឆ្លើយដូច្នេះនៅក្នុងបទសម្ភាសជាមួយទូរទស្សន៍ជាតិជប៉ុន NHK ដែលបានចេញផ្សាយនៅថ្ងៃទី២២ ខែកក្កដានេះ។ លោកបន្ថែមថា៖ «តែបើវ៉ាក់សាំង ឬថ្នាំត្រូវបានបង្កើតឡើងទាន់ពេល នោះព្រឹត្តិការណ៍កីឡាដែលត្រូវបានពន្យារទៅឆ្នាំ២០២១នេះ នឹងដំណើរការប្រកួតបានដោយរលូន»។ មិនតែប៉ុណ្ណោះ ប្រធានគណៈកម្មាធិការរៀបចំកីឡាអូឡាំពិកជប៉ុនរូបនេះ ថែមទាំងហ៊ានអះអាងថា ស្ថានភាពដូចសព្វថ្ងៃនេះនឹងមិនបន្តដល់រយៈពេលមួយឆ្នាំទៀតនោះទេ។
ការលើកឡើងរបស់លោក Mori ខាងលើ កើតឡើងបន្ទាប់ពីក្រុមហ៊ុនឱសថឯកជនចិនមួយឈ្មោះ Sinovac បានអភិវឌ្ឍវ៉ាក់សាំងប្រឆាំងជំងឺ COVID-19 មួយប្រភេទ ហើយបានឈានដល់ការធ្វើតេស្តដំណាក់កាលទី៣ នៅក្នុងប្រទេសប្រេស៊ីល ដែលមានករណីឆ្លងច្រើននោះ។
បើតាមការផ្សាយរបស់ទីភ្នាក់ងារព័ត៌មាន AFP វ៉ាក់សាំងដែលមានឈ្មោះថា CoronaVac ត្រូវដាក់ឲ្យធ្វើតេស្តលើគ្រូពេទ្យប្រស៊ីលចំនួន ៩ពាន់នាក់ ដែលមកពីរដ្ឋចំនួន៦ផ្សេងគ្នា។ គ្រូពេទ្យម្នាក់ៗនឹងទទួលបានវ៉ាក់សាំងចំនួន២ដូស ក្នុងរយៈពេល៣ខែ ហើយត្រូវស្ថិតក្រោមការសិក្សាយ៉ាងហ្មត់ចត់។ លោក Joao Doria អភិបាលក្រុង Sao Paulo ប្រទេសប្រេស៊ីល អះអាងថា គេអាចនឹងទទួលបានលទ្ធផលបឋមនៅក្នុងរយៈពេល៩០ថ្ងៃខាងមុខទៀត។
ដោយសារតែ ជំងឺរលាកសួតបង្កដោយកូរ៉ូណាវីរុសប្រភេទថ្មី បានបង្ខំឲ្យជប៉ុនពន្យារពេល រៀបចំកីឡាអូឡាំពិកឆ្នាំ២០២០ រយៈពេលមួយឆ្នាំ ពោលគឺត្រូវទៅធ្វើនៅថ្ងៃទី២៣ ខែកក្កដា ឆ្នាំ២០២១ វិញ។ កាលណោះ លោក Mori ក៏ធ្លាប់បាននិយាយដែរថា នឹងគ្មានការពន្យារពេលជាលើកទីពីរឡើយសម្រាប់កីឡាអូឡាំពិកនេះ ប្រសិនបើ COVID-19 នៅតែមិនអាចគ្រប់គ្រងបានដល់ឆ្នាំក្រោយ។
លោក Yoshiro Mori ប្រធានគណៈកម្មាធិការរៀបចំកីឡាអូឡាំពិកជប៉ុន
ក្រៅតែពីវ៉ាក់សាំង CoronaVac ដែលឈានដល់ការធ្វើតេស្តចុងក្រោយ ក៏មានវ៉ាក់សាំងចំនួន២ទៀតដែលស្ថិតក្នុងការធ្វើតេស្តដំណាក់កាលចុងក្រោយដូចគ្នាផងដែររ។ វ៉ាក់សាំងទាំងពីរនោះ មានវ៉ាក់សាំងដែលបង្កើតដោយសាកលវិទ្យាល័យ Oxford និងក្រុមហ៊ុនឱសថ AstraZeneca ដែលកំពុងធ្វើតេស្តនៅប្រទេសអង់គ្លេស និងអាហ្វ្រិកខាងត្បូង។ ឯវ៉ាក់សាំងផលិតដោយក្រុមហ៊ុនឱសថ Sinopharm បានចាប់ផ្តើមធ្វើតេស្តនៅអេមីរ៉ាតអារ៉ាប់រួម។
រហូតមកទល់ពេលនេះ ជប៉ុនមានករណីឆ្លង COVID-19 ចំនួនជាង ២៦០០០ករណី ក្នុងនោះអ្នកស្លាប់កើនជិត១ពាន់នាក់ និងសះស្បើយជាង២ម៉ឺននាក់។ អ្វីដែលគួរកត់សំគាល់ សព្វថ្ងៃ ចំណោមក្រុងទាំងអស់នៅជប៉ុន មានតែក្រុងតូក្យូទេដែលមានការកើនឡើង COVID-19 ខ្លាំងសារជាថ្មី៕
Tag:
COVID-19
កីឡាអូឡាំពិក
Yoshiro Mori
© រក្សាសិទ្ធិដោយ thmeythmey.com