អន្តរជាតិ
សត្វពង្រូល។ រូបភាព៖ AFP
×![]()
ដោយ: ធៀន ភារិន្ទ
វៀតណាម ដែលត្រូវបានគេស្គាល់ថាជាប្រទេសបរិភោគសាច់សត្វព្រៃដ៏ធំមួយនៅក្នុងតំបន់អាស៊ី នៅថ្ងៃទី២៣ ខែកក្កដា បានបញ្ជាឲ្យផ្អាកការនាំចូលសត្វព្រៃគ្រប់ប្រភេទទាំងអស់ ពោលគឺមិនថាងាប់ ឬរស់។ លើសពីនេះ ប្រទេសអាស៊ីអាគ្នេយ៍មួយនេះ ក៏បានប្តេជ្ញាលុបបំបាត់ទីផ្សារងងឹតលក់សត្វព្រៃនៅទូទាំងប្រទេសផងដែរ។
នាយករដ្ឋមន្ត្រីវៀតណាម លោក Nguyen Xuan Phuc ជាអ្នកចេញលិខិតបញ្ជាឲ្យផ្អាកការនាំចូលសត្វព្រៃគ្រប់ប្រភេទ ពោលគឺមិនថាងាប់ ឬរស់ ពងសត្វព្រៃ និងសារធាតុដែលចម្រាញ់ពីសត្វព្រៃ។
បទបញ្ជាដដែលនេះ ក៏បានបង្គាប់ឲ្យប្រជាជន និងមន្ត្រីវៀតណាមទាំងអស់ មិនត្រូវចូលរួមក្នុងសកម្មភាពខុសច្បាប់ ដូចជាការបរបាញ់សត្វព្រៃ ទិញសត្វព្រៃ លក់សត្វព្រៃ ឬដឹកជញ្ជូនសត្វព្រៃទាំងនេះឡើយ។ ក្រៅពីហាមប្រជាជន និងមន្ត្រីខ្លួន វៀតណាមក៏បានប្តេជ្ញាលុបបំបាត់ទីផ្សារ ឬទីតាំងជំនួញ ដែលលក់សត្វព្រៃខុសច្បាប់ផងដែរ។ ចំណែកបរបាញ់សត្វព្រៃ ការដឹកជញ្ជូនខុសច្បាប់ ការទុកសត្វព្រៃ និងការផ្សព្វផ្សាយពីការលក់សត្វព្រៃ បក្សី និងសត្វល្មូន នឹងត្រូវរងការបង្ក្រាបពីសំណាក់អាជ្ញាធរ។
ការចេញបញ្ជាឲ្យផ្អាកការធ្វើជំនួញសត្វព្រៃនៅក្នុងប្រទេស និងនាំចូលមកវៀតណាមនេះ ត្រូវបានក្រុមអ្នកអភិរក្សសត្វព្រៃ សាទរយ៉ាងខ្លាំង ព្រោះកន្លងមកអាជ្ញាធរវៀតណាម បានបិទភ្នែក បិទត្រចៀកលើបញ្ហាជួញដូរសត្វព្រៃនេះ។ បើតាមអះអាងរបស់លោក Steven Glaster ប្រធានក្រុមប្រឆាំងការជួញដូរ Freeland ជំនួញសត្វព្រៃ ត្រូវតែហាមឃាត់ ដោយសារវាជារឿងសន្តិសុខសុខភាពសាធារណៈ និងអន្តរជាតិ។
យ៉ាងណាក៏ដោយ ក្រុមអ្នកអភិរក្សសត្វព្រៃ ក៏បានព្រមានពីបញ្ហាមួយចំនួនផងដែរ ដែលទាមទារឲ្យរដ្ឋាភិបាលវៀតណាមយកចិត្តទុកដាក់ ក្នុងនោះមានដូចជា ឧបសគ្គនៅតាមព្រំដែន និងប្រាក់ខែរបស់មន្ត្រីតិច ដែលបង្កឲ្យមានការសូកលុយជាដើម។
សូមបញ្ជាក់ថា បទបញ្ជាហាមឃាត់ការធ្វើជំនួញសត្វព្រៃរបស់វៀតណាមនេះ ធ្វើឡើងតាមការស្នើសុំរបស់អង្គការក្រៅរដ្ឋាភិបាលដែលពាក់ព័ន្ធនឹងការអភិរក្សសត្វព្រៃ ចំនួន១៤អង្គការ ដើម្បីទប់ស្កាត់ការរាតត្បាត COVID-19 នៅក្នុងប្រទេស៕
Tag:
វៀតណាម
© រក្សាសិទ្ធិដោយ thmeythmey.com
