អន្តរជាតិ
សិស្សវិទ្យាល័យ ក៏ធ្វើបាតុកម្មប្រឆាំងលោក ប្រាយុទ្ធ ដែរ រូបភាព Bangkok Post
× បាតុកម្មទាមទារឲ្យលោកនាយករដ្ឋមន្ត្រី ប្រាយុទ្ធ ចន្ទអូចា លាលែងពីតំណែង និងកែរដ្ឋធម្មនុញ្ញតាក់តែងដោយយោធា បន្តធ្វើនៅឡើងនៅថ្ងៃទី២៤ ខែកក្កដា។ អ្វីគួរឲ្យកត់សម្គាល់នោះ គេឃើញមានសិស្សថ្នាក់វិទ្យាល័យតវ៉ាប្រឆាំងមេដឹកនាំបច្ចុប្បន្នរបស់ខ្លួនផងដែរ។ ប្រមុខកងទ័ពថៃ Apirat Kongsompong បានដាស់តឿនបាតុករឲ្យប្រុងប្រយ័ត្នចំពោះការបញ្ចេញសាររបស់ពួកគេ ពិសេសកុំប៉ះពាល់ស្ថាប័នព្រះមហាក្សត្រឲ្យសោះ។
ការតវ៉ាប្រឆាំងរដ្ឋាភិបាលនាយករដ្ឋមន្ត្រី ប្រាយុទ្ធ ចន្ទអូចា បានកម្រើកឡើងវិញជាបន្តបន្ទាប់ ក្រោយការប្រមូលផ្តុំទ្រង់ទ្រាយធំកាលពីសប្ដាហ៍មុន។ ក្រុមបាតុករ បានប្រមូលផ្ដុំនៅកន្លែងផ្សេងគ្នានៅរាជធានីបាងកក និងតាមខេត្តខ្លះទៀត។
បើតាមកាសែតបាងកកប៉ុស្តិ៍ សិស្សថ្នាក់វិទ្យាល័យមួយក្រុមបានជួបជុំគ្នានៅក្រោមតំណក់ទឹកភ្លៀងវិទ្យាល័យ Triam Udom Suksa នៅថ្ងៃទី២៤ ខែកក្កដា ដើម្បីគាំទ្រការតវ៉ាប្រឆាំងរដ្ឋាភិបាលលោក ប្រាយុទ្ធ ខណៈការតវ៉ាក៏ត្រូវបានរៀបចំនៅសាកលវិទ្យាល័យ Kasetsart ផងដែរ។ ពួកគេគ្នាលើកក្រដាសបង្ហាញពីការមិនពេញចិត្តរបស់ខ្លួន និងបើកពិលនៅលើទូរសព្ទដៃរបស់ពួកគេ។ ពន្លឺពិលនេះ ក្លាយជាសញ្ញាសម្គាល់ក្នុងការតវ៉ារបស់បាតុករដែលទាមទារឲ្យលោក ប្រាយុទ្ធ រំលាយសភា លុបបំបាត់ការបង្ក្រាបអ្នករិះគន់ និងចាប់ផ្ដើមសរសេររដ្ឋធម្មនុញ្ញឡើងវិញ។
នៅខេត្ត Udon Thani ឯណោះ ប៉ូលិសបានរាប់ចំនួនបាតុករប្រមាណ៥០០នាក់ដែលជួបជុំគ្នាតវ៉ាផងដែរ ដែលភាគច្រើនជានិស្សិតសាកលវិទ្យាល័យ និងសិស្សវិទ្យាល័យ។ បាតុកម្មដូចគ្នានេះ ក៏មាននៅខេត្ត Nakhon Ratchasima តែចំនួនអ្នកចូលរួមមានច្រើនជាងគេ។ កម្មវត្ថុក៏មិនខុសគ្នាពីការតវ៉ានៅទីតាំងផ្សេងដែរ គឺទាមទារឲ្យលោក ប្រាយុទ្ធ លាលែងពីតំណែងដែលបានមកពីរដ្ឋធម្មនុញ្ញក្រុមរបស់លោកសរសេរដែលធ្វើឲ្យលោកបន្តកាន់អំណាចដល់សព្វថ្ងៃ។
នៅថ្ងៃដដែលនោះ គេក៏ឃើញមានបាតុករមួយក្រុមទៀតពាក់អាវលឿង ប្រមូលផ្ដុំខាងមុខទីបញ្ជាការកងទ័ពជើងគោកថៃ ទីដែលក្រុមបាតុកម្មប្រឆាំងរដ្ឋាភិបាលជួបជុំនៅដើមសប្ដាហ៍នេះ។ ពួកគេបានដាក់ញ្ញត្តិមួយច្បាប់ឲ្យមេបញ្ជាការកងទ័ពជើងគោកលោក Apirat Kongsompong តាមដានសាររបស់បាតុករម្ខាងទៀតដែលពាក់ព័ន្ធស្ថាប័នកំពូលរបស់ថៃ។ បើតាមបាងកកប៉ុស្តិ៍ លោក Apirat បានព្រមានបាតុករកុំធ្វើអ្វីហួសពីសិទ្ធិបញ្ចេញមតិរបស់ពួកគេ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com