ជាតិ
ASPIRE និង IFAD រួមគ្នាបង្កើតបណ្ដុំអាជីវកម្មកសិកម្ម ជួយកសិករជិត៨០០គ្រួសារ ក្នុងខេត្តកណ្ដាល
× ខេត្តកណ្តាល មានបណ្ដុំអាជីវកម្មកសិកម្ម ៤ប្រភេទ ក្នុងនោះមាន ២៤បណ្ដុំកសិករសរុប ៧៦១ គ្រួសារ។ នេះបើតាមលោក គង់ សោភ័ណ្ឌ អភិបាលខេត្តកណ្ដាល នាឱកាសធ្វើទស្សនកិច្ចជំរុញផលិតកម្មកសិកម្ម នៅឃុំសន្លុង និងឃុំជ័យធំ ស្រុកខ្សាច់កណ្តាល ខេត្តកណ្តាល នៅថ្ងៃទី ២៤ ខែកក្កដា ឆ្នាំ២០២០។
បើតាមលោកអភិបាលខេត្ត បណ្តុំអាជីវកម្មកសិកម្មនេះ ជាការសហការពីកម្មវិធីថ្មីធន់នឹងការប្រែប្រួលអាកាសធាតុ (ASPIRE) ដែលទទួលបានមូលនិធិពីរាជរដ្ឋាភិបាលកម្ពុជា និងហិរញ្ញប្បទានពីមូលនិធិអន្ដរជាតិ សម្រាប់ការអភិវឌ្ឍន៍កសិកម្ម (IFAD) ។
បើតាមរដ្ឋបាលខេត្តកណ្ដាលប្រភេទបណ្ដុំអាជីវកម្មកសិកម្មទាំង ៤ប្រភេទមាន៖ បណ្ដុំអាជីវកម្មមាន់មាន ៨បណ្ដុំ, បណ្ដុំអាជីវកម្មបន្លែមាន ៩បណ្ដុំ, បណ្ដុំអាជីវកម្មស្រូវមាន ៦បណ្ដុំ, និងបណ្ដុំអាជីវកម្មផ្សិតមាន ១បណ្ដុំ។ របាយការណ៍របស់មន្ទីរកសិកម្ម ស្រុកខ្សាច់កណ្ដាល ក្នុងចំណោមផលិតកម្ម និងអាជីវកម្មមាន់ស្រែ បន្លែ ស្រូវ ផ្សិត និងឈូក អាជីវកម្មមាន់ស្រែមានភាពរីកចម្រើនជាងគេ។
នាដំណើរទស្សនកិច្ចនោះ លោក គង់ សោភ័ណ្ឌ បានលើកទឹកចិត្ត និងគាំទ្រដល់កសិករ ដោយពង្រីក និងបង្កើតប្រភេទបណ្ដុំអាជីវកម្មកសិកម្មបន្ថែមទៀត ដូចជា ការចិញ្ចឹមសត្វ មានគោ ជ្រូក មាន់ ទា ជាដើម ឱ្យបានទូទាំងខេត្តកណ្ដាល៕
លោក គង់ សោភ័ណ្ឌ អភិបាលខេត្តកណ្ដាល
© រក្សាសិទ្ធិដោយ thmeythmey.com