អន្តរជាតិ
វៀតណាម សុំឲ្យនូវែលសេឡង់ បើកទីផ្សារឲ្យខ្លួនកាន់តែធំ ក្រោយភាគីទាំងពីរក្លាយជាដៃគូយុទ្ធសាស្ត្រថ្មី នាយករដ្ឋមន្រ្តីវៀតណាម ង្វៀន ស៊ួនហ្វុក។ រូបភាព VNA
× រដ្ឋាភិបាលវៀតណាម បានស្នើត្រង់ៗទៅកាន់រដ្ឋាភិបាលនូវែលសេឡង់ឲ្យបើកចំហទីផ្សាររបស់ខ្លួន សម្រាប់វៀតណាមឲ្យកាន់តែទូលាយ ក្នុងការធ្វើកិច្ចសហប្រតិបត្តិការទ្វេភាគីពិសេសលើផលិតផលកសិកម្ម និងការកសាងអត្តសញ្ញាណពាណិជ្ជកម្ម។ វៀតណាម រំពឹងថារដ្ឋាភិបាលទាំងពីរ នឹងអាចធ្វើកិច្ចសហប្រតិបត្តិការកាន់តែសម្បូរបែប តាមក្របខណ្ឌពាណិជ្ជកម្មទ្វេភាគី និងពហុភាគី។
ថ្ងៃ២២ កក្កដា កន្លងទៅ គឺជាកំណត់ព្រឹត្តិការណ៍ប្រវត្តិសាស្ត្រមួយ របស់វៀតណាមជាមួយនឹងនូវែលសេឡង់។ នោះ គឺរដ្ឋាភិបាលប្រទេសទាំងពីរ បានសម្រេចដំឡើងកិច្ចសហប្រតិបត្តិការទ្វេភាគីជាភាពជាដៃគូយុទ្ធសាស្ត្រ ដែលជាការបើកផ្លូវមួយសម្រាប់ការកសាងទំនាក់ទំនងប្រទេសទាំងពីរឲ្យកាន់តែជិតស្និទ្ធ និងគ្រប់ជ្រុងជ្រោយ ខណៈដែលភាគីទាំងពីរ ស្ថិតក្នុងក្របខណ្ឌសហប្រតិបត្តិការជាមួយគ្នាច្រើនស្រាប់ហើយនោះ។
តាមការចុះផ្សាយរបស់សារព័ត៌មាន Vietnam News ក្នុងបរិការណ៍នៃការកសាងទំនាក់ទំនងថ្មីនេះ នាយករដ្ឋមន្ត្រីវៀតណាម បានស្នើឲ្យរដ្ឋាភិបាលទាំងពីរ បន្តរក្សាកំណើនទំហំពាណិជ្ជកម្មទ្វេភាគីក្នុងទំហំ ២ ពាន់លានដុល្លារប្រចាំឆ្នាំ និងចង់ឲ្យនូវែលសេឡង់ បើកទីផ្សារឲ្យកាន់តែទូលាយ សម្រាប់ផលិតផលកសិកម្មវៀតណាម និងចែករំលែកបទពិសោធន៍ នៃការកសាងសញ្ញាពាណិជ្ជកម្ម ក៏ដូចជាជួយជំរុញផ្លែឈើវៀតណាម អាចចូលទៅកាន់ទីផ្សារបានកាន់តែច្រើនផងដែរ។
បើតាមសេចក្តីថ្លែងការណ៍របស់ក្រសួងការបរទេសនូវែលសេឡង់ ការលើកកម្ពស់ទំនាក់ទំនងទ្វេភាគី ក្នុងកម្រិតកំពូលមួយនេះ គឺជាការទទួលស្គាល់ពីកំណើនដ៏រឹងមាំ របស់ប្រទេសទាំងពីរទាំងក្នុងកិច្ចការនយោបាយ ពាណិជ្ជកម្ម ការពារ និងសន្តិសុខ និងទំនាក់ទំនង រវាងប្រជាជន និងប្រជាជន។ ក្នុងក្រសែភ្នែកនូវែលសេឡង់ វៀតណាម នឹងក្លាយជាប្រទេសសេដ្ឋកិច្ចមួយ ក្នុងតំបន់អាស៊ី ដែលមានការលូតលាស់លឿនជាងគេ ក្នុងរយៈពេលបី បួនឆ្នាំខាងមុខ។
គួរជម្រាបបន្តិចថា ក្រៅពីមានទំនាក់ទំនងជិតស្និទ្ធ ក្នុងក្របខណ្ឌទ្វេភាគី វៀតណាម និងនូវែលសេឡង់ ក៏មានកិច្ចសហប្រតិបត្តិការរួមគ្ នាក្នុងក្របខណ្ឌពាណិជ្ជកម្មធំៗក្នុងតំបន់ ដូចជា ក្របខណ្ឌ អាស៊ាន-នូវែលសេឡង់, ភាពជាដៃគូអភិវឌ្ឍគ្រប់ជ្រុងជ្រោយអន្តរប៉ាស៊ីហ្វិក (CPTPP) ក៏ដូចជាក្របខណ្ឌភាពដៃគូសេដ្ឋកិច្ចគ្រប់ជ្រុងជ្រោយ ក្នុងតំបន់ (RCEP) ផងដែរ៕
Tag:
វៀតណាម
ណូវែលហ្សេឡង់
© រក្សាសិទ្ធិដោយ thmeythmey.com