លោក លី សៀនឡុង ថា នឹងផ្ទេរតំណែងឲ្យអ្នកជំនាន់ក្រោយ ពេលចប់ COVID-19

COVID-19

អន្តរជាតិ

លោក លី សៀនឡុង ថា នឹងផ្ទេរតំណែងឲ្យអ្នកជំនាន់ក្រោយ ពេលចប់ COVID-19

28, Jul 2020 , 8:29 pm

រូបភាព

លោក ហេង ស្វីគៀត (ឆ្វេង) កំពុងស្បថចូលកាន់តំណែងជាឧបនាយករដ្ឋមន្រ្តីក្នុងពិធីថ្ងៃទី២៧ ខែកក្កដា ដែលមាននាយករដ្ឋមន្រ្តី លី សៀនឡុង (កណ្ដាល) និងប្រធានាធិបតី ហាលីម៉ា យ៉ាកុប (ស្ដាំ) ធ្វើជាអធិបតី។

ដោយ: តន ចាន់រិទ្ធារ៉ា

នាយករដ្ឋមន្ត្រីសិង្ហបុរី លោក លី សៀនឡុង និយាយនៅថ្ងៃទី២៧ ខែកក្កដា ថា លោកនឹងដឹកនាំសិង្ហបុរីឲ្យចេញពីវិបត្តិជំងឺ COVID-19 ហើយរៀបចំប្រទេសឲ្យស្រេចបាច់ មុននឹងផ្ទេរតំណែងទៅឲ្យអ្នកជំនាន់ក្រោយ។ សម្រាប់លោក លី ថ្នាក់ដឹកនាំសិង្ហបុរី ត្រូវតែមានការគោរពពីសំណាក់ប្រជាជន និងអាចដឹកនាំប្រជាជនឲ្យសម្រេចលទ្ធផលរួមគ្នា។

ការរាលដាលជំងឺ COVID-19 ទំនងជាបានបង្អាក់ផែនការផ្ទេរតំណែងរបស់លោក លី សៀនឡុង នាយករដ្ឋមន្ត្រីទីបីរបស់សិង្ហបុរី។ លោក លី កូនប្រុសបង្កើតស្ថាបនិកសិង្ហបុរីលោក លី ក្វាន់ យូ ធ្លាប់ប្រកាសហើយថា លោកនឹងចុះចេញពីតំណែងនៅមុនអាយុ៧០ឆ្នាំ។

ខណៈជំងឺCOVID-19 នៅមិនទាន់សាបរលាបនោះ លោក លី បានទុកផែនការនេះមួយឡែកសិន ហើយផ្ដោតការងារសំខាន់លើការប្រយុទ្ធប្រឆាំងជំងឺរាលដាលសាកលមួយនេះ និងធ្វើយ៉ាងណាឲ្យសិង្ហបុរីរៀបរយពេលលោកចាកចេញ។ ថ្លែងក្នុងពិធីស្បថចូលកាន់តំណែងជានាយករដ្ឋមន្ត្រីសិង្ហបុរី លោក លី ដែលមានវ័យ៦៨ឆ្នាំទៅហើយនោះ បញ្ជាក់ថា ដឹកនាំសិង្ហបុរីឲ្យឆ្លងផុតវិបត្តិ COVID-19 ជាគោលដៅធំចម្បងមួយ។

បន្ទាប់ពីនោះ លោក ក៏នឹងប្រគល់សិង្ហបុរីដែលមានសណ្ដាប់ធ្នាប់ធ្វើការត្រឹមត្រូវ ទៅឲ្យអ្នកដែលមានសមត្ថភាពដឹកនាំប្រទេសឆ្ពោះទៅមុខ។ អ្នកស្នងតំណែងពីលោក លី ត្រូវបានកំណត់រួចហើយ គឺលោក ហេង ស្វីគៀត ដែលជាឧបនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុផង។ លោក ហេង ត្រូវបានជ្រើសរើសចេញពីក្រុមមន្ត្រីវ័យក្មេងដែលត្រូវបានស្គាល់ថាថ្នាក់ដឹកនាំជំនាន់ទីបួន ដែលកំពុងកាន់តំណែងសំខាន់ក្នុងរដ្ឋាភិបាលរបស់លោក លី ស្រាប់។

«ខ្ញុំស្នើប្រជាជនសិង្ហបុរីទាំងអស់ផ្ដល់ការគាំទ្រដល់រដ្ឋមន្ត្រីវ័យក្មេងដូចដែលធ្លាប់ផ្ដល់ឲ្យខ្ញុំអស់ពេលជាច្រើនឆ្នាំមកនេះ។» លោក លី ថ្លែងបែបនេះក្នុងពិធីនៅថ្ងៃទី២៧ ខែកក្កដា។ មេដឹកនាំរូបនេះ ក៏ឆ្លៀតលើកឡើងពីលក្ខណៈសម្បត្តិខ្លះដែលមេដឹកនាំសិង្ហបុរីត្រូវមាន។ លោកអះអាងថា សិង្ហបុរី ត្រូវតែមានមេដឹកនាំដែលអាចប្រឈមមុខភាពគ្រោតគ្រាតរបស់នយោបាយ ហើយមានការប្ដេជ្ញាចិត្តតស៊ូដោយកម្លាយថាមពលដើម្បីជំនឿរបស់ខ្លួន។

ខុសពីប្រទេសផ្សេង សិង្ហបុរី ក៏ត្រូវការមេដឹកនាំមានសមត្ថភាព និងការប្ដេជ្ញាចិត្ត ដែលជាអ្នកពេញដោយសេចក្ដីក្លាហាន អ្នកមានទទួលបានការគោរពពីប្រជាជន ហើយអាចកៀរគរប្រជាជនទាំងមូលឲ្យសម្រេចបានលទ្ធផលទាំងអស់គ្នា។ នេះជាការបន្ថែមរបស់លោក លី ដែលបន្តថា ការផ្លាស់ប្ដូរមេដឹកនាំ ជាដំណើរការមិនចេះចប់ ហើយសិង្ហបុរីត្រូវការប្រជាជនមានសមត្ថភាពនៅគ្រប់ជំនាន់ទៅមុខបម្រើប្រទេស៕