ជាតិ
ពាមក្រសោប ឆ្នេរកោងកាង និងទឹកធ្លាក់តាតៃ តំបន់ទេសចរណ៍សក្តានុពលនៅកោះកុង
× ភ្នំពេញ៖ ខេត្តកោះកុង ជាខេត្តដែលមានសក្ដានុពលធនធានធម្មជាតិ ហើយក៏ជាមូលហេតុដែលធ្វើឲ្យខេត្តនេះសម្បូរបែបនៃកន្លែងទេសចរណ៍ផងដែរ។ កាលពីពេលកន្លងទៅ ក្រសួងទេសចរ បានបង្ហាញតំបន់ទេសចរណ៍សក្តានុពលចំនួន៣នៅក្នុងខេត្តភាគនិរតីមួយនេះ ដែលតំបន់ទាំង៣នោះ មានសហគមន៍ការពារធម្មជាតិពាមក្រសោប,រមណីយដ្ឋានឆ្នេរកោងកាង និងតំបន់ទឹកធ្លាក់តាតៃ។
សហគមន៍ការពារធម្មជាតិពាមក្រសោប ជាតំបន់អេកូទេសចរណ៍មួយ ដែលមានទីតាំងស្ថិតនៅក្នុងភូមិបាកាយ៉ាក ឃុំពាមក្រសោប ស្រុកមណ្ឌលសីមា ខេត្តកោះកុង។ ត្រូវបានបង្កើតឡើងនៅក្នុងឆ្នាំ ១៩៩៧ សហគមន៍ការពារធម្មជាតិពាមក្រសោប មានព្រៃកោងកាងលាតសន្ធឹងប្រមាណ ៥ ម៉ឺនហិកតា ដែលមានប្រពន្ធ័អេកូឡូស៊ី និងជីវៈចម្រុះគ្រប់ប្រភេទ ព្រមទាំងជាជម្រកសត្វក្នុងទឹក និងសត្វស្លាបជាច្រើនប្រភេទផងដែរ។ នៅសហគមន៍ការពារធម្មជាតិពាមក្រសោប អ្នកទេសចរ ជិះទូកកម្សាន្តតាមដងព្រែក គយគន់ទេសភាពព្រៃកោងកាង និង សត្វស្លាបជាដើម។
តំបន់សក្តានុពលរដ្ឋទេសចរណ៍មួយទៀតរបស់ខេត្តកោះកុងនោះគឺរមណីយដ្ឋានកោងកាង កាង។ រមណីយដ្ឋាននេះ មានទីតាំងនៅឃុំជ្រោយស្វាយ ស្រុកស្រែអំបិល ចម្ងាយតែ១៥គីឡូម៉ែត្រប៉ុណ្ណោះ ពីផ្លូវបំបែកស្រែអំបិល។ ក្រៅពីគយគន់ឆ្នេរសមុទ្រស្រស់ស្អាត អមជាមួយនឹងខ្យល់បរិសុទ្ធហើយនោះ អ្នកទេសចរ អាចទទួលអាហារតាមតូបតូចៗដែលត្រូវបានសង់ឡើងប្របមាត់សមុទ្រ គយគន់ថ្ងៃលិច និងអាចអាំងសាច់ និងគ្រឿងសមុទ្រស្រស់ៗដែលសហគមន៍នេសាទ និងអាចបោះតង់គេងបានទៀតផង។
តំបន់ទឹកធ្លាក់តាតៃ ក៏ជាតំបន់ទេសចរណ៍សក្តានុពលដែលណែនាំដោយក្រសួងទេសចរណ៍ដែរ។ ទឹកធ្លាក់តាតៃ មានទីតាំងនៅក្នុងភូមិអន្លង់វ៉ាក់ ឃុំតាតៃក្រោម ស្រុកកោះកុង ខេត្តកោះកុង ចម្ងាយប្រមាណ១៧គីឡូម៉ែត្រ ពីក្រុងខេមរភូមិន្ទ។ អ្នកទេសចរបានសម្រាកលម្អែអារម្មណ៍ជាមួយនឹងទេសភាពធម្មជាតិ អមដោយទឹកធ្លាក់តាមជម្រាលថ្ម ងូតទឹកកម្សាន្ត និងជិះទូកកៃយ៉ាក់នៅតំបន់នេះបានដែរ។
ខេត្តកោះកុង មានទីតាំងស្ថិតនៅភាគនិរតី នៃប្រទេសកម្ពុជា ចម្ងាយ២៩០គីឡូម៉ែត្រពី រាជធានីភ្នំពេញ និងមានព្រំប្រទល់ខាងកើតជាប់នឹងខេត្តកំពង់ស្ពឺ និងខេត្តព្រះសីហនុ ខាងលិចជាប់នឹងឈូងសមុទ្រថៃ និងប្រទេសថៃ ខាងជើងជាប់នឹងខេត្តពោធិ៍សាត់ និងខាងត្បូងជាប់នឹងខេត្តព្រះសីហនុ និងឈូងសមុទ្រថៃ៕
រូបភាពពីក្រសួងទេសចរណ៍
© រក្សាសិទ្ធិដោយ thmeythmey.com