COVID-19
អន្តរជាតិ
ប្រធានសភាតំណាងអាមេរិក គំរាមបណ្ដេញសមាជិកចេញពីអគារសភា បើអត់ពាក់ម៉ាស់ ប្រធានសភាតំណាងអាមេរិក អ្នកស្រី ណាន់ស៊ី ផេឡូស៊ី និយាយទៅកាន់អ្នកសារព័ត៌មាន ក្នុងអគារ Capitol នៅថ្ងៃទី ២៩ ខែកក្កដា ឆ្នាំ២០២០ (Reuters)
× សភាតំណាងអាមេរិក បានដាក់បញ្ជាឲ្យសមាជិកនិងបុគ្គលិកទាំងអស់ ពាក់ម៉ាស់ ជាចាំបាច់ ខណៈករណីស្លាប់ COVID-19 ក្នុងប្រទេសកើនលើស១៥ម៉ឺននាក់។ ប្រធានសភាតំណាង អ្នកស្រី ណាន់ស៊ី ផេឡូស៊ី ព្រមានថា នរណាដែលល្មើសវិន័យនេះ ប្រឈមនឹងការបណ្ដេញចេញពីបរិវេណអគារ។
ថ្លែងក្នុងកិច្ចប្រជុំសភាតំណាង នៅថ្ងៃទី ២៩ ខែកក្កដា អ្នកស្រី ណាន់ស៊ី ផេឡូស៊ី និយាយថា៖«ប្រធាន រំពឹងថា សមាជិកនិងបុគ្គលិកទាំងអស់គោរពតាមការណែនាំនេះ ដែលជាសញ្ញាមួយនៃការគោរពចំពោះសុខភាព សុវត្ថិភាព និងសុខុមាលភាពរបស់អ្នកដទៃ ដែលមានវត្តមានក្នុងបរិវេណអគារនេះ»។
តាមការចុះផ្សាយរបស់ទូរទស្សន៍ BBC អ្នកស្រី អះអាងថា អ្នកស្រីនឹងចាត់ទុកការមិនពាក់ម៉ាស់ គឺជាការរំលោភយ៉ាងធ្ងន់ធ្ងរចំពោះសុភាវធម៌ ហើយពួកគេអាចនឹងត្រូវបណ្ដេញចេញពីបរិវេណអគារ។ យ៉ាងណាមិញ អ្នកស្រី ផេឡូស៊ី បញ្ជាក់ថា សមាជិកសភា នឹងត្រូវអនុញ្ញាតឲ្យដោះម៉ាស់ចេញ នៅពេលឡើងថ្លែងសុន្ទរកថា។
យោងតាមវេបសាយ GovTrack.us សមាជិកសភាអាមេរិក១០នាក់ ក្នុងនោះ មកពីប្រជាធិបតេយ្យ៣នាក់ និងសាធារណរដ្ឋ៧នាក់ មានលទ្ធផលតេស្តវិជ្ជមាន COVID-19 ។ ការសម្រេចចិត្តរបស់ប្រធានសភាតំណាងរូបនេះ បានធ្វើឡើងក្រោយលោក Louie Gohmert សមាជិកសភាមកពីបក្សសាធារណរដ្ឋ ដែលជារឿយៗ ត្រូវបានគេមើលឃើញ ដើរជុំវិញអគារ Capitol ដោយអត់ពាក់ម៉ាស់នោះ បានឆ្លង COVID-19 នៅថ្ងៃទី២៩ ខែកក្កដា។
លោក Gohmert អាយុ ៦៦ ឆ្នាំ បានដឹងខ្លួនថា ឆ្លង COVID-19 នៅពេលលោកបានធ្វើតេស្ត COVID-19 ដែលតម្រូវដោយសេតវិមានអាមេរិក ព្រោះត្រូវធ្វើដំណើរជាមួយប្រធានាធិបតី ដូណាល់ ត្រាំ ទៅកាន់រដ្ឋ Texas នៅថ្ងៃទី២៩ ខែកក្កដា។
គិតមកត្រឹមថ្ងៃទី ៣០ ខែកក្កដា សហរដ្ឋអាមេរិក មានករណីឆ្លង COVID-19 សរុប៤,៥១លានករណី ក្នុងនោះជាសះស្បើយ ២,២១លាននាក់ ហើយអ្នកស្លាប់មាន១៥,៣ម៉ឺននាក់។ អ្នកឆ្លង COVID-19 ទូទាំងពិភពលោក បច្ចុប្បន្ន មាន១៧លានករណី ក្នុងនោះជិត១០លាននាក់ជាសះស្បើយ ខណៈអ្នកស្លាប់មាន ៦៦,៧ម៉ឺននាក់៕
Tag:
សហរដ្ឋអាមេរិក
ណាន់ស៊ី ផេឡូស៊ី
សភាតំណាង
© រក្សាសិទ្ធិដោយ thmeythmey.com