COVID-19
អន្តរជាតិ
COVID-19៖ ករណីស្លាប់១ទៀតនៅដាណាង សរុប៣នាក់ហើយនៅវៀតណាម រថយន្តសង្រ្គោះបន្ទាន់ នៅក្នុងទីក្រុងដាណាង។ រូបភាព៖ VnExpress
× វៀតណាម នៅថ្ងៃទី១ ខែសីហា បានរាយការណ៍ថា មានអ្នកស្លាប់ដោយសារ COVID-19 មួយនាក់ទៀតនៅដាណាង។ អ្នកស្លាប់សរុបមានចំនួន ៣នាក់ ខណៈករណីឆ្លងមានចំនួន ៥៥៨ករណី។
តាមការចុះផ្សាយរបស់កាសែតក្នុងស្រុកវៀតណាម ស្ត្រីជនជាតិវៀតណាម វ័យ៦៨ ឆ្នាំ បានស្លាប់ដោយសារ COVID-19 បន្ទាប់ពីឆ្លងកូរ៉ូណាវីរុសបានរយៈពេល ២ថ្ងៃ។ ស្ត្រីដែលរស់នៅក្នុងទីក្រុងដាណាងរូបនេះ ក៏មានជំងឺមហារីកឈាម លើសឈាម ទឹកនោមផ្អែម ភ្ជាប់មកជាមួយផងដែរ។ បើតាមការបញ្ជាក់របស់អាជ្ញាធរសុខាភិបាល អ្នកជំងឺទី៤៩៩ នេះ គឺចេញរោគសញ្ញានៅថ្ងៃទី២៧ ខែកក្កដា ហើយក្រោយមកត្រូវគេធ្វើតេស្តរកឃើញមានផ្ទុកCOVID-19។
គិតមកត្រឹមថ្ងៃទី១ ខែសីហានេះ វៀតណាម មានអ្នកស្លាប់សរុបដោយសារ COVID-19ចំនួន ៣នាក់ ខណៈអ្នកជំងឺចំនួន ១៨នាក់ផ្សេងទៀត ដែលជាមនុស្សចាស់ និងមានជំងឺរ៉ាំរ៉ៃ កំពុងស្នាក់នៅមន្ទីរពេទ្យ និងស្ថិតក្នុងសភាពធ្ងន់ធ្ងរ។ ក្រសួងសុខាភិបាលវៀតណាមបានបញ្ជាក់បែបនេះ។
គិតមកត្រឹមថ្ងៃទី១ ខែសីហា វៀតណាមមានករណីសរុបចំនួន ៥៥៨ករណី និងមានអ្នកជាសះស្បើយចំនួន ៣៧៣នាក់៕
© រក្សាសិទ្ធិដោយ thmeythmey.com